پرەمەر-ءمينيستردىڭ ءبىرىنشى ورىنباسارى نۇرلىبەك نالىباەۆ جۇمىس ساپارى اياسىندا سولتۇستىك قازاقستان وبلىسىنا بارىپ, وڭىردە جۇزەگە اسىرىلىپ جاتقان ونەركاسىپتىك, ينفراقۇرىلىمدىق, ەنەرگەتيكالىق جانە اگرارلىق جوبالاردىڭ بارىسىمەن تانىستى.
پەتروپاۆل قالاسىندا نۇرلىبەك نالىباەۆ ترانسفورماتورلار مەن ەلەكتروتەحنيكالىق جابدىقتاردىڭ قۇرامداس بولىكتەرىن وندىرۋگە ماماندانعان «پەتروپاۆل ەلەكتروتەحنيكالىق زاۋىتىنا» باردى. جوبانىڭ جالپى قۇنى 10 ملرد تەڭگەنى قۇرايدى. كاسىپورىندا 200 جاڭا جۇمىس ورنى اشىلعان. ءوندىرىس قۋاتى جىلىنا 13 مىڭ دانا ءونىم شىعارۋعا مۇمكىندىك بەرەدى.
سونىمەن قاتار پرەمەر-ءمينيستردىڭ ءبىرىنشى ورىنباسارى وڭىردەگى تەمىرجول جىلجىمالى قۇرامىن وندىرەتىن ءىرى ماشينا جاساۋ كاسىپورىندارىنىڭ ءبىرى «زيكستو» جشس قىزمەتىمەن تانىستى. بىلتىر مۇندا جالپى اۋماعى 12 مىڭ شارشى مەتردى قۇرايتىن جاڭا زاۋىتتىڭ قۇرىلىسى اياقتالىپ, روبوتتاندىرىلعان زاماناۋي تەحنولوگيالىق جەلى ىسكە قوسىلعان. جوبانىڭ جالپى قۇنى 25 ملرد تەڭگەنى قۇرادى, 300 جاڭا جۇمىس ورنى اشىلدى.
بۇعان قوسا ن.نالىباەۆ CLAAS اۋىل شارۋاشىلىعى تەحنيكاسىن قۇراستىرۋ زاۋىتى, «ماسلو-دەل» جشس ماي ەكستراكتسيالاۋ زاۋىتى, «زەلەنىي سەۆەر» جشس جىلىجاي كەشەنى مەن «پەتروپاۆل اۋىر ماشينا جاساۋ زاۋىتى» اق-دا بولدى. اتالعان جوبالار ءوڭىردىڭ ونەركاسىپتىك جانە اگروونەركاسىپتىك الەۋەتىن نىعايتۋعا, شيكىزاتتى تەرەڭ وڭدەۋگە باعىتتالعان.
ساپار بارىسىندا ەنەرگەتيكالىق قاۋىپسىزدىك ماسەلەلەرىنە دە ەرەكشە نازار اۋدارىلدى. پەتروپاۆل جەو-2 نىسانىندا پرەمەر-ءمينيستردىڭ ءبىرىنشى ورىنباسارى 2026–2027 جىلدارداعى جىلىتۋ ماۋسىمىنا دايىندىق, جوندەۋ مەن ينۆەستيتسيالىق باعدارلامالاردىڭ جۇزەگە اسىرىلۋ بارىسىمەن تانىستى. كاسىپورىننىڭ باس ديرەكتورى اناتولي كازانوۆسكيدىڭ ايتۋىنشا, 2022 جىلى كاسىپورىندا 103 تەحنولوگيالىق بۇزۋشىلىق تىركەلگەن. اۋقىمدى جوندەۋ باعدارلامالارىنىڭ ناتيجەسىندە 2024–2025 جىلدارى بۇل كورسەتكىش 55-كە دەيىن تومەندەدى, ال وتكەن جىلۋ بەرۋ ماۋسىمىنىڭ قورىتىندىسىندا تەك 23 جاعداي تىركەلدى. قازىر جاڭا جىلىتۋ كەزەڭىنە دايىندىق قارقىندى جۇرگىزىلىپ جاتىر. بىلتىر ينۆەستيتسيالىق باعدارلامانىڭ كولەمى 15 ملرد تەڭگەنى قۇراسا, بيىل بۇل ماقساتقا 16,2 ملرد تەڭگە قاراستىرىلعان.
نۇرلىبەك نالىباەۆ پەتروپاۆل قالاسىنداعى ۋنيۆەرسالنايا كوشەسىندەگى جول وتكەلى قۇرىلىسىنىڭ جوباسىمەن دە تانىستى. بۇگىندە نىسان 90%-عا دايىن. بۇدان بولەك, پرەمەر-ءمينيستردىڭ ءبىرىنشى ورىنباسارى پەستروە كولى جاعالاۋىنداعى ەكو-پارككە باردى. جوبا رەكرەاتسيالىق ينفراقۇرىلىمدى دامىتۋعا, ىشكى ءتۋريزمدى قولداۋعا, قالالىق ورتانىڭ ساپاسىن ارتتىرۋعا باعىتتالعان.
«ەكو-پارك – تۇرعىندار مەن بالالى وتباسىلار ءۇشىن قولايلى دەمالىس ورنى. مۇندا ۆەلوجولدار مەن جاياۋ جۇرگىنشىلەر ايماقتارى قاراستىرىلىپ, حالىقتىڭ جايلى دەمالۋىنا بارلىق جاعداي جاسالعان. مەملەكەت باسشىسى اتاپ وتكەندەي, قالالار تازا ءارى ءومىر سۇرۋگە قولايلى بولۋعا ءتيىس. پەتروپاۆلدا حالىق يگىلىگى ءۇشىن اۋقىمدى جۇمىستار اتقارىلۋدا. ەندىگى مىندەت – جوبانى ساپالى اياقتاپ, وسىنداي باستامالاردى جۇيەلى تۇردە جالعاستىرۋ», دەدى ن.نالىباەۆ.
ودان كەيىن نۇرلىبەك نالىباەۆ نوۆونيكولسكوە اۋىلىنداعى «زەنچەنكو ي ك» كس-ءنىڭ زاماناۋي تاۋارلى ءسۇت فەرماسىنا باردى. زاماناۋي نىسان 8 مىڭ باسقا ارنالىپ «كارۋسەل» قوندىرعىسىمەن جابدىقتالعان. جوبانىڭ جالپى قۇنى 9 ملرد تەڭگەنى قۇرايدى. ال ءوندىرىس ورنى بيىل تامىز ايىندا ىسكە قوسىلادى دەپ جوسپارلانىپ وتىر.
بۇگىندە «زەنچەنكو ي ك» كس بيزنەستىڭ الەۋمەتتىك جاۋاپكەرشىلىگىنىڭ ۇلگىسىن كورسەتىپ كەلەدى. كاسىپورىن قاراجاتى ەسەبىنەن نوۆونيكولسكوە اۋىلىندا تۇرعىن ۇيلەر مەن الەۋمەتتىك نىساندار سالىنىپ جاتىر. كەيىنگى بەس جىلدا الەۋمەتتىك جاۋاپتى بيزنەس اۋىل تۇرعىندارىنىڭ ءال-اۋقاتىن ارتتىرۋ ماقساتىندا 3,2 ملرد تەڭگەدەن استام قارجى باعىتتادى.
اتالعان جوبالاردىڭ جۇزەگە اسىرىلۋى سولتۇستىك قازاقستان وبلىسىنىڭ ونەركاسىپتىك ءارى اگرارلىق الەۋەتىن نىعايتىپ, جاڭا جۇمىس ورىندارىن اشۋعا, ينفراقۇرىلىمدى جاڭعىرتۋعا, حالىقتىڭ ءومىر ءسۇرۋ ساپاسىن جاقسارتۋعا مۇمكىندىك بەرەدى.