جاس تالانتتىڭ ىزدەنىسى

بيىل بايقاۋعا ەلىمىزدىڭ ءار وڭى­رىنەن كەلگەن 242 وقۋشى قاتىس­تى. سونداي-اق «21 NIS مەك­تەبى» مەن «International Steppe School of Astana» مەكتەبى دە باق سىنادى. مازمۇندى ءىس-شارا شىمىلدىعىن ءداستۇرلى ءانشى, قازاقستاننىڭ ەڭبەك ەرى, پروفەسسور قايرات بايبوسىنوۆ اشتى.

فەستيۆال ميۋزيكل, الەۋمەتتىك بەينەروليك, Sand Art جانە قولونەر باعىتتارى بويىنشا ءوتتى. ماسەلەن, ميۋزيكل شارتىن­دا وقۋشىلار ونەر مەن تەحنولوگيانى شەبەر ۇيلەستىرىپ, جاساندى ينتەللەكتىنى پايدالانۋ ارقىلى ساحنالىق قويىلىمدار ۇسىندى. سونىمەن قاتار قازاق حالىق ەرتەگىلەرى, اڭىزدارى جانە كلاسسيكالىق شىعارمالارى دا زاماناۋي ۇلگىدە كورىنىس تاپتى.

الەۋمەتتىك بەينەروليكتەردە وقۋشىلار قوعام الدىنداعى جاۋاپكەرشىلىك, ەرىكتىلىك, ازا­ماتتىق بەلسەندىلىك پەن ادامگەر­شىلىك قۇندىلىقتاردى ارقاۋ ەتىپ, ءوز ويلارىن جاڭا فورماتتا جەتكىزە ءبىلدى.

ال «Sand Art» باعىتىندا جاس تا­­لانتتار «زياتكەرلىك مەكتەپ وقۋشىلارىنا وقۋعا ۇسىنىلاتىن 100 كىتاپ» جوباسىنا ەنگەن شىعارمالاردى قۇم بەتىندە بەينەلەدى. سالىنعان ءار تۋىندى بەلگىلى ءبىر وقيعانى ­بايانداپ, ادەبي تۋىندىلاردى جاڭا قىرىنان تانىتتى. 

جوباعا قاتىسۋشى نازىم الىمبەكوۆا قۇمعا سۋرەت سالۋ ونەرىمەن العاش اينالىسا باستا­عاندا, ونىڭ قۇپياسىن اڭداي ال­ما­عان. الايدا ۋاقىت وتە كەلە ول بۇل ونەر­دىڭ ەرەكشە قىرىن تانىپ, ەر­كىن­دىك پەن شابىت العانىن ايتادى.

ال قولونەر باعىتى ۇلتتىق قۇندىلىقتار مەن شەبەرلىكتى كورسەتەتىن الاڭعا اينالدى. قا­تى­سۋشىلار اعاشتان, ماتادان, تە­رى­دەن, ساز بالشىقتان, مونشاقتان جاسالعان بۇيىمدار­دى ۇسىنىپ, ۇلتىمىز­دىڭ باي مادەني مۇراسىن دارىپ­تەدى. كەس­تە تىگۋ مەن كانزاشي تەحنيكاسىن­دا ورىندالعان جۇمىس تا كوپشى­لىكتىڭ قىزىعۋشىلىعىن تۋدىرىپ, جاستاردىڭ تالانتى مەن شىعارماشىلىق ىزدەنىسىن ايقىن كورسەتتى. «مەن ءۇشىن بۇل ارت-فەستيۆال تەك قانا ەلىمىزدەگى NIS مەكتەپتەرى توعىساتىن شارا عانا ەمەس, بىرلىك پەن ىنتىماقتاستىق نى­عاياتىن ورتا. سونىمەن قاتار بالا­لاردىڭ قابىلەتىن اشۋعا, ءوز ونە­رىن كورسەتۋگە مۇمكىندىك بە­رە­تىن شىعارماشىلىق الاڭ», دەيدى 7-سىنىپ وقۋشىسى سايات حيمەدەنوۆ.

بايقاۋ قورىتىندىسىندا ءار باعىتتا ۇزدىك جۇمىستار انىق­تالىپ, جەڭىمپازداردى ونەر مايتالماندارى ماراپاتتادى.

فاريزا ءىزباساروۆا,

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ 2-كۋرس ستۋدەنتى