ەرمەكسازدان ەرەكشە كەيىپكەرلەر جاساپ, ولارعا مونتاجدىڭ قۇدىرەتىمەن جان بىتىرەتىن ونەردى «Stop Motion» دەيدى. اتاۋى ءسىز بەن بىزگە تاڭسىق ونەر قاجىرلى ەڭبەكتى قاجەت ەتەدى. ماسەلەن, ءبىر سەكۋندتىق قوزعالىس ءۇشىن جيىرما ءتورت كادر جاسالادى. بىراق «قولى بىلگەن قۇم ۇستىنەن كەمە جۇرگىزەر» دەگەن. وعان دالەل – 9-سىنىپ وقۋشىسى ءامين وراز.
ءوزى ستسەناري اۆتورى, ءوزى ءمۇسىنشى ءھام وپەراتور ءاميننىڭ بۇل سالاعا اۋەستىگى ەرەكشە. سەگىز جاسىنان باستاپ ەرمەكسازدى ەرمەك ەتكەن دارا دارىننىڭ قازىر ەلۋدەن استام مۋلتيپليكاتسيالىق شىعارماسى بار. ونىڭ «تۇزاق», «شاپالاق شوۋ», «كىم ساتقىن؟» سەكىلدى تۋىندىلارى كورەرمەننىڭ ەرەكشە ىقىلاسىن وياتتى. ءاميننىڭ ايتۋىنشا, «Stop Motion» – شىدام مەن بايقامپازدىقتى تالاپ ەتەتىن ونەر. ماسەلەن, 15 ياكي 20 سەكۋندتىق انيماتسياعا شامامەن ءبىر اپتاداي ۋاقىت كەتەدى. ءار كادردى توقتاتىپ, ءار قيمىلدى سۋرەتكە ءتۇسىرىپ مۋلتفيلم قۇراستىرۋ – راسىندا وڭاي شارۋا ەمەس.
«مەن بۇرىن «ديسنەي» شىعارمالارىن كورىپ وتىرىپ, وسىنداي تۋىندى جاسايتىن ستۋديام بولسا دەپ ارماندايتىنمىن. ول ارمان قازىر ماقساتقا اينالدى. قازاق مۋلتيپليكاتسياسىن دامىتىپ, تاجىريبەلى انيماتور بولعىم كەلەدى. ول كۇننىڭ دە اۋىلى الىس ەمەس شىعار. «Stop Motion»-عا اۋەستىگىم سۋرەت سالۋدان باستالعان ەدى. جالپى, سۋرەت سالا الماعان ادامنىڭ انيماتور بولۋى ەكىتالاي. كەيىن داپتەرىمە بىرنەشە ەسكيز سىزىپ, سولاردى سۋرەتكە ءتۇسىرىپ, مونتاجداپ, كەيىپكەرلەرىمە جان ءبىتىردىم. وسىلايشا, مەنىڭ العاشقى «دوپ», «ەۆەرەست», «تەننيس», «اگەنت» سەكىلدى تىرناقالدى تۋىندىلارىم جارىققا شىقتى», دەيدى ول.
جاس تا بولسا ەلىمىزدەگى جاڭا جانردى جالپاق جۇرتقا جاريالاپ, ءارى قىزىق, ءارى قيىن ونەرگە بەت بۇرعان ءامين ورازعا قازاق ءمۋلتفيلمىنىڭ اتاسى امەن قايداروۆتىڭ جولىن بەرسىن دەيمىز.