ۆەيپكە تىيىم سالۋ: جاڭا زاڭ سەرپىن بەرە مە؟

«تىيىمداردى كاليان مەن ۆەيپتەرگە دە قاتىستى ەنگىزگەن ەدىك. سول ماسەلەلەر بويىنشا قانشاما تالقىلاۋلار بولدى. الايدا, قازىر كوپتەگەن ورىنداردا, ءدامحانالار مەن مەيرامحانالاردا كەلۋشىلەر كاليان تۇتىناتىنى جاسىرىن ەمەس. ۆەيپتەرگە دە تىيىم سالدىق. دەگەنمەن, ولار دا ساتىلىپ جاتىر. وسى رەتتە ۇكىمەت زاڭداردىڭ ورىندالۋىن قانشالىقتى باقىلايدى دەگەن ۇلكەن سۇراق تۋىندايدى. مەملەكەت باسشىسى بەرگەن تاپسىرمالاردى ءاتۇستى ەمەس, تولىق ورىنداۋىمىز كەرەك. ەگەر ءبىز, شىن مانىندە, ۇلتتىڭ دەنساۋلىعى مەن سالاماتتى ءومىر سالتىن ساقتاۋدى ويلاساق, زاڭدار قابىلداپ قانا قويماي, ولاردىڭ تولىق ىسكە اسىرىلۋىن دا قامتاماسىز ەتەيىك. زاڭ ورىندالماسا, قۇقىقتىق مەملەكەتتىڭ بۇكىل قۇرىلىمى زارداپ شەگىپ, جۇمىسىن توقتاتادى. ەنەرگەتيكالىق سۋسىندارعا تىيىم سالۋ تۋرالى نورما دۇرىس ەكەنى تۇسىنىكتى. ونى دارىگەرلەر دە ايتىپ ءجۇر. ەندى سول نورمالاردىڭ جۇزەگە اسىرىلۋىن باقىلاۋ قاجەت», دەدى سەنات توراعاسى.

ماۋلەن اشىمباەۆتىڭ ايتۋىنشا, قۇقىق بۇزۋشىلاردى انىقتاۋ ءۇشىن الىسقا بارۋدىڭ جانە ەرەكشە كۇش سالۋدىڭ قاجەتى جوق. بارلىق «دالەل» اشىق جاريالاناتىن الەۋمەتتىك جەلىلەردى باقىلاسا دا جەتكىلىكتى.

«ماسەلەن, كالياندار تۋرالى ايتايىق. بۇگىن پالاتا وتىرىسىندا ۇكىمەتتىڭ دە وكىلى وتىر. وسى ماسەلەنى جەرگىلىكتى اتقارۋشى ورگاندارمەن بىرگە تەكسەرگەن ءجون. ىشكى ىستەر مينيسترلىگىنىڭ دە باسشىلىعى وسىندا. كەشكى استاناعا شىعىپ قاراڭىز. ءتىپتى ەشقايدا شىعۋدىڭ دا قاجەتى جوق. مۇنىڭ ءبارى الەۋمەتتىك جەلىلەردە جازىلىپ, سۋرەتتەرىنە دەيىن جاريالانىپ جاتىر. وسىعان قاراپ, زاڭنىڭ ورىندالۋى تۋرالى نە ايتۋعا بولادى؟ ەگەر ورىندالمايتىن بولسا, زاڭداردى نە ءۇشىن قابىلدايمىز؟ بۇل ىشكى ىستەر مينيسترلىگىنە, ۇكىمەتكە, جەرگىلىكتى اتقارۋشى ورگاندارعا قاتىستى سۇراق. مۇنداي ماسەلەنىڭ باسقا دا زاڭدارعا قاتىسى بار», دەدى ماۋلەن اشىمباەۆ.

ايتا كەتسەك, بۇگىن پالاتا وتىرىسىندا سەناتورلار «قر-نىڭ كەيبىر زاڭنامالىق اكتىلەرىنە ويىن بيزنەسى, لوتەرەيا قىزمەتى, دەنساۋلىق ساقتاۋ, مەملەكەتتىك ەڭبەك ينسپەكتسياسى, مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارادى.