جەتىسۋدا «تازا قازاقستان» ەكولوگيالىق اكتسياسى ءالى دە جالعاسىپ جاتىر. بۇگىندە وبلىس تۇرعىندارى, ۆولونتەرلەر, جاستار ۇيىمدارى, مەديتسينالىق جانە ءبىلىم مەكەمەلەرىنىڭ قىزمەتكەرلەرى, سونىمەن قاتار ءوڭىر سپورتشىلارى مەن ونەرپازدارى, جالپى 117 مىڭنان اسا ادام اتسالىسىپ, 860 تەحنيكا جۇمىلدىرىلدى.
جەتىسۋدا بەكىتىلگەن جەلىلىك كەستەگە سايكەس «تازا ولكە», «كيەلى مەكەن», «جاسىل ايماق», «ونەگەلى ۇرپاق», ء«مولدىر بۇلاق» اپتالىقتارىندا «تازالىق تابالدىرىقتان باستالادى», «تازا قالا تالدىقورعان», «مەنىڭ تازا مەكتەبىم», «بۇلاق كورسەڭ, كوزىن اش», «تازا وزەن», «تازالىق وزىمىزدەن باستالادى» سىندى بىرقاتار اكتسيا ۇيىمداستىرىلدى. ەكولوگيالىق اكتسيالار ناتيجەسىندە 5 338 توننا قوقىس شىعارىلىپ, 2 200 كم ارىق جەلىسى تازالاندى. وعان 763 كاسىپورىن مەن 1 291 الەۋمەتتىك نىسان اتسالىستى. وبلىس اۋماعىندا اكتسيا كەزىندە 29 514 ءتۇپ اعاش وتىرعىزىلدى.
ەلىمىزدە ستيحيالىق قوقىس ورىندارى مەن كولەمى سپۋتنيكتىڭ كومەگىمەن, اەرو ءتۇسىرىلىم ارقىلى انىقتالعان ەدى. قازىر ماماندار سول ورىنداردى تازارتۋ جۇمىسىمەن اينالىسىپ جاتىر. جالپى, ستيحيالىق قوقىس ورىندارىن رەتكە كەلتىرۋ ءىس-شارالارى مەردىگەر مەكەمەلەردىڭ كۇشىمەن جىل بويى اتقارىلماق.
وبلىس ورتالىعى بويىنشا اتالعان جۇمىستى «جاكسىمبەت» جشس جۇزەگە اسىرادى. جىل باسىنان بەرى وبلىس ورتالىعىندا 12 ورىن انىقتالىپ, 273 تەكشە مەتر قوقىستان تازارتىلدى. بۇگىندە 2 ستيحيالىق قوقىس ورنىندا تازالىق جۇمىسى جۇرگىزىلىپ, 35 تەكشە مەتر قوقىس شىعارىلدى.
ء«بىز ءبىر ايدان اسا ۋاقىت كولەمىندە قالانىڭ ءىشى-سىرتىندا تازالىق جۇمىسىن جۇرگىزىپ جاتىرمىز. سوعان ساي ارنايى تەحنيكا كۇشى جۇمىلدىرىلدى. جەتىسۋلىقتار بىرلەسە ەڭبەك ەتىپ, قالا كوركىن جانداندىرۋعا اتسالىسىپ جاتىر. تازا قالا – ەلدىڭ كوركى», دەيدى قالا اكىمى ەرنات ءبازىل.
سونىمەن قاتار قالانىڭ 100-گە جۋىق ەرىكتى, ستۋدەنتتەر مەن «جەتىسۋ جاستارى» ورتالىعىنىڭ قىزمەتكەرلەرى قالا كوشەلەرىن تۇرمىستىق قوقىس پەن بوس بوتەلكەلەردەن تازارتتى. تازالىق اكتسياسى بارىسىندا جينالعان قوقىستار قايتا وڭدەۋ ورتالىقتارىنا جىبەرىلەدى. جاستاردىڭ جوسپارىنا سايكەس قايتا وڭدەۋدەن تۇسكەن قاراجات بالالار كۇنى مەرەكەسىنە وراي, بالدىرعاندارعا مەرەكەلىك كوڭىل كۇي سىيلاۋعا جۇمسالادى.
جەتىسۋ وبلىسى