پارلامەنت ءماجىلىسى «قازاقستان ۇكىمەتى مەن قىتاي ۇكىمەتى اراسىنداعى مادەني ورتالىقتاردى ءوزارا قۇرۋ تۋرالى كەلىسىمدى راتيفيكاتسيالاۋ تۋرالى» زاڭدى قابىلدادى, دەپ حابارلايدى Egemen.kz.
كەلىسىم 2023 جىلعى 27 قاراشادا استانادا جاسالعان. قۇجات مەملەكەت باسشىلارىنىڭ قىتاي مەن قازاقستاندا تەڭدەستىرىلگەن نەگىزدە مادەني ورتالىقتار قۇرۋ تۋرالى كەلىسىمى اياسىندا ازىرلەندى.
«وزدەرىڭىز بىلەتىندەي, پرەزيدەنتتىڭ قىتايمەن دوستىق پەن ارىپتەستىككە نەگىزدەلگەن ساياساتىنىڭ اياسىندا قازىر بىرقاتار ۇلكەن باستاما كوتەرىلىپ وتىر. سونىڭ ءبىرى - استانا مەن بەيجىڭدە ءوزارا مادەني ورتالىقتار اشۋ تۋرالى شەشىم. وسى ورايدا قازاقستاننىڭ قىتايداعى مادەني ورتالىعى تاريحىمىزدا العاش رەت ۇلتىمىزدى اسپان استى ەلىنە كەڭىنەن تانىتۋدىڭ, ەكى ەل اراسىنداعى رۋحاني بايلانىستى جاڭا دەڭگەيگە كوتەرۋدىڭ, ءوزارا حالىقارالىق مادەني-گۋمانيتارلىق جوبالاردى ىسكە اسىرۋدىڭ ءىرى ءارى تولىققاندى وشاعىنا اينالدىرۋ كوزدەلىپ وتىر», دەدى مادەنيەت جانە اقپارات ءمينيسترى ايدا بالاەۆا ءماجىلىستىڭ جالپى وتىرىسىندا.
قازىر مينيسترلىك تاراپىنان ورتالىقتىڭ كونتسەپتسياسى جاسالىپ, مازمۇنى ايقىندالعان.
دالىرەك ايتقاندا مادەني ورتالىقتا كينو كورسەتىلىمدەرى مەن كونتسەرتتىك قويىلىمدارعا ارنالعان كوپفۋنكتسيونالدى زال, ءبىلىم بەرۋ كۋرستارى, ترەنينگتەر, شىعارماشىلىق كەزدەسۋلەر وتكىزەتىن ارنايى كەڭىستىگى بار كوۆوركينگ ورتالىعى, كورمە وتكىزۋگە قولايلى ەكسپوزيتسيالىق مۋلتيمەديالىق الاڭشا, ەلىمىزدىڭ تۋريستىك الەۋەتىن كورسەتەتىن ارنايى تۋريزم بۇرىشى ورنالاسادى.
مادەني ورتالىق جىبەرۋشى تاراپ اككرەديتتەگەن جانە قابىلداۋشى مەملەكەتتىڭ زاڭناماسىنا سايكەس ىستەيتىن كوممەرتسيالىق ەمەس ۇيىم رەتىندە جۇمىس ىستەيدى.