«بولاشاق» ستيپەندياسى يەگەرلەرىنىڭ ءتىزىمى جاريالاندى. حالىقارالىق باعدارلامالار ورتالىعىنىڭ حابارلاۋىنشا, شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ شەشىمىمەن 184 ازامات ستيپەنديا يەگەرى اتاندى.
ورتالىق تاراتقان اقپاراتقا سۇيەنسەك, ءبىرىنشى تاعايىنداۋ ناتيجەسى بويىنشا 138 ادام ماگيستراتۋرا, 13 ادام دوكتورانتۋرا باعدارلامالارى بويىنشا ءبىلىم الادى, 33 ازاماتىمىز الەمنىڭ جەتەكشى جوعارى وقۋ ورىندارى مەن وندىرىستىك ورتالىقتارىندا تاعىلىمدامادان وتەدى. ىرىكتەۋ كەزىندە ينجەنەرلىك-تەحنيكالىق جانە مەديتسينالىق ماماندىقتارعا باسىمدىق بەرىلگەن. وقىتۋ 62 ماماندىق بويىنشا جۇرگىزىلەدى. بيىل باسىم ماماندىقتاردىڭ ءتىزىمى مەملەكەتتىك ورگانداردىڭ قاجەتتى ماماندىقتار بويىنشا كادرلار دايارلاۋ جونىندەگى سۇراۋلارى نەگىزىندە جاسالدى. اۋىلدىق جەرلەردەن شىققان ۇمىتكەرلەرگە, ينجەنەرلىك-تەحنيكالىق قىزمەتكەرلەرگە, مەديتسينا قىزمەتكەرلەرىنە جەڭىلدىك ساناتتارى قولجەتىمدى. ولار وقۋدى باستاماس بۇرىن 12 ايعا دەيىنگى تىلدىك دايىندىقتان وتە الادى, ستيپەندياعا قۇجاتتاردى تاپسىرعان كەزدە ۋنيۆەرسيتەتتەن شاقىرۋ حاتىنىڭ بولۋى مىندەتتى ەمەس.
وسى جىلعى وزگەرىستەرگە قاتىستى «حالىقارالىق باعدارلامالار ورتالىعى» اكتسيونەرلىك قوعامى باسقارما توراعاسى ءاليا وسپانوۆا: «بيىل وتىنىمدەردىڭ رەكوردتىق سانى كونكۋرسقا قاتىسۋدىڭ جوعارى دەڭگەيىن كورسەتتى. الداعى ۋاقىتتا ءبىز كونكۋرسقا ىرىكتەۋ ەرەجەلەرىن جەتىلدىرىپ, قۇجاتتاردى رەسىمدەۋدىڭ بۇكىل ۇدەرىسىن تسيفرلاندىرۋدى جوسپارلاپ جاتىرمىز. ىرىكتەۋ كەزەڭدەرىن ەنگىزۋ جانە تەستىلەۋ ءتۇرىن وزگەرتۋدى دە قاراستىرىپ وتىرمىز», دەدى.
ۇمىتكەرلەر Harvard University, Stanford University, National University of Singapore, University of Pennsylvania, University of Illinois at Urbana-Champaign سياقتى الەمدىك رەيتينگتەردىڭ توپتارىنا كىرەتىن ۋنيۆەرسيتەتتەرگە ءتۇستى. ەڭ كوپ قىزىعۋشىلىق تۋدىرعان ماماندىقتار: «اقپاراتتىق تەحنولوگيالار جانە جۇيەلەر», «ۇلكەن دەرەكتەردى تالداۋ», «كولىك تەحنولوگيالارى», «قوعامدىق دەنساۋلىق ساقتاۋ», «حيميالىق ينجەنەريا», «قۇرىلىس ينجەنەرياسى», «حالىقارالىق قۇقىق جانە قاۋىپسىزدىك», «زياتكەرلىك مەنشىك», «ەكولوگيا». ستيپەندياتتار ءتىزىمىن ورتالىقتىڭ bolashak.gov.kz سايتىنان كورە الاسىزدار.