ۇكىمەت باسشىسى ولجاس بەكتەنوۆ الماتى وبلىسىنا جۇمىس ساپارى بارىسىندا الاتاۋ قالاسىنىڭ جوباسىمەن تانىستى, دەپ جازادى Egemen.kz.
پرەمەر-مينيستر الاتاۋ قالاسىنىڭ اكىمى اركەن وتەنوۆتىڭ ارنايى ەكونوميكالىق ايماقتى دامىتۋ پەرسپەكتيۆاسى تۋرالى بايانداماسىن تىڭدادى. ارنايى ەكونوميكالىق ايماق اۋماعىندا 96,6 مىڭ گەكتاردا جالپى سوماسى 383 ملرد تەڭگەگە 11 ءىرى ينۆەستيتسيالىق جوبانى ىسكە اسىرۋ جوسپارلانىپ وتىر. جوسپار جۇيەلى جۇزەگە اسسا 7 مىڭ تۇرعىن جۇمىسپەن قامتىلادى.
ولجاس بەكتەنوۆ قالا اكىمشىلىگىنە الەۋمەتتىك, ينجەنەرلىك جانە تۇرعىن ءۇي جوبالارىن ساپالى ىسكە اسىرۋدا جاۋاپكەرشىلىكتىڭ سالماعى اۋىر بولاتىنىن اتاپ ءوتتى.
ۇكىمەت قاۋلىسىمەن الاتاۋ قالاسىنىڭ باس جوسپارى بەكىتىلدى. وعان سايكەس جوبالاۋ شەڭبەرىندە قۇرىلىستىڭ بيىكتىگىن – قالانىڭ ورتالىق بولىگىنەن ونىڭ شەكاراسىنا قاراي تومەندەتۋ كوزدەلگەن.
«ناتيجەسىندە ءبىز الماتىنىڭ ماڭىندا تۋريستىك الەۋەتتى بەلسەندى ارتتىرا وتىرىپ, ونەركاسىپتىك, ءبىلىم بەرۋ جانە لوگيستيكالىق ورتالىققا اينالاتىن ءىرى مەگاپوليس قۇرۋدى قامتاماسىز ەتۋىمىز كەرەك. باس جوسپاردىڭ ءاربىر تارماعىنىڭ ىسكە اسىرىلۋىن باقىلاۋدا ۇستاۋ, سونداي-اق ءبىرىنشى كەزەكتەگى ءىرى جوبالاردى رۇقسات قۇجاتتاماسىمەن قامتاماسىز ەتۋ ءۇشىن قالا اۋماقتارىنىڭ ەگجەي-تەگجەيلى جوسپارلاۋ جوبالارىن ازىرلەۋدى جەدەلدەتۋ قاجەت», دەدى ولجاس بەكتەنوۆ.