جىل باسىنان بەرى سولتۇستىك ارال تەڭىزىنە 1,1 ملرد تەكشە مەتر سۋ كەلىپ, ونداعى سۋ كولەمى 21,4 ملرد تەكشە مەترگە جەتتى, دەپ حابارلايدى Egemen.kz.
سۋ رەسۋرستارى جانە يرريگاتسيا مينيسترلىگىنىڭ مالىمەتىنشە قۇرامىنا قازاقستان, قىرعىزستان, تاجىكستان, تۇرىكمەنستان, وزبەكستان كىرەتىن مەملەكەتارالىق سۋ شارۋاشىلىعى كوميسسياسىنىڭ 86-شى وتىرىسىندا تاراپتار سۋارۋ ماۋسىمىندا سولتۇستىك ارالعا اعىن سەكۋندىنا كەمىندە 30 تەكشە مەتر بولادى جانە 997 ملن تەكشە مەتر سۋ جىبەرىلەدى دەپ كەلىستى. قازىرگى ۋاقىتتا تەڭىزگە سەكۋندىنا 50 تەكشە مەتر سۋ كەلەدى. ءبىر جىل بۇرىن اعىن سەكۋندىنا 6 تەكشە مەتر بولعان. وسىعان دەيىن سولتۇستىك ارالدى وڭتۇستىكتەن ءبولىپ تۇرعان كوكارال بوگەتىنىڭ قۇرىلىسى اياقتالىپ, سۋ دەڭگەيىن كوتەرۋگە مۇمكىندىك بەردى.
«بوگەت پايدالانۋعا بەرىلگەننەن بۇگىنگە دەيىن سىرداريا وزەنىنەن سولتۇستىك ارال تەڭىزىنە 46,6 ملرد تەكشە مەتر سۋ كەلدى. ال سوڭعى 7 جىلدا تەڭىزگە 13,3 ملرد تەكشە مەتر سۋ ءتۇستى. سوڭعى جىلدارى سولتۇستىك ارالدىڭ سۋ كولەمى ازايدى, الايدا 2024 جىلدىڭ باسىنان باستاپ دەڭگەيى قايتا كوتەرىلە باستادى جانە بۇگىندە 21,4 ملرد تەكشە مەترگە جەتتى», دەدى ۆەدومستۆونىڭ رەسمي وكىلى ءمولدىر ابدۋاليەۆا. ايتا كەتسەك, سىرداريا وزەنى اعىنىنىڭ 75%-ى قىرعىزستاندا, 20%-ى وزبەكستاندا, 5%-ى قازاقستاندا قالىپتاسادى.