تۇركىستانداعى « ۇلى دالا ەلى» ورتالىعىندا تاشكەنتتىك قىلقالام شەبەرى گۇلميرا دوسىبەكوۆانىڭ «تۋعان جەرگە تاعزىم» اتتى كوركەم تۋىندىلارى كورمەسىنىڭ اشىلۋ سالتاناتى ءوتتى. وعان وزبەكستان, رەسەي جانە ەلىمىزدىڭ قىلقالام شەبەرلەرى مەن تۇركىستان قالاسىنىڭ زيالى قاۋىم وكىلدەرى قاتىستى.
گۇلميرا پەرنەتايقىزى دوسىبەكوۆا تۇركىستان قالاسىندا دۇنيەگە كەلىپ, نەكراسوۆ اتىنداعى مەكتەپتى ۇزدىك بىتىرگەن. ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ حالىقارالىق قاتىناستار فاكۋلتەتىن ءبىتىردى. تۋما تالانت يەسى يتاليانىڭ ديزاين مەكتەبىندە ءبىلىمىن جالعاستىردى. وتباسىلىق جاعدايىمەن ليۆانداعى بەيرۋت قالاسىندا تۇرعان كەزىندە قازاقستاننىڭ سالت-داستۇرىنە نەگىزدەلگەن تۋىندىلارىمەن حالىقارالىق سۋرەت كورمەلەرىن ۇيىمداستىرىپ, زيالى قاۋىم وكىلدەرىنىڭ ريزاشىلىعىنا بولەندى. الايدا ليۆاندا قيىنشىلىق تۋىنداعان كەزىندە شەكارادان جۇزدەگەن پولوتنولارىن الىپ وتە الماي, قيىندىققا ۇشىرادى. قازىرگى كەزدە تاشكەنتتە تۇرادى. شەكارادان امان-ەسەن وتكىزگەن تۋىندىلارىنىڭ ىشىنەن 47-ءسىن «تۋعان جەرگە تاعزىم» اتتى كورمەگە قويدى. قازىرگى كەزدە QR كود ارقىلى ءارى ونلاين كورمەلەردى وتكىزۋگە دە ماشىقتانعان كورىنەدى.
«تۋعان جەرگە تاعزىم» كورمەسىنە اكەلگەن تۋىندىلارىمنىڭ ىشىندە مايلى بوياۋ, اكرەل, تەكستۋرالىق پاستا, التىن-كۇمىس جالاتىلعان پولوتنولارىم قويىلدى. قازىرگى تاڭدا شەتەلدىكتەر نەگىزىنەن تۇركى حالقىنىڭ سالت-داستۇرىنە قىزىعۋشىلىق تانىتادى. مەن جالپى سۋرەتتەرىمدى گۇلمەن كومكەرگەندى, وتباسىلىق قۇندىلىقتاردى ناسيحاتتايتىن ءار ۇلتتىڭ سۇلۋ قىزدارىنىڭ بەينەسىن سومداعاندى جاقسى كورەمىن. بۇل توپتامانى «تۋعان جەرگە تاعزىم» دەپ اتاعان سەبەبىم, تۇركى تەگىنىڭ ءتۇپ توركىنى تۇركىستانداعى تۋعاندارىمدى شىعارمالارىممەن تانىستىرۋ ەدى. قازىر مەنىمەن بىرگە كەلگەن ون ەكى سۋرەتشىنى «ارىستانبابقا تۇنە, قوجا احمەت ياساۋيدەن تىلە» دەگەندەي ارىستانباب, قوجا احمەت ياساۋي كەسەنەسىنە, ۇكاشا اتا كەسەنەسىنە اپارىپ, وسىنداعى ۇستازدارىمنىڭ اق باتاسىن الىپ, سۋرەتشىلىكتىڭ ۇلكەن جولىنا شىعۋعا بەل بايلادىم»,دەيدى گۇلميرا پەرنەتايقىزى.
بۇعان دەيىن بەيرۋتتا, تاشكەنتتە كوركەم تۋىندىلارىنان حالىقارالىق كورمە ۇيىمداستىرعان گۇلميرا پەرنەتايقىزىنىڭ ماقساتى الداعى ۋاقىتتا دۋشانبەدە, شۆەيتسارياداعى تسيۋريح قالاسىندا, ەۋروپا ەلدەرىندە, دۋبايدا وتكىزۋگە تاپسىرىستار العان كورىنەدى. جاقىندا سوندا اتتانباق.
كورمەگە قاتىسقان نەكراسوۆ مەكتەبىنىڭ سول كەزدەگى ديرەكتورى سۆەتلانا كەرن مەن ۇستازى نەسىپگۇل وتەباەۆانىڭ ايتۋىنشا, گۇلميرا مەكتەپتە وقىپ جۇرگەن كەزىندە دە سۋرەت سالىپ, ول تۋىندىلارى وقۋ ورنىنىڭ قابىرعاسىنىڭ كوركىن كەلتىرىپ تۇراتىن بولعان. مۇنى كورگەن تۇرعىندار «ارنايى سۋرەتشى جالدادىڭدار ما؟» دەپ ءجيى سۇرايتىن كورىنەدى. گۇلميرا جاسىنان پىسىق, زەرەك, جاۋاپكەرشىلىگى مول, قوعامدىق جۇمىستارعا بەلسەندى قاتىسۋىمەن كوزگە تۇسكەن. سىنىپتىڭ تۇراقتى ستاروستاسى بولعان. دوستارىنىڭ ىشىندە ەرەكشەلىگى كيىم ۇلگىسى, ينتەرەرەر جاساۋمەن دە كوزگە تۇسكەن.
گۇلميرا انا رەتىندە ءۇش قىز, ءبىر بالانى تاربيەلەپ وتىر. ۇلكەنى قاسىمجومارت شۆەيتساريانىڭ حالىقارالىق قاتىناستار ۋنيۆەرسيتەتىندە, قىزى ءاديا شۆەيتساريا ۋنيۆەرستيتەتىنىڭ قارجى فاكۋلتەتىندە وقيدى. جانداۋلەت, ءنۇرسالىم, سافياسى وزىمەن بىرگە تاشكەنتتە تۇرادى. جولداسى راحىمجان – ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ تۇلەگى. دۇنيەجۇزىلىك بانكتىڭ ديپلوماتى بولعاندىقتان باسشىلىق قايدا جۇمساسا, سول ەلگە وتباسىمەن بارىپ تۇرادى ەكەن. بۇل ءوز كەزەگىندە گۇلميرانىڭ جاڭا مەملەكەتتەرگە قازاق ءداستۇرىن تانىتۋىنا مول مۇمكىندىك اپەرەدى. اكەسى پەرنەتاي دوسىبەكوۆ پەن زايىبى شاتكۇل دە قالاعا تانىمال ۇستازدار. ءتورت بالانى تاربيەلەپ, ۇلىن ۇياعا قىزىن قياعا قوندىرعان جاندار. سالتاناتتى ءىس-شارادا ءسوز العان « ۇلى دالا ەلى» ورتالىعىنىڭ ديرەكتورى گۇلجانات يبراگيمقىزى, نەكراسوۆ مەكتەبىنىڭ ۇستازدارى سۆەتلانا كەرن, نەسىپكۇل وتەباەۆا, «قازاقستان, وزبەكستان, رەسەي» سۋرەتشىلەر قاۋىمداستىعىنىڭ مۇشەلەرى مادينا تاكەنوۆا مەن اننا كاۋروۆا, «تۇركىستان» گازەتىنىڭ ءتىلشىسى روزا نارىمبەتوۆا گۇلميرانىڭ الەمگە قىلقالام ارقىلى قازاقتىڭ ءداستۇر-سالتىن پاش ەتىپ وتىرعان ماقساتكەرلىگىن ماداقتاپ, اتا-اناسىنا وسىنداي تالانتتى دا نامىستى قىزدى تاربيەلەپ جەتكىزگەنى ءۇشىن العىستارىن جەتكىزدى.
« ۇلى دالا ەلى» ورتالىعىنداعى گۇلميرا دوسىبەكوۆانىڭ «تۋعان جەرگە تاعزىم» اتتى كورمەسىن قالا تۇرعىندارى مەن قوناقتارى الداعى بىرنەشە اپتا تاماشالاۋىنا بولادى.
ەسكەندىر ەرتاي