سەنات توراعاسى, قازاقستان بوچچا فەدەراتسياسىنىڭ پرەزيدەنتى ماۋلەن اشىمباەۆ بوچچادان ءداستۇرلى ەل چەمپيوناتىنىڭ جابىلۋ راسىمىنە قاتىستى. بەس كۇنگە جالعاسقان سايىستا ەلىمىزدىڭ ۇزدىك بوچچاشىلارى انىقتالدى.
ماۋلەن اشىمباەۆ جارىستىڭ تارتىستى وتۋىنە ۇلكەن ۇلەس قوسقان پاراسپورتشىلارعا العىس ءبىلدىرىپ, ءار اتلەتتىڭ دايىندىعى جوعارى دەڭگەيدە بولعانىن اتاپ ءوتتى. وسى رەتتە بيىل چەمپيوناتقا قاتىسۋشىلار سانى بىلتىرعىمەن سالىستىرعاندا ەكى ەسەگە ارتقانىن ايتا كەتكەن ءجون.
«بيىل چەمپيوناتتى ۇيىمداستىرۋ دەڭگەيى, سپورتشىلاردىڭ دايىندىعى جانە قاتىسۋشىلار سانى ايتارلىقتاي ارتقانىن ايرىقشا اتاپ وتكىم كەلەدى. وسىعان وراي فەدەراتسيانىڭ جانە جەكە ءوز اتىمنان بارشاڭىزعا العىسىمدى بىلدىرەمىن. مۇنىڭ ءبارى – پرەزيدەنتىمىز قاسىم-جومارت كەمەل ۇلى توقاەۆتىڭ ينكليۋزيۆتى قوعام قالىپتاستىرۋعا ارنالعان ساياساتىنىڭ ناتيجەسى. سونداي-اق ءبىز سپورتشىلارىمىزدىڭ كاسىبي تۇرعىدا وسكەنىنە ەرەكشە قۋانىشتىمىز. بۇل ۇزدىكسىز جاتتىعۋ مەن تاباندىلىقتىڭ ارقاسى ەكەنى انىق. سىزدەردىڭ ارقايسىڭىز وسى چەمپيوناتقا قاتىسۋ ارقىلى مول تاجىريبە جيناپ, بۇرىنعىدان دا مىقتى, ءتوزىمدى جانە سەنىمدى بولا تۇستىڭىزدەر», دەگەن ماۋلەن اشىمباەۆ جارىس كەزىندە تورەشىلەرگە كومەك كورسەتكەن ەرىكتىلەرگە دە العىس ءبىلدىردى.
ايتا كەتەيىك, بيىلعى ەل بىرىنشىلىگىندە پاراسپورتشىلار جەكەلەي سىننان بولەك, العاش رەت كوماندالىق جانە جۇپتىق سايىستا باق سىنادى. سونداي-اق تۇركىستان جانە باتىس قازاقستان وبلىستارىنىڭ بوچچاشىلارى قازاقستان چەمپيوناتىنا ءبىرىنشى رەت قاتىسىپ وتىر. ماۋلەن اشىمباەۆ فەدەراتسيانىڭ الداعى جۇمىس جوسپارى تۋرالى ايتا كەلىپ, وسى جارىستان كەيىن ۇلتتىق قۇرامادا وزگەرىستەر بولاتىنىن جەتكىزدى.
«فەدەراتسيا چەمپيوناتتىڭ قورىتىندىسى بويىنشا ۇلتتىق قۇرامانىڭ قۇرامىن جاڭارتۋدى كوزدەپ وتىر. بۇل سايىستا توپ جارعان سپورتشىلار پولشا مەن باحرەيندە وتەتىن حالىقارالىق جارىستاردا ەل نامىسىن قورعايدى. سونداي-اق ەلىمىزدە دە حالىقارالىق تۋرنيرلەر وتكىزۋ ماسەلەسىن قاراستىرىپ جاتىرمىز. بيىل ەل چەمپيوناتىن وتكىزۋ بارىسىندا العاش رەت حالىقارالىق بوچچا فەدەراتسياسىنىڭ ەلەكتروندى بازاسى قولدانىلدى. ول ءار ويىننىڭ ناتيجەلەرىن ونلاين رەجىمدە باقىلاپ وتىرۋعا مۇمكىندىك بەرەدى. بۇل – ەلىمىزدە حالىقارالىق جارىس وتكىزۋ جولىندا جاسالعان ماڭىزدى قادام. الداعى جىلداردا ەلوردادا الەمنىڭ باسقا ەلدەرىنەن كەلگەن بوچچاشىلاردىڭ قاتىسۋىمەن وسىنداي جارىستار وتكىزۋدى جوسپارلاپ وتىرمىز», دەدى قازاقستان بوچچا فەدەراتسياسىنىڭ پرەزيدەنتى.
بيىلعى چەمپيوناتتا جاسوسپىرىمدەر اراسىنداعى جەكەلەي سىندا ءوز ساناتتارى بويىنشا اماناي باتحونوۆ, ۋليانا كۋدينوۆا, ازامات امانشا, ارداق التىنباسوۆ جانە ماديار مۇراتحان جەڭىمپاز اتاندى. ال ەرەسەكتەر اراسىندا بالجان بولەكپاەۆا, قۋانىش اسقاربەكوۆ, يتيانا شىڭعىسحانوۆا, الەكساندر كۋرمانتاەۆ, ارۋجان جەڭىس, تەمىرلان التىنسارى, ەلميرا مۋسراليەۆا جانە رۋسلان ەرەمباەۆ توپ جاردى. جۇپتىق سايىستا ءاليجان باقىتبەك ۇلى, كاريم ساليموۆ, ازامات ايازباەۆ جانە ەلميرا مۋسراليەۆا جەڭىسكە جەتسە, كوماندالىق سىندا استانا قالاسىنىڭ پاراسپورتشىلارى يتيانا شىڭعىسحانوۆا, مەرۋەرت تىلەبالدى جانە ەرحات الماتقا تەڭ كەلەر ەشكىم بولمادى.