كەڭەس وداعىنىڭ باتىرى, حالىق قاھارمانى تاۋەلسىز قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆتىڭ 100 جىلدىعىنا ارنالعان ءىس-شارانىڭ سالتاناتتى اشىلۋى داڭقتى مايدانگەر, اسا كورنەكتى اسكەري قولباسشىنىڭ ەسىمىمەن اتالاتىن قۇرلىق اسكەرلەرىنىڭ اسكەري ينستيتۋتىندا وتەدى, دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
جيىن 16-22 ماۋسىم ارالىعىندا ء«الي» پوليگونىندا ۇيىمداستىرىلادى. وتكەن جىلى وعان الاڭ يەلەرى - قازاقستانمەن بىرگە ازەربايجان, وزبەكستان ەلدەرىنىڭ وكىلدەرى عانا قاتىسقان بولسا, بيىل بۇل تىزىمگە بەلارۋس, قىرعىزستان, رەسەي كوماندالارى قوسىلادى. بۇل اسكەري-پاتريوتتىق جيىنعا قىزىعۋشىلىقتىڭ ارتىپ كەلە جاتقانىن اڭعارتادى.
ەلىمىزدىڭ تۇكپىر-تۇكپىرىنەن جيىنعا قارۋلى كۇشتەر, باسقا دا اسكەرلەر مەن اسكەري قۇرالىمدارى اسكەري-پاتريوتتىق كلۋبتارىنىڭ, ارميا گەنەرالى ساعادات نۇرماعامبەتوۆ اتىنداعى قورعانىس مينيسترلىگى اسكەري كوللەدجىنىڭ, «جاس ۇلان» رەسپۋبليكالىق مەكتەپتەرىنىڭ, «ارىستان» مامانداندىرىلعان ليتسەيىنىڭ, وبلىستىق اسكەري مەكتەپ-ينتەرناتتاردىڭ تاربيەلەنۋشىلەرى قاتىسادى. جالپى سانى جيىندا 14-17 جاس ارالىعىنداعى 750 ۇل مەن قىز بابى مەن باعىن تالاستىرادى.
ايبىندىقتار اك-74 اۆتوماتىن تولىق بولشەكتەۋ جانە قۇراستىرۋ, پنەۆماتيكالىق ۆينتوۆكادان اتۋ, بەلتەمىردە تارتىلۋ, دەنەنى شالقاسىنان جاتىپ كوتەرۋ, ارقان تارتۋ, 1000 جانە 3000 مەتر قاشىقتىققا جۇگىرۋ, اسكەريلەندىرىلگەن ەستافەتا جانە «كۇشىمىز بىرلىكتە» اسكەري-دالالىق تاكتيكالىق ويىندارىندا سىنعا تۇسپەك. سونداي-اق «ايبىن دارىنى» زياتكەرلىك ويىنى جانە «ايبىن جۇلدىزى» شىعارماشىلىق بايقاۋى ۇيىمداستىرىلادى.
اسكەري-پاتريوتتىق جيىنعا قاتىسۋشىلار ءۇشىن كونتسەرتتەر, دارىستەر, سپورتتىق ويىندار, وت جاعۋ كەشتەرى جانە ارميا گەنەرالى ساعادات نۇرماعامبەتوۆ تۋرالى فيلمدەر كورسەتىلىمى بار قىزىقتى باعدارلاما دايىندالعان. سونىمەن بىرگە اسكەري تەحنيكا, جابدىقتار, سپورتتىق م ۇلىكتەر مەن ستەندتەر جانە كلۋبتاردىڭ قىزمەتى تۋرالى كورمە ازىرلەنەدى.
جيىن ۇلتارالىق جانە حالىقارالىق دوستىقتى نىعايتۋعا, اسكەري-پاتريوتتىق تاربيەنى جەتىلدىرۋگە, اسكەري قىزمەتتى تانىمال ەتۋگە جانە قارۋلى كۇشتەردىڭ ءيميدجىن ارتتىرۋعا باعىتتالعان.