سەناتتا 2023 جىلعى رەسپۋبليكالىق بيۋدجەتتىڭ اتقارىلۋى تۋرالى ۇكىمەت پەن جوعارى اۋديتورلىق پالاتانىڭ ەسەپتەرى تانىستىرىلدى. قارجى ءمينيسترىنىڭ ورىنباسارى داۋرەن تەمىربەكوۆ پەن جوعارى اۋديتورلىق پالاتانىڭ مۇشەسى نۇرلان نۇرجانوۆ سەنات دەپۋتاتتارىنىڭ الدىندا بايانداما جاسادى, دەپ جازادى Egemen.kz.
قارجى ءمينيسترى ورىنباسارىنىڭ ايتۋىنشا, ەلىمىزدىڭ ەكونوميكالىق دامۋىن كورسەتەتىن نەگىزگى كورسەتكىشتەردىڭ ءبىرى – ىشكى جالپى ءونىمنىڭ ءوسۋى بولىپ تابىلادى, ول 2023 جىلى 5,1% قۇرادى. بۇل ءوسىم وڭدەۋ ونەركاسىبىندەگى, قۇرىلىس سالاسىنداعى, ساۋداداعى ءوندىرىستىڭ ۇلعايۋىنا, سونداي-اق كولىك سالاسىنداعى قىزمەت كولەمىنىڭ وسۋىنە بايلانىستى بولىپ وتىر.
داۋرەن تەمىربەكوۆ سونىمەن قاتار ىنتىماقتى زەينەتاقى مولشەرى 10,5%-عا يندەكستەلگەنىن, سونداي-اق بىرقاتار مەملەكەتتىك الەۋمەتتىك جاردەماقىلاردىڭ, ونىڭ ىشىندە مۇگەدەكتىگى جانە اسىراۋشىسىنان ايىرىلۋ جاعدايى بويىنشا جاردەماقىلاردىڭ مولشەرى ۇلعايتىلعانىن اتاپ ءوتتى. بيۋدجەت شىعىسىنداعى زەينەتاقى تولەمىنە ارنالعان قارجىنىڭ جالپى سوماسى 3 ملرد 313 ملن تەڭگەدەن استى جانە 2,3 ميلليون زەينەتكەردىڭ لايىقتى ءومىر ءسۇرۋ دەڭگەيىن قامتاماسىز ەتىپ وتىر.
جوعارى اۋديتورلىق پالاتانىڭ مۇشەسى نۇرلان نۇرجانوۆ ءوز كەزەگىندە گەوساياسي دۇربەلەڭدەر پەن سىرتقى قاۋىپ-قاتەرلەرگە قاراماستان ەلىمىزدىڭ ەكونوميكاسى وسە تۇسكەنىن اتاپ ءوتتى. ەكونوميكانىڭ كوپتەگەن سالالارىندا وڭ ناتيجەگە قول جەتتى. ال اۋىل شارۋاشىلىعىندا تابيعي جانە ءىشىنارا كليماتتىق اپاتتارعا بايلانىستى 7,7% تومەندەۋ بايقالىپ وتىر.
پالاتا مۇشەسىنىڭ ايتۋىنشا, وتكەن جىلداعى باستى ماسەلەنىڭ ءبىرى – جۇمىسپەن قامتۋ بولدى. قازاقستاندا ءوزىن-ءوزى جۇمىسپەن قامتىعان تۇرعىنداردىڭ ۇلەسى 22,2% قۇرادى. ولاردىڭ 60%-دان استامى جيناقتاۋشى زەينەتاقى جۇيەسىمەن قامتىلماعان. اشىلعان جۇمىس ورىندارىنىڭ كوپشىلىگى ۋاقىتشا بولعاندىقتان الەۋمەتتىك قورعاۋ اياسىنان جەكە ازاماتتاردىڭ تىس قالۋى ۇلعايا ءتۇستى. وسىعان بايلانىستى, جوعارى اۋديتورلىق پالاتا ۇكىمەتكە تۇراقتى جۇمىسپەن قامتۋدى قامتاماسىز ەتۋ جانە تۇراقتى جۇمىس ورىندارىنىڭ سانىن ۇلعايتۋ جونىندە شارالار قابىلداۋدى ۇسىندى.