سەناتتاعى الەۋمەتتىك-مادەني دامۋ جانە عىلىم كوميتەتىنىڭ دەپۋتاتتارى «فارماتسەۆتيكا سالاسىنىڭ جاعدايى مەن دامۋ پەرسپەكتيۆالارى» تاقىرىبىنا ارنالعان دوڭگەلەك ۇستەل وتكىزۋ اياسىندا قاراعاندى فارماتسەۆتيكا كەشەنىنە باردى, دەپ جازادى Egemen.kz.
كوميتەت توراعاسى نۇرتورە ءجۇسىپ شارانىڭ ماقساتى – «قاراعاندى فارماتسەۆتيكا كەشەنى» جشس قىزمەتىمەن تانىسۋ, فارماتسەۆتيكا سالاسىنىڭ جاي-كۇيى مەن دامۋ كەلەشەگىنە تالداۋ جۇرگىزۋ جانە وزەكتى ماسەلەلەردى تالقىلاۋ ەكەنىن اتاپ ءوتتى.
دەپۋتاتتارعا قازاقستانداعى فارماتسەۆتيكا نارىعىندا 80-نەن استام وتاندىق ءوندىرۋشىنىڭ بار ەكەنى, ونىڭ جارتىسىنان ازى دارىلىك زاتتار وندىرۋمەن اينالىساتىنى ايتىلدى. جالپى, وتاندىق فارماتسەۆتيكا سالاسىنداعى كاسىپكەرلەر 900-گە جۋىق دارىلىك زاتتار مەن مىڭنان استام مەديتسينالىق بۇيىم شىعاراتىنى بەلگىلى بولدى.
«بۇل كەزدەسۋدىڭ نەگىزگى مىندەتى – حالىقتى قاۋىپسىز, ءتيىمدى جانە ساپالى دارىلىك زاتتارمەن, مەديتسينالىق بۇيىمدارمەن قامتاماسىز ەتۋدەگى وزەكتى ماسەلەلەردى تالقىلاۋ, سونداي-اق وتاندىق فارماتسەۆتيكا سالاسىنىڭ اعىمداعى جاي-كۇيىمەن جانە ءوندىرىس بارىسىمەن تانىسۋ ەدى. بۇگىنگى تالقىلاۋدىڭ ناتيجەسى الداعى دوڭگەلەك ۇستەلگە دايىندىق كەزىندە ەسكەرىلەتىن بولادى, بۇل حالىقتى ساپالى مەديتسينالىق پرەپاراتتارمەن جانە بۇيىمدارمەن قامتاماسىز ەتۋدە نەعۇرلىم ءتيىمدى شارالار ازىرلەۋگە مۇمكىندىك بەرەدى», دەدى سەناتور نۇرتورە ءجۇسىپ.