اباي تۋرالى جازۋ قيىننىڭ قيىنى بولسا دا, حاكىم سوزدەرى مەن ءومىربايانى ءتىل ۇشىنا ءوزى-اق ورالىپ تۇرماي ما؟ اۋىلداعى ۇلكەندەر ء«ار ەلدىڭ ءوز ابايى بار» دەپ وتىراتىن. قازىر اركىمنىڭ دەپ ايتىپ ءجۇرمىز. حاكىم ءومىرى مەن شىعارماشىلىعىن وقىرمان سانا-سەزىمى جەتكەنىنشە تۇسىنەتىنى راس قوي. وڭگەسى تانىتۋشىلاردىڭ ءىسى شىعار.
ءبىر بەلگىلى اقىن اعامنىڭ ءسوزى ەسكە تۇسەدى. «سەمەي مەن قارقارالىدان ۇزاپ شىقپاي, جيدەبايدا جاتىپ-اق ادامزاتتى جىرلاپ تاستاعان ابايدان اسقان دانىشپان جوق» دەيتىن. وي, اللا-اي, دەسەڭىزشى, شىنىندا دا ابايدىڭ ۇزاپ بارعان مەكەندەرى سەمەي, ءارى اسسا قارقارالى ەكەن-اۋ. قازاق اراسىنىڭ ءوزىن تولىق ارالاماعان. اقىل مەن ويدىڭ قۇدىرەتىندە شەك جوق دەگەن وسى ەمەس پە؟ ۇزاپ جولعا شىقپاي-اق, ادام تانۋعا عانا ەمەس, الەم تانۋعا داڭعىل جول سالىپ كەتكەنىن كورەمىز.
العاش ساپارى قارقارالىدان باستالىپتى بالا ابايدىڭ. مۇمكىن سەمەيگە بارعان شىعار, بىراق اۋەزوۆ «اباي جولىندا» اقىن التى جاسىندا اكەسىنە ەرىپ قارقارالىعا, مەشىتتىڭ اشىلۋىنا كەلگەنىن جازادى. ودان كەيىن كۇيەۋ بولىپ, باسقا دا جاعدايمەن قانشاما رەت بارعانى انىق. ماسەلە, اقىننىڭ اۋلىنان ۇزاپ شىققان وسى ءبىر ساپارىنىڭ ءوزى الاش بالاسىن ۇلتتىق مۇراتتارعا باستايتىن ۇلى جولعا اينالۋىندا. اباي جول قىلعان سەمەي مەن قارقارالىنىڭ اراسى اسىل مۇراتتاردىڭ التىن كوپىرى بولىپ قالدى. كەيىن قازاقتى قايتسەم ەل قىلام دەگەن الاش ارىستارى وسى جولمەن قارقارالىدان سەمەيگە جونەدى. ءاليحان, احمەتتەر و باستا قارقارالى پەتيتسياسىن جازىپ, حالىققا سول جەردە تانىستىرعان-دى. مۇندا تۇراقتاتپاعان سوڭ, ارىستار شوعىرى قارقارالىدان سەمەيگە جۇرگەنى – اقىننىڭ باسىپ وتكەن جولىن ىرىمداپ, اباي مۇراتىن بەتكە العانداي ەلەستەيدى. اباي جولى, اباي شىعارمالارى, باسىپ وتكەن ءىزى – ۇلى مۇراتتارعا باستايدى دەگەن ءسوز. كەيبىر ءپالساپاشىلار ءومىردى جول دەپ ۇعىندىراتىنىن ويلاساق, مۇنىڭ ءمانى سوعۇرلىم اشىلا تۇسەدى. اللانىڭ جازۋى دەيمىز بە, اقىننىڭ رۋحى دەيمىز بە, ابايدان سوڭ بۇل ارالىقتى ماڭدايعا تۇتقانداردىڭ ەسىمى تاريحتا التىن ارىپپەن جازىلعانىن بايقايمىز. الاش ارىستارىنىڭ وسى جولدى باسىپ ءوتىپ بارىپ سەمەيدە تۋ تىككەنى بەلگىلى. ولاردان سوڭ قارقارالىدان سەمەيگە وقۋ ىزدەپ اتتانعان جەتى جاسار جەتىم بالا قاسىم امانجولوۆقا دا قاسيەتى دارىعان. قىزىل يمپەريانىڭ تۇسىندا قاسىم قازاقتىڭ ۇلتتىق اقىنى بولىپ قالدى. «تۋعان جەر» ولەڭىندە قاسىم ايتپاقشى, حاكىم باسقان ءىزدىڭ «ول شەتى مەن بۇل شەتىنە قاراساڭ», ءومىردىڭ ۇلى مۇراتىنا جەتەلەيدى.