مەملەكەت باسشىسى پەريناتولوگيا جانە بالالار كارديوحيرۋرگياسى ورتالىعىنىڭ ديرەكتورى گۇلنار نۇرلانوۆانى قابىلدادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا پرەزيدەنت انا مەن بالا دەنساۋلىعىن ساقتاۋ سالاسى مەملەكەتىمىزدىڭ باستى باسىمدىعى سانالاتىنىن اتاپ ءوتتى. قاسىم-جومارت توقاەۆ وتاندىق دەنساۋلىق ساقتاۋ جۇيەسىنىڭ الدىندا جۇكتى ايەلدەر مەن بالالارعا مەديتسينالىق كومەكتىڭ قولجەتىمدىلىگىن ءارى ساپاسىن ارتتىرۋ, انا مەن بالا ءولىمىن ازايتۋ, بالالاردىڭ مۇگەدەكتىگىن ەرتە انىقتاۋ جانە الدىن الۋ جونىندە ماڭىزدى مىندەتتەر تۇرعانىن ايتتى. مەملەكەت باسشىسى پەرزەنتحانالاردىڭ ينفراقۇرىلىمىن نىعايتۋ جانە ولاردىڭ جۇمىسىنا وزىق ستاندارتتار مەن ادىستەمەلەردى ەنگىزۋ قاجەتتىگىنە ەرەكشە نازار اۋداردى.
گۇلنار نۇرلانوۆا پەريناتولوگيا جانە بالالار كارديوحيرۋرگياسى ورتالىعىنىڭ قىزمەتى مەن جەتىستىكتەرى جانە جۇزەگە اسىرىلىپ جاتقان جوبالارى تۋرالى مالىمەت بەردى. سونداي-اق ورتالىق ەلىمىزدەگى تۋا بىتكەن جۇرەك اۋرۋلارى بار ناۋقاستاردى باقىلاۋدىڭ تولىق تسيكلى جۇرگىزىلەتىن جالعىز مەكەمە ەكەنىن جەتكىزدى. مۇندا جىل سايىن 200 كارديوحيرۋرگيالىق وتا جاسالادى. پەرزەنتحانادا دۇنيەگە كەلەتىن نارەستەلەر سانى 9000-عا, ونىڭ ىشىندە مەرزىمىنەن بۇرىن تۋعاندار شامامەن 3700-گە جەتەدى.
سونىمەن قاتار پرەزيدەنتكە فەتالدى حيرۋرگياعا قاتىستى رەۆوليۋتسيالىق جوبا ەنگىزىلە باستاعانى جونىندە باياندالدى. مەديتسينالىق كومەكتىڭ اتالعان باعىتىنا سايكەس, تۋا بىتكەن دامۋ كەمىستىكتەرىن كوررەكتسيالاۋ ءۇشىن بالاعا قۇرساق ىشىندە جاتقاندا وپەراتسيا جاسالادى. جوبا دەنى ساۋ بالانى دۇنيەگە اكەلىپ, انا باقىتىنا بولەنۋگە مۇمكىندىك بەرەدى.
قاسىم-جومارت توقاەۆ دارىگەرلەردى قولداۋ ماسەلەلەرىنە ارنايى توقتالىپ, ولاردىڭ قوعام ءۇشىن ءسىڭىرىپ جاتقان ەڭبەگى ماڭىزدى ەكەنىن اتاپ ءوتتى. پرەزيدەنت بيىل مەديتسينا قىزمەتكەرلەرىنىڭ مۇددەسىن قورعاۋعا جانە دارىگەر قىزمەتىنىڭ مارتەبەسىن ارتتىرۋعا باعىتتالعان زاڭعا قول قويعانىن ەسكە سالدى. سونىمەن قاتار العاش رەت «قازاقستاننىڭ ەڭبەك سىڭىرگەن دارىگەرى» مەملەكەتتىك ناگراداسى بەكىتىلدى.
كەزدەسۋ سوڭىندا قاسىم-جومارت توقاەۆ گۇلنار نۇرلانوۆاعا جانە بارلىق دارىگەرلەردىڭ يگىلىكتى جۇمىسىنا تابىس تىلەدى.