الماتىدا شانحاي ىنتىماقتاستىق ۇيىمىنا مۇشە مەملەكەتتەردىڭ دەنە شىنىقتىرۋ جانە سپورت سالاسىنا جاۋاپتى مينيسترلىك باسشىلارىنىڭ كەڭەسى ءوتتى. شىۇ-عا مۇشە مەملەكەتتەر اراسىنداعى ارىپتەستىكتى ودان ءارى دامىتۋ مەن نىعايتۋدىڭ ماڭىزدى ماسەلەلەرى تالقىلانعان جيىندا سالا ءمينيسترى ەرمەك مارجىقپاەۆ سپورت – شىۇ اياسىنداعى ءوزارا ءىس-قيمىلدىڭ نەگىزگى باعىتتارىنىڭ ءبىرى ەكەنىن اتاپ, قازاقستان شىۇ كەڭىستىگىندە سپورتتىڭ دامۋىنا ۇلەس قوسۋعا مۇددەلى ەكەنىن جەتكىزدى, دەپ حابارلايدى Egemen.kz اتالعان مينيسترلىكتىڭ ءباسپاسوز قىزمەتىنە سىلتەمە جاساپ.
مينيستر قازاقستاننىڭ مەملەكەتتىك ساياساتىنىڭ ماڭىزدى باعىتىنىڭ ءبىرى – بۇقارالىق سپورتتى دامىتۋ ەكەنىن ايتتى. بۇگىنگى كۇنى دەنە شىنىقتىرۋمەن جانە سپورتپەن جۇيەلى تۇردە اينالىساتىندار حالىقتىڭ جالپى سانىنىڭ 40,4 %-ىن قۇرايدى. 2021 جىلدان باستاپ سپورت سەكتسيالارىن جان باسىنا قارجىلاندىرۋ ارقىلى مەملەكەتتىك سپورت تاپسىرىسىن ىسكە اسىرۋ تەتىگى ەنگىزىلدى. ناتيجەسىندە وسى كۇنى 240 مىڭ بالا مەن ءجاسوسپىرىم 7 مىڭنان استام سپورت سەكتسياسىنا تەگىن بارادى.
«تاجىريبە الماسۋ جانە جاڭا باستامالاردى تالقىلاۋ ارقىلى ءبىز ۇيىم كەڭىستىگىندە عانا ەمەس, الەمدە دە بىرلەسكەن كۇش-جىگەرمەن سپورتتىق كۇن ءتارتىبىن قالىپتاستىرا الامىز. سونىمەن قاتار ءبىزدىڭ سپورتشىلار سپورت باسەكەلەرىندە ءبىر-بىرىنە نەگىزگى قارسىلاستار سانالادى. دەسە دە, ءدال وسىنداي باسەكەلەستىك ءبىزدىڭ سپورتشىلارىمىزدىڭ تاجىريبەسىن ارتتىرۋعا زور مۇمكىندىك بەرەدى», دەدى ەرمەك مارجىقپاەۆ.
ايتا كەتكەن ءجون, 2023 جىلى قازاقستان سپورتشىلارى شىۇ-عا مۇشە مەملەكەتتەر اۋماعىندا 50-دەن استام جاتتىعۋ جيىنىن وتكىزگەن.
ءىس-شاراعا قاتىسۋشىلار بىرلەسكەن وقۋ-جاتتىعۋ جيىندارىن وتكىزۋ تۋرالى يدەيالارىن ايتىپ, سپورتتىق مەديتسينا مەن عىلىم سالاسىندا تاجىريبە الماسۋ جانە ىنتىماقتاستىق ماسەلەلەرىن تالقىلادى.
جيىن سوڭىندا ەرمەك مارجىقپاەۆ شىۇ-عا مۇشە مەملەكەتتەردىڭ دەنە شىنىقتىرۋ مەن سپورت سالاسىنا جاۋاپتى مينيسترلىك باسشىلارىن بيىل قىركۇيەك ايىنىڭ 8-13 كۇندەرى ارالىعىندا استانادا وتەتىن 5-ءشى دۇنيەجۇزىلىك كوشپەندىلەر ويىندارىنا قاتىسۋعا شاقىردى.