جوعارعى اۋديتورلىق پالاتا وتىرىسىندا 2022 جىلدىڭ 1 قاڭتارى مەن 2023 جىلعى 31 جەلتوقسان ارالىعىندا الماتى قالالىق بيۋدجەتىنىڭ اتقارىلۋىنا سىرتقى مەملەكەتتىك باقىلاۋ جۇرگىزىلدى. باقىلاۋ قورىتىندىسى ءاليحان سمايىلوۆتىڭ توراعالىعىمەن وتكەن جيىندا تالقىلاندى, دەپ جازادى Egemen.kz.
الماتى قالاسىندا قارجىلىق ءتارتىپتى قامتاماسىز ەتۋ جانە نىعايتۋ بويىنشا قابىلدانىپ جاتقان شارالارعا قاراماستان, تەكسەرۋ كوميسسياسى مەملەكەتتىك قىزمەت تۋرالى زاڭناما, بيۋدجەت جانە ەڭبەك زاڭناماسى جەتكىلىكتى دارەجەدە ساقتالماعان فاكتىلەردى انىقتادى.
تەكسەرۋ بارىسىندا ورىندالماعان قىزمەتتەر ءۇشىن قارجى بولىنگەنى بەلگىلى بولدى. ونىڭ ىشىندە 150,4 ملن تەڭگە كولەمىندەگى شىعىستار باسقا باعىتتارعا, نەگىزگى بولىگى سىيلىقاقى رەتىندە تولەنگەن.
الماتى قالاسى بويىنشا تەكسەرۋ كوميسسياسى سىيلىقاقىلار مەن بونۋستاردى تولەۋ ماسەلەلەرىندە زاڭناما تالاپتارىن تولىق ساقتاماعان. بۇل ءوز كەزەگىندە بيۋدجەت قاراجاتىن پايدالانۋداعى ادىلەتتىلىك پەن اشىقتىق قاعيداتتارىن بۇزادى.
«2023 جىلعى جەلتوقساندا تەكسەرۋ كوميسسياسىنىڭ جەكەلەگەن قىزمەتكەرلەرىنە «لاۋازىمدىق مىندەتتەرىن ۇلگىلى ورىنداعانى ءۇشىن» 6,5 ملن تەڭگە سوماعا بىرنەشە رەت سىيلىقاقى تولەنگەن. اتاپ ايتقاندا, جۇمىسقا قابىلدانعان ساتتەن باستاپ ءبىر توقساننان از جۇمىس ىستەگەن ادامدارعا 5 رەت سىيلىقاقى بەرىلگەن. بۇل جاعدايلار ىسساپارعا جىبەرىلگەن قىزمەتكەرلەرگە تۇرعىن ءۇي جالداۋعا ءتيىستى سومانى تولەمەۋ جانە جەكەلەگەن مەملەكەتتىك قىزمەتشىلەرگە تيەسىلى بونۋستاردى تولەمەۋ اياسىندا بولعان», دەلىنگەن جوعارعى اۋديتورلىق پالاتا حابارلاماسىندا.
بۇدان بولەك, 2022-2023 جىلدارى جۇمىس ناتيجەلەرىن باعالاۋ جۇرگىزىلمەگەن جانە جوعارى ەڭبەك تيىمدىلىگى راستالماعان ينسپەكتورلارعا سىياقىلار تولەنگەن. وسى باعىتقا 2022 جىلى – 4,5 ملن تەڭگە, 2023 جىلى – 17,2 ملن تەڭگە نەگىزسىز جۇمسالعان.