مەملەكەت باسشىسى قاسىم-جومارت توقاەۆ «جول عىلىمي-وندىرىستىك ورتالىعى» جشس ديرەكتورى باعدات تەلتاەۆتى قابىلدادى. بۇل تۋرالى اقوردا ءباسپاسوز قىزمەتى حابارلادى, دەپ جازادى Egemen.kz.
جۇزدەسۋدە الماتى قالاسىنداعى جانە ەلىمىزدەگى جول ينفراقۇرىلىمىن دامىتۋ پەرسپەكتيۆالارى, يننوۆاتسيالىق تەحنولوگيالاردى ەنگىزۋ جانە اتالعان سالاعا مامان دايارلاۋ ماسەلەلەرى تالقىلاندى.
مەملەكەت باسشىسىنا قالالاردىڭ قارقىندى دامۋىنا بايلانىستى تۋىنداعان, كولىك ينفراقۇرىلىمىنا ايتارلىقتاي سالماق تۇسىرەتىن باستى پروبلەمالار مەن سىن-قاتەرلەر تۋرالى مالىمەت بەرىلىپ, ولاردى شەشۋ جولدارى جونىندە باياندالدى.
اتاپ ايتقاندا, باعدات تەلتاەۆ جول قۇرىلىسىنا قۇرامىندا پوليمەر قوسىندىلارى بار اسفالتبەتون قولدانۋ تاجىريبەسىنىڭ ءساتتى وتكەنىن جەتكىزدى. جۇرگىزىلگەن سىناق ناتيجەسىندە اتالعان تەحنولوگيا جولدىڭ ويىلۋىنا جانە جارىقشاقتاردىڭ پايدا بولۋىنا, سونداي-اق تاعى دا باسقا كليماتتىق اسەرلەرگە ءتوزىمدى ەكەنى انىقتالدى.
كەزدەسۋ سوڭىندا پرەزيدەنت قاسىم-جومارت توقاەۆ سالانى دامىتۋعا قوسقان ۇلەسى ءۇشىن باعدات تەلتاەۆقا ريزاشىلىعىن ءبىلدىرىپ, جول ينفراقۇرىلىمىنىڭ ساپاسى مەن قاۋىپسىزدىگىن جاقسارتۋ ءۇشىن عىلىمي زەرتتەۋلەردى جالعاستىرۋدىڭ جانە جول قۇرىلىسىنا وزىق تەحنولوگيالاردى ەنگىزۋدىڭ ماڭىزدى ەكەنىنە نازار اۋداردى. ايتىلعان ۇسىنىستار نەگىزىندە ۇكىمەتكە جانە سالالىق مينيسترلىككە ءتيىستى تاپسىرمالار بەرىلەدى.