شىنايىلىق ماڭىزدى

قارجىسى مول, قۇرىعى ۇزىن اقپارات قۇرالى كىم كورىنگەننىڭ قولى جەتە بەرمەيتىن اقپاراتتى ەلدەن بۇرىن جاريالايدى, كاسىبي مىقتى جۋرناليستەردى جالداۋ ارقىلى ساپالى دۇنيە ۇسىنادى. سولار بەدەلدى. ارينە, كەيبىر كەزەڭدەردە ساياسي احۋالداردان, مەنەدجمەنتتىڭ ويسىز شەشىمدەرىنەن نەمەسە اۋديتوريانىڭ قالاۋىن سا­ۋاتتى زەرتتەمەۋ, كادر تۇراقسىزدىعى سياقتى قاتەلىكتەردەن جاپ-جاقسى اقپارات قۇرالىنىڭ قۇلدىراعانىن كورىپ ءجۇرمىز. دەگەنمەن ءدال قازىر ەلىمىزدىڭ اقپارات قۇرالدارىنىڭ بەدەلى ەشكىمنەن كەم دە ەمەس, ارتىق تا ەمەس. قال-قادىرىنشە جۇمىسىن اتقارىپ جاتىر. جۋرناليستىك ميسسياسى – اقپارات تاراتۋ. ول شىن, ناقتى, جەدەل جانە ساۋاتتى بولۋى شارت. بۇل باعىتتا ماسەلە جوق, قازاق باق الەمدە بار تەحنيكا مەن ءتاسىلدىڭ بارلىعىن جەتىك مەڭگەردى. بىراق ءبىر ماسەلە بار, كەيىنگى جىلدارداعى گەوساياسي, گەوستراتەگيالىق تارتىستار جۋرناليستيكانىڭ سيپاتىنا اسەر ەتتى. بۇرىن «تەك شىنايى اقپارات قانا تاراتۋ پارىز» دەپ كەلگەن ءىرى جۇرتتار ەندى اقپاراتتىق مۇددە, اقپاراتتىق ناسيحات, اقپاراتتىق قورعانۋ ماسەلەلەرىن اشىق تۇردە العا شىعارىپ وتىر. سوندىقتان ءبىزدىڭ جۋرناليستەر دە نەگىزگى ميسسيا مەملەكەتتىڭ تۇتاستىعى, بىرلىگى, بەرىكتىگى ەكەنىن ويلاۋى كەرەك. بۇل بالكىم وتپەلى كەزەڭ بولار, ەرتەڭ كۇشتىلەر دە ەس جيار, بىراق ءبىزدىڭ جۇمىسىمىز دا سول كۇردەلى كەزەڭنىڭ تالاپتارىنا ساي بولۋى ابزال.

قازىر كورەرمەن, وقىرمان مەن تىڭ­دار­مان ءۇشىن ءبىر قيىن ءداۋىر بولىپ تۇر. اقپارات تىم كوپ, ونى تاراتاتىن, ۇرلەيتىن قۇرال ودان اسىپ تۇسەدى. قاي­سى­سى وتىرىك, قايسىسى شىن ەكەنىن ايى­رۋ – كادىمگى جۇمىس. «ازاماتتىق جۋرناليستيكا» دەگەن ادەمى تەرميندى ەنگىزىپ الدىق تا, ەندى يە بولا الماي وتىرمىز. ويتكەنى جاۋاپ­كەرشىلىك از. «ماسس-مەديا تۋرالى» زاڭ وسى ماسەلەنى رەتتەۋگە سەپ بولادى.  ونى قابىلداۋداعى ماقسات تا سول تەك ءداستۇرلى اقپارات قۇ­رال­­دارىن عانا ەمەس, جاڭا مەديانىڭ جۇ­مى­سىن ءبىر رەتكە, ەپتەپ جۇيەگە كەل­تىرۋ بولسا كەرەك. بۇگىن الەۋمەتتىك جە­لى­لەر ارقىلى اقپارات تاراتۋ, ماسەلە كو­تە­رۋ, دات ايتۋ, جارناما جاساۋ بەلەڭ الىپ تۇر.

ەركىن تاڭاتقان ۇلى,

«Abai TV» تەلەارناسىنىڭ ديرەكتورى