ولجاس بەكتەنوۆ سۋ تاسقىنىنان زارداپ شەككەندەرگە سالىنىپ جاتقان ءۇي قۇرىلىسىن تەكسەردى

پرەمەر-مينيستر ساپار اياسىندا ايماقتاعى سۋ تاسقىنىنان زارداپ شەككەندەرگە سالىنىپ جاتقان ۇيلەردىڭ ساپاسىن تەكسەردى.

ول پەتروپاۆل قالاسىنداعى بىرلىك ىقشام اۋدانىندا جاڭادان بوي كوتەرگەن ءۇيدى ارالاپ, جاڭا باسپانا كىلتىن العان وتباسى مۇشەلەرىمەن دە اڭگىمەلەستى. ولجاس بەكتەنوۆ اۋقىمدى سۋ تاسقىنىنىڭ سالدارىن جويۋدا تۇسىنىستىك تانىتىپ, كومەكتەسكەنى ءۇشىن تۇرعىندارعا العىسىن ءبىلدىردى.

«پرەزيدەنت قاسىم-جومارت توقاەۆ سۋ تاسقىنىنان زارداپ شەككەن ازاماتتاردىڭ بارلىعىنىڭ باسپاناسىن قالپىنا كەلتىرۋ ماسەلەسىن ەرەكشە باقىلاۋدا ۇستاپ وتىر. سولتۇستىك قازاقستان وبلىسى قالاداعى سۋ باسقان ىقشام اۋداندارداعى ۇيلەردىڭ قۇرىلىسىن العاشقىلاردىڭ ءبىرى بولىپ اياقتادى. ءبىزدىڭ باستى مىندەتىمىز – زارداپ شەككەندەردىڭ بارلىعىن سۋىق تۇسكەنگە دەيىن ۇيلەرىنە كوشىرۋ», دەدى ولجاس بەكتەنوۆ.

ۇكىمەت باسشىسى اكىمدىككە سالىنىپ جاتقان ۇيلەردىڭ ماڭىن اباتتاندىرۋدى قوسا تاپسىردى.

وڭىردە بارلىعى 700 ءۇي مەن 90 ورىندىق بالاباقشا سالىنىپ جاتىر. جاقىندا عانا وتباسىلارعا 53 ۇيدىڭ كىلتى بەرىلدى. ماۋسىم ايىنىڭ سوڭىنا دەيىن تاعى 47 ۇي بەرۋ جوسپارلانسا, 600 ۇيدىڭ قۇرىلىسى بيىلعى تامىز ايىنىڭ سوڭىنا دەيىن اياقتالادى دەپ جوسپارلانعان. 

سونداي-اق ساپار بارىسىندا ولجاس بەكتەنوۆ قالپىنا كەلتىرۋگە بولاتىن ۇيلەردى جوندەۋ جۇمىستارىمەن تانىستى. سولتۇستىك قازاقستان وبلىسى – سۋ تاسقىنى سالدارىن جويۋعا مەحانيكالاندىرىلعان بريگادالار تارتىلعان جالعىز ءوڭىر. ماسەلەن, تەك ويقالا ىقشام اۋدانىندا 1 133 ءۇي سۋ باسۋ ايماعىندا بولدى, ونىڭ 309-ى جوندەۋدى قاجەت ەتەدى. جۇمىستاردى 24 مەحبريگادا كەزەڭ-كەزەڭىمەن ورىنداپ جاتىر, پەتروپاۆل بويىنشا وسىنداي 85 قۇراما بار.