قورعانىس ءمينيسترى اسكەري نىسانداردىڭ رەزەرۆشىلەر جيىنىنا دايىندىعىن تەكسەردى. گەنەرال-پولكوۆنيك رۋسلان جاقسىلىقوۆ اباي جانە اياگوز گارنيزوندارىنىڭ اسكەري نىساندارىنا بارىپ, وقۋ-جاتتىعۋ جيىنىنا شاقىرىلاتىن جەكە قۇرامدى قابىلداۋ پۋنكتىن ارالادى.
سالا باسشىسى العاش بولىپ «شىعىس» پوليگونىندا بولدى. مۇندا شىلدە ايىنىڭ ورتاسىندا اسكەري جيىن باستالادى. وعان شامامەن 1,5 مىڭعا جۋىق ادامدى شاقىرۋ جوسپارلانىپ وتىر. قورعانىس ءمينيسترى وقۋ-جاتتىعۋ ورتالىعىنىڭ رەزەرۆشىلەرگە ساباق وتكىزەتىن پۋنكتى, وقۋ-جاتتىعۋ الاڭىن تەكسەردى. ءىس-شارا بارىسىندا اۋماقتىق قورعانىس بريگادالارىنىڭ قۇرامىن جاۋىنگەرلىك دايارلىقتىڭ قاجەتتى دەڭگەيدە ۇستاۋدىڭ ماڭىزدىلىعىن اتاپ ءوتتى.
سودان سوڭ 30217 اسكەري ءبولىمىنىڭ جاۋىنگەرلىك ماشينالار پاركىندەگى قارۋ-جاراق پەن اسكەري تەحنيكانى جوندەۋدى ۇيىمداستىرۋ, ونى ۇزاقمەرزىمدى ساقتاۋعا ازىرلىگىن بايقاپ كوردى. مودۋلدىك كازارما عيماراتتارىن مونتاجداۋ مەن اسحانا سالۋ جۇمىستارىمەن تانىستى.
اياگوز گارنيزونىندا رۋسلان جاقسىلىقوۆ جۇمىس ساپارىن «مايلين» وقۋ-جاتتىعۋ پوليگونىنان باستادى. مينيسترگە بروندى نىسانداردى جويۋ, قارسىلاستىڭ ۇشقىشسىز باسقارىلاتىن اپپاراتتارىنا قارسى تۇرۋ, ەلەكتروندى كۇرەس ارقىلى درونداردى باعدارلاۋ تاسىلدەرى, باسقا دا وقۋ-جاۋىنگەرلىك مۇمكىندىكتەرى كورسەتىلدى.
گارنيزوننىڭ اسكەري بولىمدەرىندە قورعانىس ءمينيسترى گارنيزون اسكەري قىزمەتشىلەرىنىڭ وتباسى مۇشەلەرى تۇراتىن «يۋجنىي» اسكەري قالاشىعىنىڭ تۇرعىن ۇيلەرىنىڭ جوندەۋ جۇمىستارىنىڭ ساپاسىنا ءجىتى ءمان بەردى.
ءىسساپار سوڭىندا ر.جاقسىلىقوۆ جاۋىنگەرلىك دايارلىق ءىس-شارالارىن جوعارى دەڭگەيدە ورىنداۋ, اسكەري نىسانداردى سالۋ مەرزىمدەرىن ساقتاۋ, قارۋ-جاراق پەن اسكەري تەحنيكانى ءتيىستى جاعدايدا ۇستاۋ بويىنشا بىرقاتار مىندەت قويدى. اسىرەسە م ۇلىك پەن وق-دارىلەردى قاۋىپسىز جەرلەردە ساقتاۋعا باسا نازار اۋداردى.