وتاندىق «الەم بەينەسى» ارت-جوباسى گيننەستىڭ رەكوردتار كىتابىنا ەنگەن. بۇل تۋىندى دۋبايدا وتكەن ەكسپو دۇنيەجۇزىلىك كورمەسىندە ەلىمىزدىڭ ۇلتتىق پاۆيلونىندا ۇسىنىلعان-تۇعىن.
وعان الەمنىڭ 193 ەلىنىڭ 2 مىڭعا تارتا ازاماتى ءوز تاڭبالارىن قالدىرعان. ولاردىڭ قاتارىندا گولليۆۋد اكتريساسى باي لينگ, امەريكالىق كاسىپقوي بوكسشى روي دجونس, ءتۇبى قازاقستاندىق رەجيسسەر تيمۋر بەكمامبەتوۆ, رەسەيلىك ءانشى ۆالەريا سىندى الەمدىك جۇلدىزدار بار. قىزىعى, كەنەپتىڭ ولشەمى جەر-جاھاننىڭ فيزيكالىق پارامەترلەرىنە سايكەس كەلەدى. الەمنىڭ كىشكەنتاي كورىنىسى سەكىلدى تۋىندى بارشا ادامدى بىرىكتىرىپ, شەكارانىڭ جوقتىعىن كورسەتكەن.
روبوت-مۇعالىم
ءۇندىستاندا روبوت-مۇعالىم بار. اتى – «Iris». جاساندى ينتەللەكت باسقاراتىن روبوت-مۇعالىم وقۋشىلارعا ەرەكشە ساباق وتكىزەدى.
ازىرلەۋشىلەردىڭ ايتۋىنشا, تەحنولوگيا «Intel» چيپسەتىندە جۇمىس ىستەيدى. كىرىستىرىلگەن داۋىس كومەكشىسى جانە Android قولدانباسىنىڭ ينتەرفەيسى بار. ءار وقۋشىنىڭ ەرەكشە قاجەتتىلىكتەرى مەن قالاۋلارىن ەسكەرە وتىرىپ, وزگەشە ءتاسىل قولدانادى. روبوت سىنىپتا وڭاي قوزعالۋ ءۇشىن ارنايى دوڭگەلەكتەرمەن جابدىقتالعان. سونىمەن قاتار ول زاتتاردى دا ۇستاي الادى. ەگەر سىنىپ شۋلى بولسا, مۇعالىم مۇلدەم سويلەمەي قويادى. وقۋشىلار سولاي بەلگىلى ءبىر تارتىپكە باعىنادى.
تيمگە ۋ وتپەيدى
عالىمدارىنىڭ دالەلدەۋىنشە, جەر بەتىندە جىلىنا 400 مىڭ ادام جىلان ۋىنان زارداپ شەگەدى. 20 مىڭى دۇنيە سالادى. ال تيم فريدەگە جىلان ۋى مۇلدەم دارىمايدى.
تاڭعالارلىعى, كەيبىر ۋلى جىلاندار ءتيمنىڭ دەنەسىنە ءتىسىن باتىرۋعا قورقادى. جيىرما جىل ىشىندە تيم ادەيى 200-گە جۋىق جىلاننىڭ ۋىن بويىنا دارىتقان ەكەن. ونىڭ اعزاسى جىلان ۋىنا ابدەن ۇيرەنىپ كەتكەن. ءتىپتى شىبىن شاققان قۇرلى كورمەيدى. ەڭ قىزىعى, ونى شاققان جىلاندار كوپ ۇزاماي وزدەرى ءولىپ قالادى. ول مۇنىڭ ءبارىن قانشاما تاجىريبە مەن «ۋلى جاندىكتەرگە قارسى كۇرەس» زەرتتەۋىنەن ۇيرەنگەن.