ويىل, جەم جانە جايىق وزەنىندەگى سۋ دەڭگەيى تومەندەگەنىمەن, ونىڭ زاردابى ءالى تولىق جويىلعان جوق. تاسقىن سۋدىڭ سالدارىنان كەيبىر ءبىلىم وردالارى ساباقتى ونلاين رەجىمدە وتكىزۋگە ءماجبۇر بولدى.
اتىراۋ وبلىستىق ءبىلىم باسقارماسى مەكتەپكە دەيىنگى جانە ورتا ءبىلىم بەرۋ ءبولىمىنىڭ باس مامانى دينا ستامعاليدىڭ ايتۋىنشا, وقۋ-اعارتۋ مينيسترلىگىنىڭ شەشىمىمە سايكەس ماحامبەت اۋدانىندا بارلىق مەكتەپتىڭ, جىلىوي اۋدانىنداعى 4 ءبىلىم ورداسىنىڭ وقۋشىلارى ارالىق جانە قورىتىندى ەمتيحانداردان بوساتىلدى. الايدا 11-سىنىپ وقۋشىلارى ۇبت تاپسىرۋدان بوساتىلعان جوق. ال 9-سىنىپتى بىتىرگەننەن كەيىن وقۋىن كوللەدجدە جالعاستىرۋعا نيەتتى وقۋشىلار قابىلداۋ ەمتيحانىن تاپسىرۋى كەرەك.
وبلىستىق ءبىلىم باسقارماسى ءباسپاسوز قىزمەتىنىڭ مالىمەتىنشە, بيىلعى وقۋ جىلىن 204 مەكتەپتىڭ 149 187 وقۋشىسى اياقتادى. ونىڭ ىشىندە 9-سىنىپتىڭ 12 700 وقۋشىسى بار. ءبىلىم وردالارىنداعى 11-سىنىپتى 6 مىڭعا جۋىق تۇلەك بىتىرەدى. ءبىلىم ورداسىمەن قوشتاساتىنداردىڭ اراسىندا 125 تۇلەك «التىن بەلگى», ال 329 وقۋشى «ۇزدىك اتتەستات» الۋعا ءۇمىتتى.
جىلىوي اۋداندىق ءبىلىم ءبولىمىنىڭ باسشىسى گۇلجانسارا تاڭاتاروۆانىڭ مالىمەتىنشە, مۇندا جالپى ءبىلىم بەرەتىن 20 ورتا مەكتەپ بار. مەكتەپتىڭ دەنى تاسقىن سۋدان زارداپ شەككەن قۇلسارى قالاسىندا ورنالاسقان.
«بيىل اۋدانداعى ءبىلىم وردالارىن 684 تۇلەك بىتىرەدى. ال 9-سىنىپتى بىتىرەتىن 1606 وقۋشى بار. بۇل وقۋشىلاردىڭ 30 پايىزى وقۋىن كوللەدجدەردە جالعاستىرۋعا ۇيعارىم جاسادى. مەكتەپ بىتىرەتىن تۇلەكتەردىڭ باسىم بولىگى ۇبت تاپسىرۋعا شەشىم قابىلداپ وتىر. قازىر 617 تۇلەك ۇبت تاپسىرۋ ءۇشىن ءوتىنىش بەردى. ءبىر تۇلەك دەنساۋلىعىنا بايلانىستى اتىراۋ وبلىستىق ءبىلىم باسقارماسى باسشىسىنىڭ بۇيرىعىمەن مەملەكەتتىك ەمتيحاننان بوساتىلدى», دەيدى گۇلجانسارا تاڭاتاروۆا.
ءبىلىم باسقارماسىنىڭ ءباسپاسوز قىزمەتى ءمالىم ەتكەندەي, 5252 تۇلەك ۇبت تاپسىرۋعا ءوتىنىش بەرىپ وتىر. اتىراۋ جانە قۇلسارى قالاسىندا ۇبت پۋنكتتەرى بار. تاسقىن سۋدان زارداپ شەككەن وبلىستاردىڭ بىرىندە تۇرعانىمەن, اتىراۋلىق تۇلەكتەر وزگە وڭىرلەردەگى قاتارلاستارى سەكىلدى بارشاعا ورتاق تارتىپپەن ۇبت تاپسىرادى.
بۇل ورايدا مۇنايلى ءوڭىر تۇلەكتەرىنە الابوتەن جەڭىلدىك جاسالىپ وتىرعان جوق. دەگەنمەن عىلىم جانە جوعارى ءبىلىم مينيسترلىگى پرەزيدەنت قاسىم-جومارت توقاەۆتىڭ تاپسىرماسىنا سايكەس ح.دوسمۇحامەدوۆ اتىنداعى اتىراۋ ۋنيۆەرسيتەتىندە قازاقستان جوعارى وقۋ ورىندارىنىڭ اۋقىمدى كورمەسىن وتكىزدى. ماقسات – اتىراۋ وبلىسىنىڭ جاستارىنا بولىنگەن نىسانالى ءبىلىم گرانتتارى تۋرالى اقپارات بەرۋ. كورمەگە العاشقى كۇنى اقپارات الۋعا 2 مىڭعا جۋىق تالاپكەر كەلدى.
«اتىراۋ وبلىسىنىڭ تالاپكەرلەرى ءۇشىن 1200 ءبىلىم گرانتى ءبولىندى. بيىل ماماندىقتاردىڭ سانى ارتىپ, ءبىلىم گرانتتارى 9 باعىتتى قامتىپ وتىر. اتىراۋ ءوڭىرىنىڭ تۇلەكتەرى ءۇشىن ماماندىق تاڭداۋدىڭ مۇمكىندىگى كوبەيدى. بۇل كورمەدە بىلىكتى ماماندار تالاپكەرلەرگە ماماندىقتى ءساتتى تاڭداۋدىڭ جولىن كورسەتىپ, نارىقتاعى سۇرانىسقا يە سالالار تۋرالى كەڭەس بەردى. جوعارى وقۋ ورىندارى تۋرالى تولىققاندى مالىمەت ۇسىندى», دەدى ءمينيستردىڭ كەڭەسشىسى رۋسلان ەمەلباەۆ. ونىڭ ايتۋىنشا, مينيسترلىك باتىستاعى, سونداي-اق حالىق تىعىز قونىستانعان, جاڭادان قۇرىلعان وڭىرلەردىڭ تالاپكەرلەرىنە 5 مىڭ گرانت ءبولىپ وتىر. وسىعان بايلانىستى اتىراۋداعى كورمە اياسىندا «گرانت تۇرلەرى جانە تالاپكەردىڭ جول كارتاسى» تاقىرىبىنداعى كاسىبي باعدار بەرۋ سەمينارى ءوتتى.
اتىراۋ وبلىسى