قر پرەمەر-ءمينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە ءبىلىم بەرۋ نىساندارىنىڭ قاۋىپسىزدىگى ماسەلەلەرى تالقىلاندى. جيىنعا ورتالىق مەملەكەتتىك ورگانداردىڭ وكىلدەرى مەن وبلىس اكىمدەرىنىڭ ورىنباسارلارى قاتىستى, دەپ جازادى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
بۇگىندە ءبىلىم بەرۋ نىساندارى ماڭىنداعى جول قاۋىپسىزدىگى ينفراقۇرىلىمىن جاقسارتۋعا بايلانىستى وڭىرلەردە ءتيىستى جول كارتالارى بەكىتىلگەن. ونىڭ اياسىندا مەكتەپتەر, بالاباقشالار, قوسىمشا ءبىلىم بەرۋ ۇيىمدارى ماڭىندا باعدارشامدار, جول بەلگىلەرىن ورناتۋ, جاياۋ جۇرگىنشىلەر تروتۋارلارىن جاساۋ سەكىلدى بىرقاتار شارالار قامتىلعان.
ىشكى ىستەر ءمينيسترىنىڭ ورىنباسارى يگور لەپەحانىڭ كەلتىرگەن مالىمەتىنشە, 13 مىڭنان اسا جالپى ءبىلىم بەرۋ مەكەمەلەرىنىڭ (65%) ماڭىندا بارلىق ءتيىستى تالاپتار ساقتالعان. كورسەتكىشتى جاقسارتۋ ءۇشىن بيىل جانە كەلەسى جىلى 28 مىڭنان استام شارالاردى قولعا الۋ جوسپارلانىپ وتىر. بيىل ازىرگە 570 نىساننىڭ اينالاسىندا ءتيىستى جۇمىستار اياقتالدى.
«باتىس قازاقستان, قوستاناي, شىعىس قازاقستان جانە اباي وبلىستارىندا جول قاۋىپسىزدىگى ينفراقۇرىلىمىن جاقسارتۋعا باعىتتالعان شارالارمەن قامتىلعان نىساندار سانى 10-عا دا جەتپەيدى», دەدى يگور لەپەحا.
قابىلدانىپ جاتقان شارالار تۋرالى وبلىس اكىمدەرىنىڭ ورىنباسارلارى دا باياندادى.
«بەكىتىلگەن جول كارتاسىندا كورسەتىلگەن مەرزىمدەردىڭ ساقتالۋىنا باسا ءمان بەرگەن ءجون. جاز مەزگىلى تەز وتە شىعادى. سوندىقتان ءتيىستى جۇمىستاردى اتقارۋعا جايلى مەرزىمدى بارىنشا ءتيىمدى قولدانۋ كەرەك», دەدى تامارا دۇيسەنوۆا.
كەڭەستە سونداي-اق ءبىلىم بەرۋ نىساندارىنىڭ قاۋىپسىزدىك تالاپتارىنا سايكەستىگىنە قاتىستى دا ءسوز قوزعالدى. وقۋ-اعارتۋ مينيسترلىگى بيىل ءتيىستى ەرەجەگە وزگەرىستەر ەنگىزگەن بولاتىن. وعان سايكەس, كونتينگەنتى 100 ادامنان اساتىن بارلىق ءبىلىم بەرۋ مەكەمەلەرىندە بەينەباقىلاۋ كامەرالارى جەدەل باسقارۋ ورتالىقتارى نەمەسە اۋداندىق پوليتسيا بولىمدەرىنە قوسىلىپ, دابىل باتىرمالارى ورناتىلۋى كەرەك. بۇعان دەيىن تالاپ تەك قالالار مەن اۋدان ورتالىقتارىنا تيەسىلى ەدى.
ال 700-دەن اسا ادام قابىلدايتىن مەكەمەلەردە تۋرنيكەتتەر ورناتىلىپ, كۇزەت قىزمەتتەرىمەن كەلىسىمى بولۋى شارت.
وسىعان سايكەس, ءار ءوڭىر قاۋىپسىزدىك جۇيەلەرىمەن قامتۋ تۋرالى جۇمىس جوسپارى بەكىتۋدە. جوسپار ازىرگە اقمولا, قاراعاندى, قىزىلوردا, اباي, ماڭعىستاۋ, جامبىل, پاۆلودار, شىعىس قازاقستان جانە سولتۇستىك قازاقستان وبلىستارىندا عانا قابىلدانعان.
جيىن بارىسىندا جاقىندا پاۆلودار وبلىسىنداعى مەكتەپتە بولعان جاعداي دا ءسوز بولدى. وقۋ-اعارتۋ مينيسترلىگىنىڭ ينفراقۇرىلىمدى دامىتۋ جونىندەگى دەپارتامەنتى ديرەكتورىنىڭ مىندەتىن اتقارۋشى مارلەن قاسەنوۆتىڭ سوزىنشە, زاڭ جۇزىندە ءبىلىم بەرۋ مەكەمەلەرىنە كىرگىزۋگە تىيىم سالىنعان زاتتاردىڭ ءتىزىمى بەكىتىلگەن, وڭىرلەر اتالعان تىزىمگە سايكەس تالاپتاردىڭ ساقتالۋىن قامتاماسىز ەتۋى ءتيىس.
«وقۋ-اعارتۋ, ىشكى ىستەر مينيسترلىكتەرى اكىمدىكتەرمەن بىرگە بەينەباقىلاۋ كامەرالارىن, دابىل باتىرمالارىن, تۋرنيكەتتەردى قامتاماسىز ەتۋ بويىنشا جۇمىستاردى كۇشەيتۋى قاجەت. بالالارعا قاۋىپسىز ورتا قالىپتاستىرۋدا بارلىق مۇمكىندىكتى پايدالانۋ كەرەكپىز», دەپ تولىقتىردى تامارا دۇيسەنوۆا.
ۆيتسە-پرەمەر مۇددەلى مەملەكەتتىك ورگاندارعا ءبىلىم بەرۋ مەكەمەلەرىندەگى قاۋىپسىزدىكتى قامتاماسىز ەتۋ ءۇشىن قوسىمشا شارالار قابىلداۋ جاعىن قاراستىرۋدى تاپسىردى.