جازۋدىڭ ازابى دا, ءلاززاتى دا بىردەي دەسەدى. ال جازۋداعى جاۋاپكەرشىلىك, ءتارتىپ, جۇيەلىلىك اركىمدە ءارتۇرلى. بىرەۋ جالقاۋلانىپ, جازۋ ۇستەلىنەن قاشىپ جۇرەدى. ەندى بىرەۋ شالقار شابىتى تۋاتىن سول ءبىر ءساتتى كۇتەدى. تاعى بىرەۋ جازۋعا ءوز-ءوزىن زورلاپ وتىرعىزادى.
ماسەلەن, ۆيكتور گيۋگو باستاعان شىعارماسىن ۋاقىتىندا اياقتاۋ ءۇشىن ءوز-ءوزىن اياماعان. ءوز ءسوزىن وزىنە تىڭداتا العان. بىلايشا ايتقاندا, وزىنە باعىنا بىلگەن. بۇل دا – اقىل.
جازۋشى «پاريج قۇداي انا سوبورىن» 1830 جىلدىڭ جازىندا باستاپ, 1831 جىلدىڭ اقپانىندا ءتامامدايدى. مۇنداي ءونىمدى جۇمىستىڭ سىرى نەدە دەيسىز عوي. گيۋگو مۇنداي ناتيجەگە جەتۋ ءۇشىن ءبىر بوتەلكە سيا ساتىپ الىپ, ءوزىن بولمەسىنە قاماپ قويعان. ياعني سانالى تۇردە ماجبۇرلەنىپ جازعان. وزىنەن ءوزى ايلاسىن اسىرا ءبىلۋ دە كىشكەنتاي شەبەرلىك ەمەس پە؟
ءيا, وسى ۋاقىتقا دەيىن قانشاما تالانتتى جازۋشى جالقاۋلىعىنان ياكي ءوزىن-ءوزى تاربيەلەي الماۋىنان, ءوزىن جازۋعا وتىرعىزا الماۋىنان ادەبيەتتەن جوعالىپ كەتتى ەكەن؟ نەمەسە ءوز دەڭگەيىنە جەتە الماي, قاتارداعى ورتاقول اۆتورلاردىڭ ءبىرى بولىپ ءجۇردى ەكەن؟.. شەت-شەگىنە ەشكىم جەتە الماعان بەيمالىم سۇراق.