ءماتىن جازۋدىڭ قىر-سىرىنا مەيلىنشە جەتىلدىرىلگەن, جارامسىز, ناشار دەگەن شىعارمانىڭ ءوزىن بار قاتەسىنەن ارىلتىپ, ءمىنسىز قالىپقا تۇسىرە الاتىن ChatGPT سىندى باعدارلامالار كۇننەن-كۇنگە قارقىن الىپ, دامىلسىز دامىپ كەلەدى. سونىڭ ءبىر مىسالى, OpenAI كومپانياسى جاقىندا GPT-4o دەپ اتالاتىن جاساندى ينتەللەكتىنىڭ جاڭا مودەلىن جۇرتشىلىققا تانىستىردى.
جاڭا باعدارلامانىڭ ەرەكشەلىگى قانداي دەيسىز عوي؟ كومپانيانىڭ باس تەحنيكالىق ديرەكتورى ميرا ءمۋراتيدىڭ ايتۋىنشا, GPT-4o الدىڭعى مودەلدەرگە قاراعاندا الدەقايدا جىلدام جۇمىس ىستەيدى. OpenAI-دىڭ بۇعان دەيىنگى GPT-4 مودەلى ءماتىن كۇيىندە عانا بەرىلگەن ءسوزدى تۇسىنە الاتىن ەدى. ال جاڭارتىلعان GPT-4o نۇسقاسى 50 ءتىلدى ەركىن مەڭگەرىپ قانا قويماي, اۋىزشا ايتىلعان ءسوزدى دە تالداي الاتىن مۇمكىندىككە يە. مۇنداعى «o» ءارپى «omni» دەگەن ماعىنانى بىلدىرەدى. قازاقشالاساق, «جان-جاقتى». ياعني ول ءماتىندى, اۋىزشا ايتىلعان ءسوزدى, سونىمەن قاتار بەينەنى وڭدەي الادى. ال ەڭ ماڭىزدىسى, قازاق تىلىندە ەركىن اڭگىمەلەسەدى. «اڭگىمەلەسەدى» دەپ وتىرعانىمىز دا بەكەر ەمەس. ويتكەنى OpenAI-ءدىڭ بۇل شىعارىلىمى ادامعا كوبىرەك ۇقسايدى. ول سۇراقتارعا جاۋاپ بەرگەندە اڭگىمەلەسۋشىنىڭ داۋىس ىرعاعى مەن كوڭىل كۇيىن اڭعارىپ, سوعان ساي ەموتسيونالدى رەڭكتە جاۋاپ قايىرادى. تاقىرىپقا بايلانىستى بىردە قۋانادى, بىردە مۇڭايادى. سۇراق قويۋشى مەيلىنشە اشىلىپ, سىرىن بۇكپەي, ساۋالىن نەندەي ماقساتتا قويىپ وتىرعانىنا دەيىن ايتىپ, ەركىن سويلەسسە, جاساندى ينتەللەكتى دە جاعىمدى اقپاراتىن جاسىرىپ قالمايدى. بۇدان بولەك, GPT-4o مودەلىمەن اۋىزشا سويلەسە وتىرىپ, وعان تەلەفون كامەراسىندا ماتەماتيكالىق ەسەپتىڭ سۋرەتىن كورسەتۋگە بولادى. سول ارقىلى جاساندى زەردە نەبىر كۇردەلى ەسەپتەردىڭ دە شىعارىلۋ جولىن سىزگە اۋىزشا ءتۇسىندىرىپ بەرەدى.