توسكەيدە - مالى, توسەكتە - باسى قوسىلىپ جاتاتىن سىر مەن قىردىڭ بايىرعى بايلانىسى بۇگىندە بۇرىنعىدان دا بەتەر جاندانا تۇسكەن. سونىڭ ءبىر دالەلى ىسپەتتى, سەيسەنبىدە قىزىلوردا وبلىسى ارداگەرلەر كەڭەسىنىڭ توراعاسى سەرىك دۇيسەنباەۆ باستاعان 60-قا جۋىق ارداگەر جەزقازعان جەرىنە تابان تىرەدى.
« ۇلى عالىم قانىش يمانتاي ۇلى ساتباەۆتىڭ تۋعانىنا 125 جىل تولۋىنا وراي وبلىس باسشىلىعى ۇلىتاۋعا ارداگەرلەردىڭ ساپارىن ۇيىمداستىرۋعا ۇيتقى بولدى. بىزگە ارنايى جايلى اۆتوبۋس ءبولدى. ۇلىتاۋ - تاريحي ەسكەرتكىشتەرگە باي ولكە. ەجەلگى داۋىرلەردىڭ جادىگەرلەرى تۇنىپ تۇرعان ايماققا بۇرىن-سوڭدى جولى تۇسپەگەن ارداگەرلەرىمىز بۇل قامقورلىققا قۋانىپ قالدى. ماقساتىمىز - ەلمەن, جەرمەن تانىسۋ, ءبىلىسۋ, تاجىريبە الماسۋ», دەگەن سەرىك ءابىش ۇلى ۇلىتاۋلىق ازاماتتارعا قۇشاق جايا قارسى العانى ءۇشىن العىس ءبىلدىردى.
ەلىمىزگە تانىمال جىراۋ ءادىلحان قۋاڭباەۆ سىر ەلىنىڭ جۇرەكجاردى سالەمىن ارناۋمەن جەتكىزدى.
قىزىلوردالىق ارداگەرلەردىڭ قۇرمەتىنە جايىلعان داستارحاندا ولاردىڭ ساپارلارىنا وبلىس اكىمى بەرىك ابدىعالي ۇلى, وبلىستىق ارداگەرلەر كەڭەسىنىڭ توراعاسى ساعىندىق قوجامسەيىتوۆ, وبلىس پروكۋرورى جاسۇلان ەلامانوۆ, «قازاقمىس» كورپوراتسياسى» جشس جانىنداعى ارداگەرلەر كەڭەسىنىڭ توراعاسى تولەگەن بۇكىروۆ, ق.ساتباەۆ اتىنداعى مۋزەيدىڭ ديرەكتورى كەنجال بالكەنوۆ ساتتىلىك تىلەدى.
ارداگەرلەردىڭ اراسىنداعى ەڭ ۇلكەن اقساقال, سەكسەننىڭ سەگىزىندەگى سەرالى الىمباەۆ اقساقال: «جاسىمنىڭ ۇلعايىپ قالعانىنا قاراماستان ۇلىتاۋدى كورىپ, تاريحي ورىنداردى ارالاعىم كەلدى. سونداي مۇمكىندىك تۋعىزعان قىزىلوردا وبلىسىنىڭ اكىمى نۇرلىبەك نالىباەۆ, بىزدەردى قۇراق ۇشا قارسى العان ۇلىتاۋ وبلىسىنىڭ اكىمى بەرىك ابدىعالي ۇلى باستاعان ازاماتتارعا العىسىم شەكسىز. ەكى ەلدىڭ ىنتىماقتى, بىرلىكتى مۇرات تۇتقان تىرلىكتەرى تابىستى بولا بەرسىن», دەپ اق باتاسىن بەردى.
جەزقازعان