مەملەكەت باسشىسى قاسىم-جومارت توقاەۆ اقتوبە سۋ قويماسىنىڭ تاسىپ كەتۋىن الدىن الۋعا اتسالىسقان «قازۆودحوز» فيليالىنىڭ باقىلاۋشىسى, كرانشى شىڭعىستاۋ ابديەۆتى ماراپاتتادى. بۇل تۋرالى 2024 جىلدىڭ 20 ماۋسىمىندا قر سۋ رەسۋرستارى جانە يرريگاتسيا مينيسترلىگى مالىمدەدى, دەپ حابارلايدى Egemen.kz.
بۇعان دەيىن سۋ شارۋاشىلىعى جانە يرريگاتسيا ءمينيسترى نۇرجان نۇرجىگىتوۆ شىڭعىستاۋ ابديەۆكە العىس حات جولداعان ەدى. قازىرگى تاڭدا سۋ شارۋاشىلىعى ارداگەرى جاس ارىپتەستەرىنە كاسىپتىڭ قىر-سىرىن ۇيرەتىپ ءجۇر.
«شىڭعىستاۋ كيباش ۇلىنىڭ كاسىبيلىگى مەن كوپ جىلدىق تاجىريبەسى اقتوبە سۋ قويماسىنىڭ تولىپ كەتۋىنە جول بەرمەۋگە ىقپال ەتتى. وعان جانە سۋ تاسقىنى كەزىندە وبەكتىلەردە تاۋلىك بويى جۇمىس ىستەگەن بارلىق ماماندارعا توتەنشە جاعداي كەزىندە ماماندىققا ادالدىعى مەن جانقيارلىعى ءۇشىن العىس بىلدىرەمىن», دەپ اتاپ ءوتتى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
ەسكە سالايىق, كۇنى كەشە, 19 ماۋسىمدا اقوردادا سۋ تاسقىنىنا قارسى ءىس-شارالارعا بەلسەندى قاتىسقان ازاماتتاردى سالتاناتتى ماراپاتتاۋ ءراسىمى ءوتتى.
وسى جىلدىڭ ناۋرىز ايىنىڭ سوڭىندا شىڭعىستاۋ ابديەۆ پەن باسقا دا ماماندار (ەلەكتريك, ينجەنەر, مەحانيك جانە جول ديسپەتچەرلەرى) اقتوبە سۋ قويماسىنداعى ەكىنشى ق ۇلىپتى ىسكە قوسىپ, اشىپ, ونىڭ تولىپ كەتۋىنە جول بەرمەدى.
ول كەزدە شىڭعىستاۋ ابديەۆ زەينەتكەر ەدى. ول اقتوبە وبلىسىنداعى «قازۆودحوزدىڭ» وتىنىشىنە بىردەن جاۋاپ بەردى. زەينەتكەر جارتى ساعاتتىڭ ىشىندە اقاۋلاردى جويۋعا كومەكتەستى. 36 جىلدىق تاجىريبەسى بار مامان كرانعا وتىرىپ, ەكىنشى كلاپاندى اشتى. وسىلايشا, اقتوبە سۋ قويماسىنان قاجەتتى كولەمدەگى سۋدى دەر كەزىندە بوساتىپ, ونىڭ اسىپ كەتۋىنە جول بەرمەۋگە مۇمكىندىك تۋدى.
قىرمىزى جۇماعاليقىزى,
ەۇۋ ستۋدەنتى