قازاقستانعا رەسەي فەدەراتسياسى اۋماعىنان سۋ كەلىپ جاتىر. بۇل تۋرالى سۋ رەسۋرستارى جانە يرريگاتسيا مينيسترلىگى حابارلادى, دەپ جازادى Egemen.kz.
ەلىمىزگە رەسەي فەدەراتسياسى اۋماعىنان سۋ كەلىپ جاتىر. اتىراۋ قالاسىندا جايىق وزەنىنىڭ دەڭگەيى - 553 سم, اتىراۋ وبلىسىنىڭ ماحامبەت اۋىلىندا – 988 سم. جايىق وزەنىنىڭ دەڭگەيى ودان ءارى كوتەرىلەدى دەپ بولجانىپ وتىر. «قازسۋشار» مەكەمەسىنىڭ جەرگىلىكتى فيليالىنىڭ ماماندارى تاسقىن سۋىن وتكىزۋ جۇمىسىن جالعاستىرىپ جاتىر.
باتىس قازاقستان وبلىسىنىڭ ءتورت ءىرى سۋ قويماسى 94%-عا تولدى. ولاردىڭ بارلىعى شتاتتىق كەستەگە ساي جۇمىس ىستەپ تۇر. ايماقتا سۋ تاسقىنىنىڭ ەكىنشى كەزەڭى ءوتىپ جاتىر.
اقمولا وبلىسىنداعى ەكى ءىرى سۋ قويماسى 100%-عا تولى. ەكى نىسان دا شتاتتىق كەستەگە ساي جۇمىس ىستەپ جاتىر. وڭىردە سۋ تاسقىنى اياقتالدى. استانانىڭ قورعانىس بوگەتىنەن ەسىل وزەنىنە تاۋلىگىنە 4,32 ملن تەكشە مەتر سۋ جىبەرىلەدى.
سولتۇستىك قازاقستان وبلىسىنداعى 2 ءىرى سۋ قويماسى 100%-عا تولى. ەسىل وزەنىندە سۋ تاسقىنىنىڭ ەكىنشى كەزەڭى جالعاسىپ جاتىر.
اقتوبە وبلىسىنداعى ەكى ءىرى سۋ قويماسىنىڭ ورتاشا سۋ جيناۋ كورسەتكىشى - 95%. ەكى نىسان دا شتاتتىق كەستەگە ساي جۇمىس ىستەپ تۇر. وڭىردە سۋ تاسقىنى اياقتالدى.
شىعىس قازاقستان وبلىسىندا ەكى ءىرى سۋ قويماسى بويىنشا ورتاشا سۋ جيناۋ كورسەتكىشى - 85,4%. ايماقتا سۋ تاسقىنى ءالى جالعاسىپ جاتىر.
اباي وبلىسىنداعى ءشۇلبى سۋ قويماسى 59,7%-عا تولدى. بۇل ايماقتا دا سۋ تاسقىنى جالعاسىپ جاتىر. ەرتىس كاسكادىنىڭ بارلىق سۋ قويمالارى شتاتتىق كەستەگە ساي جۇمىس ىستەپ تۇر.
قاراعاندى وبلىسىنداعى 3 ءىرى سۋ قويماسى 99,7%-عا تولى. بارلىعى شتاتتىق كەستە اياسىندا جۇمىس ىستەپ جاتىر. وڭىردە سۋ تاسقىنى اياقتالدى.
قوستاناي وبلىسىندا ەكى ءىرى سۋ قويماسىنىڭ ورتاشا سۋ جيناۋ كورسەتكىشى - 92%. ەكى نىسان دا شتاتتىق كەستەگە ساي جۇمىس ىستەپ تۇر. وڭىردە سۋ تاسقىنى اياقتالدى.
«سۋ قويمالارىندا «قازسۋشار» ماماندارىنىڭ كەزەكشىلىگى جانە سۋ شارۋاشىلىعى جاعدايىنىڭ مونيتورينگى جۇرگىزىلىپ جاتىر. سۋ قويمالارىنا جينالعان تاسقىن سۋى اۋىلشارۋاشىلىعى مەن ونەركاسىپتە پايدالانۋ ءۇشىن جىبەرىلەدى», دەيدى مينيسترلىك وكىلدەرى.