فينالدىق ويىندارعا اقمولا وبلىسىنىڭ, دەسانتتىق-شابۋىلداۋ اسكەرلەرىنىڭ «جاس دەسانتشىلار», قاراعاندى قالاسىنداعى تالعات بيگەلدينوۆ اتىنداعى «جاس ۇلان» رەسپۋبليكالىق مەكتەبىنىڭ كوماندالارى قاتىستى. ال اقتىق سىندا قازاقستان نامىسىن استانا قالاسىنىڭ ساعادات نۇرماعامبەتوۆ اتىنداعى اسكەري كوللەدج قورعادى, دەپ حابارلايدى Egemen.kz قر قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
«كۇشىمىز بىرلىكتە» اسكەري-دالالىق تاكتيكالىق ويىنى «ايبىن» X حالىقارالىق اسكەري-پاتريوتتىق جاستار جيىنىنىڭ شەشۋشى سايىسى بولدى.
گازتۇمىلدىرىقپەن, سۋ قۇيىلعان قۇتىمەن, كومپاسپەن, سانيتارلىق سومكەمەن جانە اۆتوماتتىڭ ماكەتىمەن جابدىقتالعان جاس جاۋىنگەرلەر باعدارلاۋ, ءتۇرلى كەدەرگىلەر مەن مينا-جارىلعىش توسقاۋىلداردى جانە ايماقتىڭ لاستانعان ۋچاسكەسىن ەڭسەرۋ داعدىلارىن كورسەتتى. سوڭعى كەزەڭدە كوماندالار جاۋدىڭ بارلاۋ-ديۆەرسيالىق توبىنىڭ تىرەك پۋنكتىن تاۋىپ, ونى بەيتاراپتاندىرۋ مىندەتىن ورىنداۋى كەرەك بولاتىن. ناتيجەسىندە, جەڭىس قاراعاندى قالاسىنداعى تالعات بيگەلدينوۆ اتىنداعى «جاس ۇلان» رەسپۋبليكالىق مەكتەبىنىڭ تاربيەلەنۋشىلەرىنە بۇيىردى.
وتكەن بەيسەنبىدە جۇگىرۋ مەن ارقان تارتىستان جارىستار ۇيىمداستىرىلدى. سونىمەن قاتار اسكەريلەندىرىلگەن ەستافەتا ءوتتى.
جاسوسپىرىمدەر اراسىندا 3 شاقىرىمعا جۇگىرۋدە وڭىرلەر اراسىنداعى كوماندالىق ەسەپتە ءبىرىنشى ورىندى الماتى قالاسىنىڭ قۇراماسى, اسكەري بولىمدەر جانىنداعى اسكەري-پاتريوتتىق كلۋبتاردان اۋە قورعانىسى كۇشتەرىنىڭ «بەس قارۋ» كومانداسى, اسكەري وقۋ ورىندارى ىشىنەن الماتى قالاسىنداعى باۋىرجان مومىش ۇلى اتىنداعى «جاس ۇلان» رەسپۋبليكالىق مەكتەبى, مەملەكەتتەر اراسىندا قىرعىزستان يەلەندى.
ودان بولەك جەكە ەسەپتە وڭىرلەر اراسىنداعى جارىستىڭ وسى تۇرىندەگى ۇزدىك ناتيجەنى (10 مين. 39 سەك) الماتىلىق ءالي مادەنيەت كورسەتتى. اسكەري بولىمدەر جانىنداعى اسكەري-پاتريوتتىق كلۋبتار اراسىندا توتەنشە جاعدايلار مينيسترلىگىنىڭ «ب.ت. كەرىمباەۆ» اپك تاربيەلەنۋشىسى ءساتپاي بورانقۇلوۆ (10 مين. 30 سەك) وزدى. ەلىمىزدىڭ اسكەري وقۋ ورىندارى اراسىندا الماتى وبلىسىنىڭ «ارىستان» مامانداندىرىلعان ليتسەيىنەن ميراس ماۋتان 10 مين. 36 سەكۋندتا مارەگە جەتىپ, ۇزدىك اتاندى. بايقاۋعا قاتىسۋشى شەت مەملەكەتتەر قۇرامالارى اراسىنان قىرعىزستاندىق ازىمبەك مەدەتبەكوۆ (10 مين.54 سەك) جەڭىسكە جەتتى.
وڭىرلىك كوماندالاردان قىزدار اراسىندا ءبىر شاقىرىم قاشىقتىقتى جالپى ۋاقىتى 18 مينۋت 11 سەكۋندتا ەڭسەرگەن الماتى قالاسىنا ءبىرىنشى ورىن يەلەندى. بۇل جارىستا اسكەري بولىمدەردىڭ اسكەري-پاتريوتتىق كلۋبتار توبىندا قورعانىس مينيسترلىگى بىتىمگەرلىك وپەراتسيالار ورتالىعىنىڭ «حان سۇلتان» كومانداسى (18 مين.17 سەك.) جەڭىسكە جەتتى.
جەكە ەسەپتە اسكەري بولىمدەر كلۋبتارى ساناتىندا 3 مين. 9 سەك ناتيجەسىمەن ءبىرىنشى ورىندى توتەنشە جاعدايلار مينيسترلىگىنىڭ «ب. ت. كەرىمباەۆ» اپك وكىلى اليسا تروتنو جەڭىپ الدى. بايقاۋدان تىس ونەر كورسەتكەن وزبەكستاندىق سپورتشى رايحونا حامروەۆانىڭ ۋاقىت كورسەتكىشى – 3 مين. 18 سەك.
وڭىرلەر اراسىندا ارقان تارتىستا جامبىل وبلىسىنىڭ قۇراماسى ۇزدىك دەپ تانىلدى. اسكەري بولىمدەردىڭ اپك ىشىندە «وڭتۇستىك» وڭىرلىك قولباسشىلىعىنىڭ «بولاشاق» كومانداسى, وقۋ ورىندارىنان «ارىستان» مامانداندىرىلعان ليتسەيى, قاتىسۋشى مەملەكەتتەردەن بەلارۋس ەلىنەن كەلگەن مينسك سۋۆوروۆ اسكەري ۋچيليششەسىنىڭ كومانداسى جەڭىسكە جەتتى.
بەس كەزەڭدىك اسكەريلەندىرىلگەن ەستافەتا بايقاۋىنا قاتىسۋشىلار اك-74-ءتى بولشەكتەۋ جانە قۇراستىرۋ ءنورماتيۆىن ورىنداپ, گازتۇمىلدىرىق پەن جالپى اسكەري قورعانىس كوستيۋمىن كيۋدەن جارىستى. سىناقتارعا زاقىمدانعان جەردەن ءوتۋ, سىم قورشاۋ استىندا جورعالاۋ جانە ساداق اتۋ كىردى.
وڭىرلەر اراسىندا ەستافەتانىڭ بارلىق كەزەڭدەرىنەن وتۋدە اقمولا وبلىسىنىڭ قۇراماسى 4 مينۋت 40 سەكۋندتا ۇلگەرىپ, ۇزدىك ۋاقىت كورسەتتى. اسكەري بولىمدەردىڭ اسكەري-پاتريوتتىق كلۋبتارى ىشىندە قورعانىس مينيسترلىگى بىتىمگەرلىك وپەراتسيالار ورتالىعىنىڭ «حان سۇلتان» كومانداسى (4 مين.19.10 سەك) كوزگە ءتۇستى. وقۋ ورىندارىنىڭ اراسىندا اتىراۋ وبلىسىنىڭ «سارمات» مامانداندىرىلعان اسكەري مەكتەپ-ليتسەي-ينتەرناتىنىڭ تاربيەلەنۋشىلەرى (5 مين. 44 سەك) بار كەزەڭدەردە وزىپ شىقتى. قاتىسۋشى مەملەكەتتەر اراسىندا قازاقستان قۇراماسى جەڭىسكە جەتتى (4 مين. 31 سەك.).
«ايبىن» X حالىقارالىق اسكەري-پاتريوتتىق جاستار جيىنىنىڭ جابىلۋى جانە جەڭىمپازدار مەن جۇلدەگەرلەردى ماراپاتتاۋ ءراسىمى ەرتەڭ وتەدى.
قىرمىزى جۇماعاليقىزى,
ەۇۋ ستۋدەنتى