قازاقستان پرەمەر-ءمينيسترى ولجاس بەكتەنوۆ Rhenus Group كومپانيالار توبىنىڭ باسقارما توراعاسى توبياس بارتتسپەن كولىك-لوگيستيكا سالاسىنداعى ىنتىماقتاستىق ماسەلەلەرى بويىنشا كەزدەسۋ وتكىزدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
قويمالاۋ ينفراقۇرىلىمىن جاڭعىرتۋ جانە تەمىرجول تاسىمالىن دامىتۋ ارقىلى قازاقستاننىڭ ترانزيتتىك قۋاتىن ارتتىرۋعا باعىتتالعان جوبالار قارالىپ, جاڭادان قازاق-نەمىس كاسىپورىندارىن قۇرۋ پەرسپەكتيۆالارى تالقىلاندى.
ايتا كەتەيىك, Rhenus Group الەمدەگى ەڭ ءىرى 25 لوگيستيكالىق كومپانيانىڭ قاتارىنا كىرەدى جانە ەۋروپادا 70 تەرمينال جەلىسىنە يەلىك ەتەدى, سونىمەن قاتار كونتەينەر تۇرىندە 22 تەرمينالى بار.
توبياس بارتتس قازاقستاننىڭ جاھاندىق لوگيستيكاداعى نىعايىپ كەلە جاتقان ءرولىن اتاپ ءوتتى جانە تەرمينالدىق قۋاتتاردى ۇلعايتۋ ءۇشىن قازاقستاندىق كومپانيالاردى تارتا وتىرىپ, جاڭا اۋماقتار قۇرۋعا قىزىعۋشىلىعىن ءبىلدىردى. بۇل ەۋروپانىڭ جەتكىزۋ تىزبەگىن ورتالىق ازيامەن بايلانىستىرۋعا مۇمكىندىك بەرەدى.
ولجاس بەكتەنوۆ كولىك-لوگيستيكالىق جانە ترانزيتتىك الەۋەتتى تولىق اشۋ ءۇشىن ينۆەستورلارمەن اشىق جۇمىس ىستەۋگە دايىن ەكەنىن ايتتى. قازاقستان اۋماعى ارقىلى ءىرى ترانسقۇرلىقتىق كولىك دالىزدەرى – ەۋروپادان قىتايعا جانە وڭتۇستىك-شىعىس ازياعا دەيىنگى ەڭ قىسقا جولدار وتەدى. قازاقستان ازەربايجانمەن جانە گرۋزيامەن ترانسكاسپي حالىقارالىق كولىك باعىتى ارقىلى تاۋارلاردى وتكىزۋ ۋاقىتىن قىسقارتۋ بويىنشا بەلسەندى جۇمىس ىستەپ جاتىر. ءبىر جىل ىشىندە ورتا ءدالىز ارقىلى ءوتۋدىڭ جالپى ۋاقىتى 2 ەسەگە قىسقاردى.
«قازاقستان ۇكىمەتى ەلدىڭ كولىك-لوگيستيكالىق الەۋەتىن بارىنشا اشۋعا نيەتتى. ءبىز بىرلەسكەن ينۆەستيتسيالىق جوبالاردى ىسكە اسىرۋ ءۇشىن ىنتىماقتاستىققا دايىنبىز. ءوز تاراپىمىزدان بيزنەس ءۇشىن قولايلى جاعداي جاساي وتىرىپ, تۇراقتى جانە بولجامدى ينۆەستيتسيالىق احۋالعا كەپىلدىك بەرەمىز», — دەپ اتاپ ءوتتى ولجاس بەكتەنوۆ.