ديپلومات ايەلدەر ۇلەسى ارتىپ كەلەدى

پىكىرتالاس الاڭىندا ­ايەل­دەر­دىڭ ديپ­لو­ما­تياعا قوس­قان ەلەۋلى ۇلەسىن كورسەتۋ, ءوزارا تاجىريبە مەن يدەيا­لار الماسۋ, سونداي-اق وسى سالاداعى گەندەرلىك تەڭدىكتى ودان ءارى ىلگەرىلەتۋ ستراتەگيالارىن تالقىلاندى. ءىس-شاراعا بۇۇ-نىڭ ەلىمىزدەگى تۇراقتى ۇيلەستىرۋ­شىسى ميكاەلا فريبەرگ-ستوري, ۇلىبريتانيانىڭ قازاقستانداعى ەلشىسى كەتي ليچ, بۇۇ-نىڭ ايەلدەرگە قاتىستى ديسكريميناتسيانى جويۋ جونىندەگى كوميتەتىنىڭ (CEDAW) مۇشەسى ءمادينا جاربوسىنوۆا, وڭتۇستىك افريكا رەسپۋبليكاسىنىڭ قازاقستانداعى ەلشىسى كەيتۋمەتسي سەيپەلو تاندەكا مەتيۋز, قر ءسىم كوپجاقتى ىنتىماقتاستىق دەپارتامەنتىنىڭ ديرەكتورى ديدار تەمەنوۆ جانە باس­قا دا ەلىمىزدەگى ديپلوماتيالىق كور­پۋستىڭ وكىلدەرى, ستۋدەنتتەر مەن اكادەميالىق ورتا وكىلدەرى قا­تىستى. ولار ديپلوماتيا سالا­سىنداعى ايەلدەردىڭ ەلەۋلى جەتىس­تىك­تەرى جايلى ءسوز قوزعاپ, وزدەرىنىڭ كاسىبي تاجىريبەلەرىمەن ءبولىستى جانە گەندەرلىك تەڭدىكتى نىعايتۋدىڭ ناقتى ستراتەگيالارىن ۇسىندى.

«ۇزاق جىلدار بويى ايەل ەلشى­لەردىڭ سانى ايتارلىقتاي تومەن بولعان ەدى. 1968 جىلى ولاردىڭ ۇلەسى 20 پايىزدى عانا قۇراعان. بۇگىنگى تاڭدا ءىرى ديپلوماتيالىق قىزمەتتەردە ايەلدەردىڭ ۇلەسى 50-70% ارالىعىندا. قازاقستان وسى باعىتتى ۇستانىپ كەلەدى, ويتكەنى بۇۇ-عا وكىل رەتىندە ەڭ كوپ ايەل ديپلوماتتى تاعايىنداعان ەل – قازاقستان. وسى ورايدا مەن قازاقستاندى قۇتتىقتاي وتىرىپ, جەرگىلىكتى دەڭگەيدە دە گەندەرلىك تەڭدىككە قول جەتكىزۋلەرىڭىزگە, ياعني گەندەرلىك اراقاتىناستىڭ 50/50 ­بولۋىنا تىلەكتەسپىن», دەپ اتاپ ءوتتى بۇۇ-نىڭ قازاقستانداعى تۇراقتى ۇيلەستىرۋشىسى ميكاەلا فريبەرگ-ستوري.

«سىزدە «مۇنداي ەلەۋلى كۇن نەلىكتەن ۋنيۆەرسيتەتتە اتاپ ءوتىلىپ جاتىر؟» دەگەن سۇراق تۋىنداۋى مۇمكىن. بۇعان ءبىر سەبەپ – ۋنيۆەرسيتەتتەردە «حالىقارالىق قاتىناستار» ماماندىعىنا ەرەكشە كوڭىل بولىنەدى. بيىل Maqsut Narikbayev University-دە وسى وقۋ باعدارلاماسى بويىنشا العاش­قى تۇلەكتەر لەگى ديپلوم الماق. بۇگىن ستۋدەنتتەرگە اتاۋ­لى كۇننىڭ ماڭىزىن تەرەڭىرەك تۇسىنۋگە مۇمكىندىك تۋىپ وتىر», دەپ مالىمدەدى Maqsut Narikbayev University باسقارما توراعاسىنىڭ ورىنباسارى اينۇر كاربوزوۆا.

قازاقستاندىق قوعامدىق دامۋ ينستيتۋتىنىڭ باسقارما تور­اعاسى نۇربەك ماتجاني قازاق ايەل ديپ­­لوماتتارىنىڭ ءجۇرىپ وتكەن جولى مەن وتاندىق ديپلوماتيا­نىڭ نەگىزىن سالۋداعى ەڭبەكتەرىنە توقتالدى. وعان قوسا, ەلىمىزدە قىزمەت ەتىپ جۇرگەن شەتەلدىك ايەل ديپلوماتتاردىڭ دا رولىنە باسا نازار اۋدارىپ, ولاردىڭ دا ديپ­لوماتيا سالاسىنداعى گەندەرلىك تەڭدىكتىڭ نىعايۋىنا وزىندىك ۇلەس قوسىپ جاتقانىن اتاپ ءوتتى.

ايتا كەتسەك, بۇۇ باس اسسام­بلەياسىنىڭ 76-سەسسياسىندا 24 ماۋ­سىم ديپلوماتياداعى حالىقارا­لىق ايەلدەر كۇنى رەتىندە بەكى­تىل­گەن. A/RES/76/269 رەزوليۋتسيا­سى بارلىق مۇشە مەملەكەتتەردى, بۇۇ ۇيىمدارىن, ۇكىمەتتىك ەمەس توپتاردى, اكادەميالىق مەكە­مەلەردى جانە ايەل ديپلوماتتار قاۋىمداستىعىن بۇل كۇندى بۇقارانى اقپاراتتاندىرۋ جانە حاباردار ەتۋ ارقىلى اتاپ وتۋگە شاقىرادى.