ستەند اتۋدىڭ سكيت ءتۇرى بويىنشا جاڭارتىلعان الەمدىك رەيتينگتە اسەم ورىنباي ءبىرىنشى ورىنعا كوتەرىلدى. وسى ناتيجەنىڭ ارقاسىندا قازاقتىڭ قۇرالايدى كوزگە اتقان مەرگەن قىزى پاريج وليمپياداسىنىڭ جولداماسىنا يەلىك ەتتى.
قازىرگى كەزدە وليمپيا ويىندارىنا قاتىساتىن سپورتشىلارىمىزدىڭ سانى 54-كە جەتتى. اسەم ورىنبايدان بولەك, تورتجىلدىقتىڭ باستى دوداسىنا ەلىمىزدىڭ تاعى ەكى ستەند اتۋشىسى اتتاناتىنىن دا ەستەرىڭىزگە سالا كەتەيىك. بۇعان دەيىن ونداي قۇرمەتكە ماريا دميتريەنكو (تراپ) مەن ەدۋارد ەششەنكو (سكيت) بولەنگەن ەدى.
ءدال سونداي مۇمكىندىك سپورتتىق گيمناسشى ايدا باۋىرجانوۆا دا بولدى. ايەلدەر اراسىندا تاشكەنتتە وتكەن ازيا چەمپيوناتىندا ول ەركىن جاتتىعۋ بويىنشا تابىستى ونەر كورسەتىپ, قولا مەدالدى يەلەندى. بۇعان دەيىن بىردە-ءبىر بۇرىمدىمىز سارى قۇرلىقتىڭ باستى دوداسىندا وسىنداي كورسەتكىشكە قول جەتكىزگەن جوق ەدى. سول سەبەپتى دە مۇنى تاريحي جۇلدە دەپ باعالاساق تا بولادى. بىراق باستى باسەكە كوپسايىس ەدى. وزبەكستاننىڭ استاناسىندا ءدال سول جارىستىڭ قورىتىندىسى بويىنشا پاريج وليمپياداسىنىڭ سوڭعى جولداماسى ساراپقا سالىندى. وكىنىشكە قاراي, بۇل باسەكەدە باۋىرجانوۆانىڭ باعى جانبادى. 50,699 ۇپاي جيعان ول ءتورتىنشى ورىندا قالىپ قويدى. بۇل دودادا العاشقى ءۇش ورىندى قىتايلىق تسزيافەي حۋ (50,699 ۇپاي) مەن سينۋي تسين (50,566) جانە فيليپپيندىك ەمما مالابۋيو (50,398) يەلەندى.
بۇل كۇندەرى بانگكوكتا بوكستان ىرىكتەۋ ءتۋرنيرى ءوتىپ جاتىر. الدا باسقا دا سپورت تۇلەرىنەن تاعى بىرنەشە ءىرى دودا بار. سولاردىڭ اراسىنان جەڭىل اتلەتتەرگە ۇلكەن ءۇمىت ارتىپ وتىرمىز. تاياۋ كۇندەرى دزيۋدوشىلاردىڭ رەيتينگى جاڭارتىلادى. سول جارىستاردىڭ ناتيجەسى بويىنشا تاعى بىرنەشە سپورتشىمىز وليمپيا ويىندارىنىڭ جولداماسىن يەلەنەتىنى انىق.