بۇقارالىق اقپارات قۇرالدارى قىزمەتكەرلەرى كۇنى قارساڭىندا پارلامەنت سەناتىندا جۋرناليستەر اراسىنداعى «پاراسات» بايقاۋىنىڭ لاۋرەاتتارىن ماراپاتتاۋ ءراسىمى ءوتتى. پالاتا توراعاسى ماۋلەن اشىمباەۆ ءار اتالىم بويىنشا ۇزدىك شىققان جەڭىمپازداردى قۇتتىقتاپ, جۇلدەلەرىن سالتاناتتى تۇردە تابىستادى.
ماۋلەن اشىمباەۆ جۋرناليستەر قاۋىمىن قۇتتىقتاي كەلە, بۇقارالىق اقپارات قۇرالدارى ادىلەتتى قازاقستان قۇرۋ باعدارىن ىسكە اسىرۋعا بەلسەندى قاتىسىپ كەلە جاتقان ماڭىزدى ينستيتۋتتاردىڭ ءبىرى ەكەنىن ايتتى. سەنات cپيكەرى جۋرناليستەردىڭ پارلامەنتتىك پۋلى زاڭ شىعارۋشى ورگان مەن قوعامدى بايلانىستىراتىنىن تىلگە تيەك ەتتى. سونداي-اق ول ەلىمىزدە بولىپ جاتقان وقيعالار, مەملەكەت باسشىسىنىڭ باستاماسىمەن قولعا الىنعان رەفورمالار, سەناتورلاردىڭ جۇمىسى جانە زاڭنامالىق وزگەرىستەر مەن قابىلدانعان شەشىمدەر جايىندا اقپارات تاراتىپ, ولاردىڭ ماڭىزىن حالىققا دايەكتى تۇردە جەتكىزىپ جۇرگەن تىلشىلەر قاۋىمى مەملەكەتتىڭ دامۋىنا ۇلكەن ۇلەس قوسىپ وتىرعانىنا توقتالدى.
– سوڭعى جىلدارى ەلىمىزدە مەملەكەت باسشىسىنىڭ باستاماسىمەن ادىلەتتى قازاقستان قۇرۋ جولىندا اۋقىمدى جۇمىس اتقارىلىپ جاتىر. پرەزيدەنت قاسىم-جومارت توقاەۆ اتاپ وتكەندەي, بۇل – بارشا وتانداستاردىڭ الدىندا تۇرعان ماڭىزدى مىندەت. وسىعان بايلانىستى كەشەندى ساياسي, ەكونوميكالىق, الەۋمەتتىك رەفورمالار ىسكە اسىرىلىپ كەلەدى. ۇلتتىق قۇندىلىقتاردى دارىپتەۋ, يدەولوگيا باعىتىندا دا ماڭىزدى قادامدار جاسالۋدا. مەملەكەت باسشىسى ۇلتتىق قۇرىلتايدىڭ ءۇشىنشى وتىرىسىندا وسى سالاداعى نەگىزگى باسىمدىقتاردى بەلگىلەپ بەردى. سول قاعيداتتاردى جانە اتقارىلىپ جاتقان جۇمىستار مەن قابىلدانعان زاڭداردى حالىققا جەتكىزىپ, ولاردىڭ ءمانىن تۇسىندىرۋدە بۇقارالىق اقپارات قۇرالدارى قىزمەتكەرلەرىنىڭ ەڭبەگى ايرىقشا, – دەدى م.اشىمباەۆ.
سەنات جۇمىسىنداعى باسىم باعىتتاردىڭ ءبىرى – وڭىرلەردىڭ دامۋىنا ىقپال ەتۋ. سونداي-اق جەرگىلىكتى وكىلدى جانە اتقارۋشى ورگاندارمەن بىرلەسىپ وزەكتى پروبلەمالاردى شەشۋ. وسى ورايدا م.اشىمباەۆ بۇقارالىق اقپارات قۇرالدارىنىڭ بولعان وقيعانى جەدەل ءارى وبەكتيۆتى جاريالاۋى, سەناتورلاردىڭ دەپۋتاتتىق ساۋالدارى بويىنشا سيۋجەتتەرى مەن ماقالالارى, تۇراقتى كوميتەتتەردىڭ قىزمەتى مەن قابىلدانىپ جاتقان زاڭدارى تۋرالى تالدامالىق ماتەريالدارى اسا ماڭىزدى ەكەنىن باسا ايتتى. سوندىقتان سەناتورلار باق وكىلدەرىمەن بايلانىستى ودان ءارى نىعايتۋعا مۇددەلى ەكەنىن جەتكىزدى.
– پارلامەنت وسى سەسسيادا 100-گە جۋىق زاڭ قابىلدادى. بارلىق زاڭ حالىقتىڭ ءومىر ءسۇرۋ ساپاسىن ارتتىرۋعا, ەلىمىزدى ودان ءارى دامىتۋعا جانە ازاماتتارىمىزدىڭ قۇقىقتارىن قورعاۋعا ارنالعان. وسى رەتتە ايەلدەردىڭ قۇقىقتارى مەن بالالاردىڭ قاۋىپسىزدىگىن قورعاۋعا, قوعامدىق باقىلاۋدى ارتتىرۋعا جانە مەملەكەتتىك ساتىپ الۋ جۇيەسىن جەتىلدىرۋگە ارنالعان زاڭداردى ەرەكشە اتاپ وتكەن ءجون.
ماڭىزدى نورمالاردىڭ قاتارىندا «ماسس-مەديا تۋرالى» زاڭ دا بار. بۇل قۇجات ماسس-مەديا سالاسىنداعى زاڭنامانى جۇيەلى تۇردە جەتىلدىرۋدى كوزدەيدى. زاڭ شىعارۋ قىزمەتىمەن قاتار سەنات ماڭىزدى ماسەلەلەرگە ارنالعان ۇكىمەت ساعاتتارى, پارلامەنتتىك تىڭداۋلار, دوڭگەلەك ۇستەلدەر جانە حالىقارالىق ءىس-شارالار وتكىزدى. سەناتورلاردىڭ وڭىرلەرگە ساپارىن دا ايرىقشا اتاپ وتكەن ءجون. وسى جۇمىستىڭ بارىنە وزدەرىڭىز دە قاتىسىپ, ولاردىڭ ماڭىزىن حالىققا جەتكىزىپ كەلەسىزدەر. سەنات ءاردايىم بۇقارالىق اقپارات قۇرالدارىمەن تىعىز بايلانىستا جۇمىس ىستەيدى. الداعى ۋاقىتتا وسى بايلانىس ودان ءارى ارتادى دەپ سەنەمىن, – دەپ, م.اشىمباەۆ مەرەكە قارساڭىندا باق وكىلدەرىنە زور دەنساۋلىق, باق-بەرەكە جانە شىعارماشىلىق تابىس تىلەدى.
بيىل «پاراسات» بايقاۋىنا قاتىسۋعا تەلەارنالار, راديو, گازەت, اقپارات پورتالدارى جانە باسقا دا مەديادان ەلىمىز بويىنشا بارلىعى 120-عا جۋىق جۇمىس تۇسكەن. «مەرزىمدى باسپاسوزدەگى ۇزدىك ماتەريال» اتالىمى بويىنشا «Egemen Qazaqstan» گازەتىنىڭ اعا ءتىلشىسى ەسكەندىر زۇلقارناي توپ جاردى. سالتاناتتى ءىس-شارادا جۋرناليستەر اتىنان ءسوز العان ەسكەندىر زۇلقارناي سەنات پەن ماس-ماديا وكىلدەرى اراسىندا اشىق تا سىندارلى بايلانىس ورناعانىن ايتىپ, پىكىرىن ءبىلدىردى.
– باس قوسىپ وتىرعان كيەلى شاڭىراقتىڭ ەل ومىرىندەگى ورنى ەرەكشە. مەملەكەت باسشىسىنىڭ ءاربىر تاپسىرماسى مەن باستاماسىنا زاڭ جۇزىندە قولداۋ ءبىلدىرىپ, ونىڭ ىسكە اسۋىنا, ەل ومىرىنە ەنۋىنە سەنات دەپۋتاتتارىنىڭ قوسىپ جاتقان ۇلەسى وراسان. ماسس-مەديا وكىلى رەتىندە ايتارىم, سەنات توراعاسى مەن دەپۋتاتتارى جۋرناليستەر قاۋىمى ءۇشىن ءاردايىم اشىق. ءبىز كەز كەلگەن ۋاقىتتا پىكىر نەمەسە سۇحبات الۋ ءۇشىن سەناتورلارعا قوڭىراۋ شالعاندا, ولار ءاردايىم بىزگە قولداۋ ءبىلدىرىپ, سۇراقتارىمىزعا جاۋاپ بەرەدى. جوعارعى پالاتانىڭ ءباسپاسوز قىزمەتىنىڭ دە جۋرناليستەرمەن جۇيەلى جۇمىس جۇرگىزەتىنىن اتاپ وتكىم كەلەدى, – دەدى ول.
سونداي-اق وسى اتالىمدا «ناش كوستاناي» گازەتىنىڭ ءتىلشىسى ەكاتەرينا باينياشەۆا مەن «Aiqyn» گازەتىنىڭ ۇجىمى ۇزدىك تانىلدى.
«ۇزدىك تەلەۆيزيالىق ماتەريال» اتالىمىن «24kz» تەلەارناسىنىڭ سولتۇستىك قازاقستان وبلىسىنداعى مەنشىكتى ءتىلشىسى ايداربەك بالعابەكوۆ, «Atameken Business» تەلەارناسىنىڭ ءتىلشىسى فاريزا بولاتبەك جەڭىپ الدى.
«ينتەرنەت-باسىلىمداعى ۇزدىك جاريالانىمدا» «قازاقپارات» حالىقارالىق اقپارات اگەنتتىگىنىڭ ءتىلشىسى رۋسلان عابباسوۆ پەن «Informburo.kz» اقپارات اگەنتتىگىنىڭ ءتىلشىسى ايگەرىم ۋمماتتىڭ مەرەيى ۇستەم بولدى.
«الەۋمەتتىك جەلىلەردەگى ۇزدىك جازبا» اتالىمىن «Jaqsy Bolady» Youtube-ارناسىنىڭ اۆتور-جۇرگىزۋشىسى بولات بۇحارباي, «Abay Live» Youtube-ارناسىنىڭ اۆتور-جۇرگىزۋشىسى اباي تىلەنشيەۆ, «درۋگيە مەستا» بلوگىنىڭ اۆتورى رەنات تاشكينباەۆ يەلەندى.
«ۇزدىك راديوماتەريال» جۇلدەسى «قازاق راديوسىنىڭ» ءتىلشىسى الماس بايدراحمانوۆقا بەرىلدى. جىلدىڭ ارنايى سىيلىعى – «ۇزدىك اناليتيكالىق ماتەريال» بويىنشا «Qazaqstan» ۇلتتىق تەلەارناسىنىڭ ءتىلشىسى امانگەلدى سەيىتحان, «Tengrinews.kz» اقپاراتتىق ينتەرنەت-پورتالىنىڭ ءتىلشىسى ارۋجان ءدارىباي, «كازاحستانسكايا پراۆدا» گازەتىنىڭ ءتىلشىسى لاۋرا تۇسىپبەكوۆا تانىلدى.