كەيىنگى جىلدارى ەلىمىزدە مەملەكەت باسشىسىنىڭ تاپسىرماسىمەن مادەنيەت سالاسىن ىلگەرىلەتۋ اياسىندا بىرقاتار باستاما قولعا الىندى. ونىڭ ىشىندە حالىقارالىق مادەني ىنتىماقتاستىقتى دامىتۋ ءىس-شارالارى دا بار. ماسەلەن, جۋىردا مادەنيەت سالاسىنىڭ قىزمەتكەرلەرى كەزەكتى رەت فرانتسيا, گەرمانيا, يتاليا, وڭتۇستىك كورەيا, قىتاي, اقش, تۇركيا, اۋستريا, ۆەنگريا, گرۋزيا جانە باسقا ەلدەردىڭ جەتەكشى الەمدىك مادەني ورتالىقتارىندا بىلىكتىلىگىن ارتتىرىپ, وقىپ كەلدى. الماتى اكىمدىگىنىڭ مالىمەتىنشە, ولار – كىتاپحاناشى, مۇراجايتانۋشى, مۇراعاتشى, حايۋاناتتار باعىنىڭ ۆەتەرينارى, تسيرك جانە تەاتر ارتىستەرى.
سونداي-اق مەگاپوليستىڭ مادەني نىساندارى 100% رەنوۆاتسيالىق جاڭارۋدان وتكىزىلمەك. قىزمەتكەرلەر تەوريادا دا, پراكتيكادا دا زاماناۋي ستاندارتتار مەن كليەنتكە باعىتتالعان كوممۋنيكاتسيانى زەرتتەۋگە باسا نازار اۋدارا وتىرىپ, جاڭا داعدىلار مەن قۇزىرەتتەرگە يە بولادى.
حالىقارالىق تاجىريبە بارىسىندا مۋزەي قىزمەتكەرلەرى فرانتسيانىڭ ۇلتتىق ەسكەرتكىشتەر ورتالىعىندا ءبىلىم الىپ, «Musée du Louvre» جۇمىس ادىستەرىن زەرتتەدى.
ال الماتىلىق كىتاپحاناشىلار سەۋل كىتاپحانالارىندا «Gachon University», «Namsan Public Library», «Starfield Library», «Nlcy», «Seoul Women's University Library» جانە «Chung Ang University Library» سىندى تاعىلىمدامادان ءوتتى.
الماتى تسيركىنىڭ ارتىستەرى العاش رەت بەيجىڭ حالىقارالىق اكروباتيكا مەكتەبىندە جانە رەسەي تەاتر ونەرى ينستيتۋتى – گيتيس-تە بىلىكتىلىكتەرىن ارتتىردى.
«مادەنيەت سالاسىنىڭ قىزمەتكەرلەرى العاش رەت وسىنداي بىرەگەي مۇمكىندىككە يە بولدى. الەمنىڭ جەتەكشى مادەني ورتالىقتارىنىڭ قابىرعاسىندا وقىپ, كاسىبي داعدىلارىن جەتىلدىردى. قالا اكىمى ەربولات دوساەۆ اتالعان سالانى دامىتۋعا ەرەكشە كوڭىل بولەدى. بۇل اۋقىمدى ءىس-شارالاردى وتكىزۋ, مادەنيەت نىساندارىن جاڭعىرتۋ قىزمەتكەرلەردىڭ وي-ءورىسىن دامىتۋعا ءسوزسىز اسەر ەتەدى. تسيرك جانە جەرگىلىكتى تەاتر ارتىستەرى, مۇراجايتانۋشى مەن كىتاپحاناشىلار, سونداي-اق حايۋاناتتار باعى مەن مۇراعات قىزمەتكەرلەرى – كەيىنگى ەكى جىلدا 200-گە جۋىق مامان شەتەلدە وقىپ كەلدى», دەيدى الماتى قالاسى مادەنيەت باسقارماسىنىڭ وكىلى.
ايتا كەتەيىك, اتالعان سالا قىزمەتكەرلەرىنىڭ بىلىكتىلىگىن ارتتىرۋ ەل مادەنيەتى مەن ءتۋريزمىنىڭ دامۋىنا قاي جاعىنان دا ءتيىمدى. ماسەلەن, 2023 جىلى تۋريزم سەكتورى مەگاپوليس بيۋدجەتىنە 71,7 ملرد تەڭگەدەن استام سالىق تۇسىمدەرىن اكەلگەن. ياعني بىلتىر الماتىعا 2 ميلليون تۋريست كەلدى. بۇل – بۇرىن-سوڭدى بولماعان رەكوردتىق كورسەتكىش.