الماتى وبلىسى ەسىك قالاسىنداعى ەڭبەكشىقازاق كوپسالالى ورتالىق اۋداندىق اۋرۋحاناسىنا قولىن ەتتارتقىش شايناپ كەتكەن 12 جاستاعى بالا ءتۇستى, دەپ حابارلايدى Egemen.kz.
انىقتالعانداي, زارداپ شەككەن بالا اناسىنا اسۇيدە كومەكتەسكەن, سول كەزدە ەلەكتروندى ەتتارتقىش بالانىڭ قولىن تارتىپ كەتكەن. دارىگەرلەردىڭ ايتۋىنشا, ناۋقاس اۋرۋحاناعا قولى ەتتارتقىشقا كەپتەلگەن كۇيىندە جەتكىزىلدى.
«بالا ەت تارتىپ وتىرعاندا قولىندا ماتادان تىگىلگەن قولعاپ بولعان. ەلەكتروندى ەتتارتقىش ماتانى وراپ اكەتىپ, بالانىڭ ساۋساقتارىن دا تارتىپ كەتكەن. ناتيجەسىندە حيرۋرگتار مەن تراۆماتولوگتار ناۋقاسقا شۇعىل وتا جاسادى», دەپ ءتۇسىندىردى ەڭبەكشىقازاق كوپسالالى ورتالىق اۋداندىق اۋرۋحاناسى ديرەكتورىنىڭ ەمدەۋ ءىسى جونىندەگى ورىنباسارى ديانا سۇلەيمانوۆا.
ايتا كەتەيىك, دارىگەرلەر بالانىڭ قولى مەن ەكى ساۋساعىن امان الىپ قالدى. بىراق قاتتى زاقىمدانعان ءۇش ساۋساقتى ساقتاپ قالۋ مۇمكىن بولمادى.
«بەس ساۋساقتىڭ ەكەۋى – باس بارماق پەن كىشكەنتاي ساۋساقتى امان الىپ قالدىق. وكىنىشكە قاراي, ءۇش ساۋساقتى ساقتاپ قالا المادىق, ەتتارتقىشتا ج ۇلىنىپ كەتكەن. بالا شوكتا بولدى. بىراق ەسىن بىلەدى, سۇراقتارعا دا جاۋاپ بەردى», دەپ تولىقتىردى دارىگەر.