سەنات توراعاسى قاسىم-جومارت توقاەۆتىڭ جەتەكشىلىگىمەن كەشە پالاتانىڭ وسى جىلداعى العاشقى جالپى وتىرىسى ءوتىپ, وندا دەپۋتاتتار وزدەرىن تولعاندىرعان ماسەلەلەر بويىنشا ساۋالدارىن جاريا ەتتى. سونداي-اق, كۇن تارتىبىنە شىعارىلعان بىرقاتار حالىقارالىق زاڭدىق قۇجاتتاردى قاراپ, راتيفيكاتسيالادى.
الدىمەن دەپۋتاتتار قازاقستان مەن كاتار ۇكىمەتتەرى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كەلىسىمدى جانە وسىعان ءسايكەس حاتتامانى راتيفيكاتسيالاۋ تۋرالى زاڭ جوباسىن قارادى. كەلىسىمگە حاتتاما 2014 جىلعى 19 قاڭتاردا استانادا جاسالعان ەكەن. كەلىسىمنىڭ ماقساتى – ينۆەستيتسيالار ءۇشىن قولايلى جاعدايلار جاساۋ جولىمەن قازاقستان مەن كاتار اراسىنداعى ەكونوميكالىق ىنتىماقتاستىقتى نىعايتۋ جانە كەڭەيتۋ.
جانە دە حالىقارالىق شارت قوسارلانعان سالىق سالۋدى بولدىرماۋ ءۇشىن دە جاسالعان كورىنەدى. ۋاعدالاسۋشى مەملەكەتتەردىڭ ارقايسىسى سالىق تولەۋشىگە ءبىر رەت سالىق تولەۋ مۇمكىندىگىن قامتاماسىز ەتەدى. سونداي-اق, كەلىسىمدە تابىستىڭ پايدا بولۋ كوزى بولىپ تابىلاتىن مەملەكەتتە ديۆيدەندتەرگە, پايىزدارعا جانە رويالتيگە تومەندەتىلگەن مولشەرلەمەلەر بويىنشا سالىق سالىنۋى مۇمكىن ەرەجەلەر دە كوزدەلگەندىگىن ايتا كەتكەن ءجون. زاڭ جوباسى دەپۋتاتتار تاراپىنان قولداۋعا يە بولدى.
بۇدان كەيىن سەناتورلار ءماجىلىس ماقۇلداعان «2000 جىلعى 7 ءشىلدەدەگى قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى ازاماتتاردىڭ ءوزارا ساپارلارىنىڭ شارتتارى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن قارادى. 2012 جىلعى 7 قىركۇيەكتە استانادا جاسالعان حاتتاماعا سايكەس قازاقستان مەن ءوزبەكستان ازاماتتارىنىڭ تاراپتاردىڭ اۋماعىنا كەلۋى, شىعۋى, ترانزيتپەن ءوتۋى, سونداي-اق, ۋاقىتشا بولۋى ءۇشىن قۇجاتتار تىزبەسىنە ءوزگەرىستەر مەن تولىقتىرۋلار ەنگىزۋ كوزدەلگەن.
ىشكى ىستەر ءمينيسترى قالمۇحانبەت قاسىموۆتىڭ ايتۋىنشا, قۇجاتتار تىزىمىنە قوسىمشا ديپلوماتيالىق پاسپورت پەن وزبەكستان ازاماتىنىڭ بيومەتريالىق پاسپورتى, وسى ەلدىڭ 16 جاسقا تولماعان ازاماتىنىڭ كۋالىگى جانە قايتىپ ورالۋعا ارنالعان كۋالىك قوسىلىپ وتىر. بۇل رەتتە, زاڭ جوباسى بويىنشا پىكىر بىلدىرگەن سەناتور قۋانىش ايتاحانوۆ وڭتۇستىك قازاقستان وبلىسىندا 700 مىڭنان استام ادام شەكارالاس ايماقتا تۇراتىنىن جانە وڭىردە 400 مىڭعا تارتا وزبەك اعايىن بار ەكەنىن اتادى.
دەپۋتاتتىڭ سوزىنە قاراعاندا, قازاقستان شەكاراسىنان تۇرعىندار ەشقانداي كەدەرگىسىز وتەدى ەكەن. ال وزبەكستان شەكاراسىنان وتەر كەزدە وتكىزۋ بەكەتتەرىندە 2-3 ساعات نەمەسە جارتى كۇن تۇرىپ قالاتىن كورىنەدى. سوندىقتان دا قازاقستان ۇكىمەتى تاراپىنان وسى ماسەلەگە ىقپال ەتىلۋىن سۇراعان دەپۋتات بۇل ەكى ەل حالقىنا دا ىڭعايلى بولعان بولار ەدى دەگەندى ايتتى. سەناتوردىڭ ۇسىنىسىنان كەيىن پالاتا زاڭ جوباسىن قابىلدادى.
كەشەگى وتىرىستا «شەكاراارالىق سۋ ارنالارى مەن حالىقارالىق كولدەردى قورعاۋ جانە پايدالانۋ تۋرالى كونۆەنتسيانىڭ 25 جانە 26-باپتارىنا تۇزەتۋدى راتيفيكاتسيالاۋ تۋرالى» زاڭ جوباسى دا پالاتا قاراۋىنا ۇسىنىلدى. ول بويىنشا بايانداما جاساعان اۋىل شارۋاشىلىعى ءمينيسترى اسىلجان مامىتبەكوۆ سۋ كونۆەنتسياسىنا حەلسينكي قالاسىندا 1992 جىلى قول قويىلعانىن جانە ول 1996 جىلى كۇشىنە ەنگەنىن جەتكىزدى. تۇزەتۋلەردىڭ كۇشىنە ەنۋى اۋماعىندا ترانسشەكارالىق وزەندەردىڭ سۋ رەسۋرستارىنىڭ باسىم بولىگى قالىپتاساتىن ەلدەرمەن شەكارالاساتىن مەملەكەتتەر ءۇشىن اسا ماڭىزدى كورىنەدى. دەپۋتاتتار تالقىلاي كەلە, كونۆەنتسيانىڭ 25 جانە 26-باپتارىنا ەنگىزىلگەن تۇزەتۋلەردى دە راتيفيكاتسيالادى.
ءماجىلىس ماقۇلداعان «قازاقستان رەسپۋبليكاسىنىڭ ۇكىمەتى مەن جانۋارلاردىڭ ساۋلىعى جونىندەگى دۇنيەجۇزىلىك ۇيىم اراسىنداعى جانۋارلاردىڭ ساۋلىعى جونىندەگى دۇنيەجۇزىلىك ۇيىمنىڭ اۋسىل بويىنشا سۋبوڭىرلىك ۇيلەستىرۋ كەڭسەسىن استانا قالاسىندا قۇرۋ تۋرالى كەلىسىمدى راتيفيكاتسيالاۋ تۋرالى» زاڭ جوباسى دا قولداۋ تاپقاندىعىن ايتا كەتۋ كەرەك. وتىرىس سوڭىنان سەنات دەپۋتاتتارى ءوز ساۋالدارىن جاريا ەتتى.
اسقار تۇراپباي ۇلى,
«ەگەمەن قازاقستان».