اۋىلدىڭ باسكوتەرەر ازاماتتارى بىرىگىپ, يەلەرى كوشىپ كەتكەن سوڭ بوساپ قالعان, جۋان قاراعايدان قيىپ سالعان, ەڭسەلى, ءتورت بولمەلى ءۇيدى ساتىپ الىپ, مەشىتكە ىڭعايلاپ قايتا جابدىقتاعان ەكەن. اتشاپتىرىم جەردەن مەنمۇندالاپ تۇراتىن مۇناراسىن دا ورناتىپتى. ماڭايى تاپ-تازا, ادەمىلەپ قورشالعان. نەسى بار, يماندى شارۋا. مەشىت ماسەلەسى شەشىلگەنىمەن, يە بولاتىن ادام كەرەك. ونداي كىسى شىعا قويماعان سوڭ اۋدان ورتالىعىنان ءدىني ساۋاتتى, ءبىلىمدى جاس جىگىتتى ات-تۇيەدەي قالاپ, شاقىرتىپ الىپتى.
قۇربان ايتتا اۋىلعا باردىق. زيرات باسىندا جاڭاعى جاس مولدا ءجۇر ەكەن. ءوتىنىش ايتقان جاماعاتتىڭ ءسوزىن جەردە قالدىرماي, قۇران باعىشتاپ ءجۇر. اتا كورشى جانىبەك قۇربان شالعان ەكەن, «ات باسىن بۇرا كەت, ءدام تاتاسىڭ» دەپ شاقىردى. باردىق. ەرتەرەكتە اۋىلدىڭ اقساقال, قاراساقالى ءتورت-بەس تاباق بولاتىن, قازىر الپىستى القىمداپ قالعاندار ەكى-اق تاباق قانا. ەڭ ۇلكەنى ەسەنباي اقساقال. اڭگىمەنىڭ ءالىبى – قۇربان ايتى.
ءبىر كەزدە ەلگە يەلىك ەتىپ وتىرعان ەسەنباي اقساقال مولدا بالا مۇراتتىڭ كۇن كورىسى تۋرالى اڭگىمە ساباقتادى. جالاقى الماعاننان كەيىن بوتەن اۋىلدا تۇرىپ, باۋىر باسىپ كەتۋى دە قيىن ەكەندىگى ايتىلدى.
– قازاق بالاسى نەگىزى باۋىرمال, قايىرىمدى حالىق قوي, – دەدى ەسەنباي اقساقال شوقشا ساقالىن تارامداپ, سيپالاي وتىرىپ, – مەن ءبىر سيىرىمدى بەرەمىن, ءسۇتى بۇلاقتاي. ساۋىپ ءىش. بۇرىنعىلار مۇنداي كومەكتى شۇلەن تاراتۋ دەسە كەرەك, قازىر ۇمىتىلعان ءداستۇر. باياعىنىڭ بايلارى توڭىرەگىندەگى جوق-جىتىككە ساۋىن سيىر, اتتىڭ مايىن بەرگەن. كەڭەس زامانىنىڭ كەسىر ساياساتى باي مەن باعلاندى قۇبىجىق ەتىپ كورسەتتى عوي, ايتپەسە ولار دا ەل ىشىندەگى بەرەكەنى ويلامادى دەيسىز بە؟ ءبىز بۇگىن ورتامىزعا كەلىپ وتىرعان وسى ازاماتتى قامقورلىعىمىزعا الساق, ەلدىگىمىزدىڭ بەلگىسى ەمەس پە؟
اقساقالدىڭ وڭ ءسوزىن داستارقان باسىنداعى جۇرت قوستاي جونەلدى. بىرەۋ ساۋلىق, بىرەۋ توقتى اتادى. قۇرداستارى جىلقىلى باي دەپ ءاجۋالايتىن قاناتبەك اعا ءسۇتىن ساۋىپ ىشۋگە بيە بەرەتىن بولدى. ءاپ ساتتە مۇرات مولدانىڭ قاڭىراپ تۇرعان قوراسى ءتورت ت ۇلىككە تولدى دا قالدى.
ءدام قايىرعان سوڭ جولعا شىقتىق. جول بويى حالىقتىڭ ىقىلاسىنا كوڭىلىمىز تولىپ, ءتانتى بولىپ بارا جاتىر ەدىك. شۇلەن تاراتۋ دەگەندى بۇرىن دا ەستىگەنمىن. الدەبىر ورىنسىز مىرزالىق, ىسىراپقا ايتىلاتىن ءسوز شىعار دەپ ويلاۋشى ەدىم. سويتسەم, استىنداعى جالعىز اتىن جولاۋشىعا ءتۇسىپ بەرەتىن ءمارت قازاقتىڭ تابيعاتىن كورسەتەتىن تاعىلىمدى ءسوز, تاماشا جوسىق ەكەن عوي. اۋىلدىڭ وسى ءبىر اڭقىلداعان پەيىلىنەن اينالايىن دەپ كۇبىرلەدىم ىشتەي.