«تازا قازاقستان» جالپىۇلتتىق ەكولوگيالىق اكتسياسى اياسىندا بۇعان دەيىن دە الدەنەشە اۋقىمدى ءىس-شارالار ۇيىمداستىرعان ۇلىتاۋ وبلىسىندا ماۋسىمنىڭ سوڭعى دۇيسەنبىسى بارلىق قالا, اۋدانداردا تازالىق اكتسيالارىنىڭ وتۋىمەن ەرەكشەلەندى.
اكتسياعا بارلىعى ءوڭىر بويىنشا 2 مىڭنان اسا ازامات اتسالىسىپ, 138 الەۋمەتتىك نىسان مەن 13 ونەركاسىپ, جەكە كاسىپ اۋماعى قوقىستان تازارتىلدى. بۇدان بولەك, تازالاۋ جۇمىستارى 61 مادەني-تاريحي ەسكەرتكىشتىڭ اينالاسىندا دا جۇرگىزىلدى. وبلىس بويىنشا 158 توننا قوقىس جانە تۇرمىستىق قاتتى قالدىقتار شىعارىلدى. بارلىعى 245 ۇجىم قاتىسقان تازالىق ءىس-شاراسىندا وبلىستىڭ 76 گەكتار اۋماعى قامتىلدى.
تازالىق ءىس-شارالارىنا «جاسىل ەل» ەڭبەك جاساقتارى ايرىقشا بەلسەندىلىكپەن اتسالىستى. ەكولوگيالىق ءىس-شارالارعا قاتىسۋشىلار اراسىندا سونداي-اق, جەرگىلىكتى بيلىك, قوعامدىق ۇيىمدار, ستۋدەنتتەر, بەلسەندىلەر جانە قاراپايىم تۇرعىندار دا بولدى.
اكتسيا ءاربىر قالا, اۋداندا وزىندىك سيپاتىمەن ءوتتى. ايتالىق, جەزقازعان قالاسىندا تۇرعىندار مەن ەڭبەك ۇجىمدارى نەگىزگى كوشەلەر مەن ساياباق, سكۆەرلەردى تازارتىپ, جاسىل جەلەكتەرگە كۇتىم جاساپ, گۇلزارلاردى رەتكە كەلتىرسە, كەنشىلەر قالاسى سانالاتىن ساتباەۆتا نەگىزىنەن ەڭبەك ۇجىمدارى وندىرىستىك مەكەمەلەردىڭ اۋماعىن تازالاپ, سىرلاۋ, اكتەۋ جۇمىستارىن اتقاردى.
«ساتباەۆ قالاسى بۇرىن تازالىعىمەن ەرەكشەلەنىپ تۇراتىن. كەيىنگى كەزدە سول ءتارتىبىمىز ءسال بوساڭسىپ كەتكەندەي بولعان ەدى. «تازا قازاقستان» اكتسياسى ارقاسىندا قالادا ۇمىتىلا باستاعان سەنبىلىك وتكىزۋ ءتارىزدى ءداستۇرىمىز قايتا جانداندى. بۇل ءىس-شارالارعا جاستاردىڭ بەلسەندى قاتىسۋى قۋانتارلىق», دەيدى «قازاقمىس» كورپوراتسياسى» جشس «جاستار بولاشاق» ۇيىمىنىڭ توراعاسى لۋيزا مينباەۆا.
قاراجال قالاسىنىڭ تۇرعىندارى بۇل كۇنى اۋلالارىن تازالاپ, رۇقسات ەتىلمەگەن ورىندارعا توگىلگەن قوقىستاردى ارنايى پوليگونعا شىعاردى.
وبلىستىڭ جاڭاارقا, ۇلىتاۋ اۋداندارىنداعى تازالىق اكتسيالارى وزەن, كول مەن بۇلاقتاردىڭ اينالاسىن رەتكە كەلتىرۋگە باعىتتالدى. سونىڭ ناتيجەسىندە, ۇلىتاۋ اۋدانى تەرريتورياسىنداعى «كۇمىسبۇلاق», «تاسبۇلاق» بۇلاقتارىنىڭ كوزى اشىلىپ, اينالاسى تازارتىلىپ, كەلۋشىلەرگە قولايلى جاعداي تۋعىزۋ ماقساتىندا اباتتاندىرۋ جۇمىستارى جۇرگىزىلدى. ال جاڭاارقالىقتار بولسا, سارىسۋ وزەنىنىڭ بويىن قوقىستان تازالاپ, جاعاجايلاردى رەتكە كەلتىردى.
تازالىق اكتسيالارى اياسىندا وبلىستىڭ قالا مەن اۋداندارىنداعى اكىمدىكتەردىڭ جاۋاپتى ماماندارى جەرگىلىكتى اۋماقتارداعى كوشەلەردى ارالاپ سانيتارلىق تازالىقتى تەكسەردى. بايقالعان كەمشىلىكتەردى جەدەل جويۋ جونىندە تاپسىرما بەرىلدى.
ۇلىتاۋ وبلىسى