پاريج وليمپياداسىنا دايىندالىپ جاتقان قازاقستان قۇراماسىنىڭ قورجىنى تاعى ءبىر جولدامامەن تولىقتى. بۇل جولى ءۇشسايىسشى ەكاتەرينا شابالينانىڭ باعى جاندى.
قۋانىشتى حاباردى ەستىگەن بەتتە ەكاتەرينا: «تۋعان كۇنىمنىڭ قارساڭىندا وليمپيادا جولداماسىن يەلەندىم. ماعان سەنگەن تۋعان-تۋىستارىم مەن جانكۇيەرلەرىمە زور ريزاشىلىعىمدى بىلدىرەمىن. سىزدەردىڭ قولداۋلارىڭىز مەنى جەڭىسكە جەتەلەدى. بۇل مەنىڭ ومىرلىك ماقساتىم ەدى. ەرەن ەڭبەك پەن تىنىمسىز تالپىنىستىڭ ارقاسىندا جوسپارىمدى جۇزەگە اسىرا الدىم. سوعان قاتتى قۋانىپ وتىرمىن. تورتجىلدىقتىڭ باستى دوداسىنىڭ باستالۋىنا ءالى ەكى اي بار. سول ۋاقىتتا مەن جاتپاي-تۇرماي دايارلانامىن», دەپ اقتارىلا سويلەدى.
ەكاتەرينا شابالينا – 26 جاستا. ول – بىرقاتار حالىقارالىق جارىستىڭ جەڭىمپازى جانە جۇلدەگەرى. بىلتىر جەرلەسىمىز ساۋد ارابياسىنىڭ ءال-حۋبار قالاسىندا وتكەن ازيا چەمپيوناتىندا باستى قارسىلاستارى قىتايلىق كسينيۋ لين مەن گونكونگتىق بەيلي براۋندى ارتقا تاستاپ, التىننان القا تاقتى. شابالينا تانىمال باپكەر ماكسيم كرياتتىڭ قول استىندا جاتتىعادى. ءسويتىپ, پاريجدە الاۋى تۇتاناتىن وليمپيا ويىندارىنا قاتىساتىن سپورتشىلارىمىزدىڭ سانى 55-كە جەتتى.