پرەمەر-مينيستر ولجاس بەكتەنوۆ قىزىلوردا وبلىسىندا جاڭا جەو قۇرىلىسىنىڭ بارىسىمەن تانىستى. سونداي-اق جوسپارداعى شىنى كلاستەرىنە قاتىستى تاباق شىنى وندىرەتىن ينۆەستيتسيالىق جوبانى كورىپ, مەملەكەت باسشىسىنىڭ وڭدەۋ ونەركاسىبىنىڭ ۇلەسىن ۇلعايتۋ جونىندەگى تاپسىرماسىنىڭ ورىندالۋىن تەكسەردى.
قازىر ءوڭىر تۇرعىندارىن 1964 جىلى پايدالانۋعا بەرىلگەن جەو جىلۋمەن قامتاماسىز ەتىپ وتىر. بۇگىندە جابدىقتىڭ توزۋى 75%-دى قۇرايدى. ورتالىقتاندىرىلعان جىلۋمەن جابدىقتاۋ جۇيەسىنە 2 949 نىسان, ونىڭ ىشىندە 808 كوپپاتەرلى ءۇي قوسىلعان. بيىل وسى نىسانداردى ىستىق سۋمەن قامتاماسىز ەتۋ ءۇشىن پرەزيدەنت قويعان مىندەتتى ىسكە اسىرۋ شەڭبەرىندە ۇكىمەت رەزەرۆىنەن 11 ملرد, قالالىق قازاندىقتاردى جوندەۋگە تاعى 2 ملرد تەڭگە ءبولىندى. سونىمەن قاتار جىلۋ جەلىلەرىن جاڭعىرتۋعا رەسپۋبليكالىق بيۋدجەتتەن 6 ملرد تەڭگە باعىتتالعان. قابىلدانعان شارالار جىلۋ تراسسالارىنىڭ توزۋىن 42%-عا دەيىن تومەندەتۋگە مۇمكىندىك بەرەدى.
سونداي-اق پرەمەر-مينيسترگە جىلۋ قۋاتى ساعاتىنا 277 گكال بولاتىن جاڭا جەو قۇرىلىسىنىڭ قارقىنى تۋرالى باياندالدى. قازىرگى ۋاقىتتا جەر قازۋ جۇمىستارى اياقتالعان. جابدىقتى ورناتۋعا نەگىز قالانىپ جاتىر. قۇرىلىس الاڭىنا 600-گە جۋىق ادام, 60 تەحنيكا جۇمىلدىرىلدى. جۇمىس جوسپارعا سايكەس ءجۇرىپ جاتىر. نىساندى 2025 جىلى پايدالانۋعا بەرۋ جوسپارلانعان. وسى كەزدە ينۆەستور جوبانى ىسكە اسىرۋعا 70 ملرد تەڭگەدەن استام ينۆەستيتسيا سالدى.
ۇكىمەت باسشىسى ەل ەكونوميكاسىنىڭ بەلسەندى دامۋىنا جانە ونەركاسىپتىك كاسىپورىنداردىڭ ىسكە قوسىلۋىنا بايلانىستى قوسىمشا ەنەرگيا قۋاتى قاجەت ەكەنىن ايتتى. «جاڭا جەو قۇرىلىسى مەملەكەت باسشىسىنىڭ ەرەكشە باقىلاۋىندا. ونىڭ ىسكە قوسىلۋى وڭتۇستىك وڭىردەگى ەلەكتر ەنەرگياسىنىڭ جۇكتەمەسىن تۇراقتاندىرۋعا جانە تۇتاستاي العاندا ەلىمىزدىڭ ەنەرگەتيكالىق قاۋىپسىزدىگىن نىعايتۋعا وڭ اسەرىن تيگىزەدى», دەگەن و.بەكتەنوۆ وبلىس اكىمدىگىنە گاز جەتكىزۋشى قۇبىر مەن جەو قۇرىلىسىن ۋاقتىلى اياقتاۋ تۋرالى, سونداي-اق بارلىق نىسانداردىڭ جىلۋ بەرۋ ماۋسىمىنا دايىندىعىن قامتاماسىز ەتۋ جونىندە تاپسىرما بەردى.
قىزىلوردا وبلىسى وڭدەۋ ونەركاسىبىندە وندىرىلگەن ءونىم كورسەتكىشىنىڭ ءوسۋ قارقىنى بويىنشا كوش باستاپ تۇر. ءوڭىر باسشىسىنىڭ ورىنباسارى ارداق زەبەشەۆ پرەمەر-مينيسترگە وڭىردەگى ونەركاسىپتىڭ دامۋى تۋرالى اڭگىمەلەپ بەردى. بيىلعى 5 ايدا ەكونوميكانىڭ وسى سەكتورى 6,3% ءوسىم كورسەتىپتى. سونداي-اق ينۆەستيتسيا كولەمى 40%-عا ارتقان. ونىڭ 80%-ى – جەكە سالىمدار. 2024-2028 جىلدار ارالىعىندا 8,4 مىڭ جۇمىس ورنىن قۇرىپ, جالپى سوماسى 1,1 ترلن تەڭگەگە 76 جوبانى ىسكە اسىرۋ كوزدەلگەن. وسى جىلدىڭ وزىندە 32,4 ملرد تەڭگە سوماسىنا 15 جوبا ىسكە قوسىلادى.
شىنى زاۋىتىنىڭ ىسكە قوسىلۋى دامۋعا ايرىقشا سەرپىن بەرەدى. قازىرگى تاڭدا شىنى كلاستەرىن قۇرۋ جۇمىستارى باستالدى. كاسىپورىن جۇمىس ىستەگەن ۋاقىت ىشىندە 27,3 ملرد تەڭگەگە 20,8 ملن شارشى مەتر شىنى ءوندىرىلدى. بۇگىندە كاسىپورىن 15 ملن دوللار كولەمىندەگى ءوز قاراجاتىنا قۋاتى جىلىنا 5 ملن شارشى مەتر ەنەرگيانى ۇنەمدەيتىن شىنى شىعاراتىن جاڭا جەلىنى ىسكە قوستى.
ۇكىمەت باسشىسى ەل ەكونوميكاسى ءۇشىن ماڭىزدى جوبالارعا قاراجات سالۋعا دايىن ينۆەستورلارعا قولداۋ كورسەتۋ قاجەت ەكەنىن ايتتى. سونداي-اق جۇمىس ساپارى اياسىندا جول-كولىك ينفراقۇرىلىمىن دامىتۋ ماسەلەسىنە نازار اۋداردى. اتاپ ايتقاندا, «قىزىلوردا – جەزقازعان», «قىزىلوردا – ۇشقۇدىق» اۆتوموبيل جولدارىن سالۋ جانە «قىزىلوردا – اقتوبە» اۆتوماگيسترالىن رەكونسترۋكتسيالاۋ جوبالارى بار. كولىك مينيسترلىگىنە قاجەتتى جۇمىستاردى جۇرگىزۋگە جانە جوبالاردى ۋاقتىلى اياقتاۋعا ءتيىستى قۇجاتتاردى رەسىمدەۋ جونىندە تاپسىرما بەردى.