ۇلىتاۋ وڭىرىندەگى بيىلعى سۋ تاسقىنى جەزدى كەنتىنىڭ جۇرتشىلىعىن ءبىراز ابىگەرگە تۇسىرگەن ەدى. وبلىس باسشىلىعى ءتىپتى, كەنتتە توتەنشە جاعداي جاريالاۋعا ءماجبۇر دە بولدى. ناۋرىزدىڭ 28-29 كۇندەرىن جەزدىلىكتەردىڭ ءبارى دەرلىك ۇيقىسىز وتكىزدى دەسە بولعانداي. قازىر سونىڭ ءبارى ارتتا قالدى.
ء«بىزدىڭ كەنت بويىنشا 10 ءۇي زارداپ شەكتى. بۇل ۇيلەردە بارلىعى 52 ادام تۇردى, مۇنىڭ 21-ءى بالا, 6-اۋى – زەينەت جاسىنداعى كىسى ەدى. سول كەزدە 6 ءۇيدىڭ وتباسى «بىزگە باسقا مەكەنجايدىڭ كەرەگى جوق, سۋ قۇرعاسا, ءوز ۇيىمىزدە وتىرا بەرەمىز», دەدى. ءتورت وتباسىنا ۋاقىتشا ءۇي بەرىلگەن ەدى», دەيدى جەزدى كەنتىنىڭ اكىمى مۇراتبەك جۇمابەك.
زارداپ شەككەن 10 ۇيگە دە تيەسىلى 3692 مىڭ تەڭگە كولەمىندە جاردەماقى تولەندى. ۇيلەردىڭ بارىنە دە ساراپتاما جاسالدى. ناتيجەسىندە, 7 ۇيگە سمەتالىق قۇجاتتاما جاسالىپ, سوعان سايكەس, كەلتىرىلگەن شىعىندار ءۇشىن 43548 مىڭ تەڭگە بەرىلدى. ال اپاتتى دەپ تانىلعان 3 ءۇي جاڭادان سالىناتىن بولدى.
قازىرگى كەزدە قۇرىلىس جۇمىستارى باستالىپ تا كەتتى. ءار ءۇيدىڭ اۋماعى 8 سوتىق جەردى قۇرايدى. قۇرىلىستى جۇرگىزىپ جاتقان «قازمۋزستروي» جشس ۇيلەردى پايدالانۋعا بەرۋدى تامىز ايىنا جوسپارلاپ وتىر.
«بىزدە جاياۋ جۇرگىنشىلەر كوپىرىنە زەرتتەۋ جۇمىستارى ءالى ءجۇرىپ جاتىر. بۇل وتكىر ماسەلە كۇيىندە قالىپ تۇر. تەزىرەك قورىتىندىسى شىعارىلىپ, سمەتالىق قۇجات دايىنداۋ كەرەك», دەيدى كەنت اكىمى.
ۇلىتاۋ وبلىسى,
جەزدى كەنتى