جالپى, تالانتتى ادامداردىڭ تابيعاتى ەرەكشە. بولمىستارى دا قاراپايىم جۇرتتان تىم بولەك. شىعارماشىل جاننىڭ ەشبىر شەڭبەرگە سىيمايتىن بۇل «بوتەن» مىنەزى بىرەۋگە قىزىق, بىرەۋگە وعاش, ەندى بىرەۋگە ۇلگى, بىرەۋگە كۇلكىلى كورىنەدى. ال ءدال وسىنداي تيپتەگى ادامداردا نەلىكتەن ءدال وسىنداي «بىرتۇرلىلىك» بولاتىنىن ەشقانداي عىلىم ءالى زەرتتەپ تاپقان جوق. بار انىقتاماسى, ول – ونەر ادامى.
ەت جەمەيدى, بالكوندا ۇيىقتايدى
سۋرەتشى يليا رەپين ەت جەمەيتىن. ۆەگەتارياندىق ۇستانىمىنا بەرىك بولعانى سونشالىق, ۇيىنە قوناق كەلسە دە داستارحانعا ەت قويمايدى. دەسە دە ءۇي يەسىنىڭ بۇل ەرەجەسىنەن ايلاسىن اسىرعان قوناقتار ەتتى تاعامداردى تىعىپ اكەلەدى. تۇندە سۋرەتشىدەن جاسىرىپ جەۋ دە قيىن ەمەس ەدى. ويتكەنى رەپين ارقاشان تازا اۋادا, بالكوندا ۇيىقتايتىن. قىستا دا, جازدا دا.
قالتادا – قارۋ
ءوزى بۇزىق, ءوزى ەركە پابلو پيكاسسو ۇيقى مەن گيگيەناداعى ءبىرتۇرلى عادەتتەرىمەن كوزگە تۇسپەدى. بىراق يسپاندىق سۋرەتشى سەرۋەنگە شىققاندا ىلعي رەۆولۆەرىن الىپ, قالتاسىنا سالىپ ءجۇرىپتى. ال تاڭعا جۋىق باتو-لاۆۋارعا ورالعاندا قىزىق ءۇشىن اسپانعا وق اتادى. نەگىزىندە ونى تۇسىنۋگە بولادى.
كىلت ۇستاعان دالي
ۇيقى – جالپىعا ورتاق رەجىم. ءبارىمىز كوزىمىزدى جۇمىپ, بىردەي ۇيىقتايتىن سياقتى كورىنەمىز. بىراق, شىن مانىندە, اركىم ءارتۇرلى ۇيىقتايدى. اسىرەسە شىعارماشىل جاندار ءۇشىن ۇيقى – ءوز الەمىندەگى قىزىق ءبىر كەڭىستىك سىندى. ماسەلەن, ءوز زامانىنىڭ ەڭ ءبىرتۇرلى ادامدارىنىڭ ءبىرى – سالۆادور دالي قاراپايىم ادام سياقتى ۇيىقتاي المايتىن. سۋرەتشى كوبىنەسە قولىنا كىلت ۇستاپ, توسەككە جاتاتىن. دەنەسى بوساپ, شىنداپ ۇيقىعا كەتكەندە كىلت قولىنان ءتۇسىپ, دىبىسىنان وياناتىن بولعان. بۇل ەشقانداي مازوحيزم ەمەس. بۇل – شىعارماشىلىققا دەگەن سۇيىسپەنشىلىك. ويتكەنى سالۆادور دالي وسىلايشا كورگەن ءتۇسىن قاعازعا ءتۇسىرىپ, ودان شابىت الىپ, تاعى ءبىر شەدەۆر جاساي الدى.
ءتورت ساعاتتا – 20 مينۋت
ۇيقى دەگەندە لەوناردو دا ءۆينچيدى دە ايتپاي كەتە المايمىز. ونىڭ ۇيقى جۇيەسى راسىندا دا مازوحيزمگە ۇقسايدى. سۋرەتشى وزىنە ءار ءتورت ساعات سايىن 20 مينۋت ۇيىقتاۋعا رۇقسات بەردى. بۇل, ارينە, ءونىمدى جۇمىس ىستەۋدىڭ امالى. دا ۆينچيگە قاتىستى بۇل اقپاراتتىڭ قانشالىقتى شىندىققا سايكەس كەلەتىنى بەلگىسىز. ول ءومىر بويى وسىلاي ۇيىقتادى ما, الدە مۇنداي تاجىريبەلەردى قيىن ساتتەردە دە عانا قولداندى ما؟ جۇمباق.
ۇزاق جاساۋدىڭ «سىرى»
ال جەكە گيگيەنا ءار ادام ارقاشان ساقتاۋى كەرەك جالپىادامزاتتىق ىسكە جاتادى. دەيمىز عوي. بىراق يتاليالىق ءمۇسىنشى ميكەلاندجەلو بارشاعا بەلگىلى بۇل ۇستانىمنان تىم الشاق بولدى. ول ۇنەمى ەتىكپەن, كيىممەن ۇيىقتايتىن. ءتىپتى ونىسىن بىرنەشە اپتا بويى اۋىستىرماي جۇرە بەرەتىن. ال جۋ دەگەندى مۇلدەم اتاماڭىز. ويىنا دا كەلمەگەن.
سويتكەن ايگىلى ميكەلاندجەلو 87 جاس جاسادى. ءمۇسىنشىنىڭ ۇزاق ءومىر ءسۇرۋىنىڭ قانشالىقتى گيگيەنامەن بايلانىستى ەكەنىن بىلمەيمىز, بىراق بۇل ءبىر كۇلكىلى كەزدەيسوقتىق ەكەن.
تىم شىنايى سۋرەتشى
كاراۆادجو شىعارماسىنىڭ شىنايى شىعۋىنا تىرىسقانى سونشالىق, «لازاردىڭ ءتىرىلۋى» كارتيناسىندا ولگەن ادامدى پايدالانعان. سۋرەتشى زيرات قىزمەتكەرلەرىنە ءۇش كۇن بۇرىن جەرلەنگەن ادامنىڭ دەنەسىن قازىپ الۋدى تاپسىرعان. ءدال وسى جۇمىسشىلار ولگەن ادامدى سۋرەتشىگە كەرەكتى فورمادا ۇستاپ تۇرعان. ال كاراۆادجو ەش الاڭسىز قىلقالامىن قولىنا الىپ, شابىتتانا ىسكە كىرىستى.
ارينە, ونەر قۇرباندىقتى تالاپ ەتەدى. ەڭ باستىسى, شىعارماشىلىق ءۇشىن ەشكىمدى ولتىرمەگەن ابزال.