...سۋپەرماركەت اشىلدى
اقتوبە قالاسىنا ىرگەلەس ورنالاسقان قارعالى اۋىلىندا “دينا” سۋپەرماركەتى پايدالانۋعا بەرىلدى. ەڭسەلى دە كەڭ ءدۇكەننىڭ اشىلۋ سالتاناتىنا وبلىس اكىمى ەلەۋسىن ساعىندىقوۆ پەن اقتوبە قالاسىنىڭ اكىمى ارحيمەد مۇحامبەتوۆ قاتىستى. سۋپەرماركەتتى ىسكە قوسقان “قابيەۆ ي ك” جاۋاپكەرشىلىگى شەكتەۋلى سەرىكتەستىگى – ساۋدا جەلىلەرىن پايدالانۋعا بەرۋدە وزىندىك قولتاڭباسى قالىپتاسقان كومپانيا. مۇندا جاڭا جۇمىس ورنى اشىلىپ, ولارعا تۇگەلدەي وسى قارعالى اۋىلىنىڭ تۇرعىندارى تارتىلدى.
18 مىڭ حالقى بار اۋىلدىڭ تۇرعىندارى ەندى ات سابىلتىپ قالاعا قاتىناماي-اق بارلىق كەرەك-جاراعىن وسى سۋپەرماركەتتەن تابادى. بۇل دۇكەن تۇتىنۋشىعا 10 مىڭعا جۋىق تاۋار ءتۇرىن ۇسىناتىن بولادى. سۋپەرماركەتتىڭ ەكىنشى قاباتى – مەيرامحانا.
ساتىبالدى ءساۋىرباي.
اقتوبە وبلىسى.
...بالاباقشا “اقمارجان” اتالدى
جالاعاش كەنتىندە 1 جاستان 6 جاسقا دەيىنگى 90 بۇلدىرشىنگە ءتالىم-تاربيە بەرەتىن “اقمارجان” بالاباقشاسى اشىلدى. بالاباقشا قۇرىلىسىنىڭ جالپى قۇنى 166 ملن. 500 مىڭ تەڭگە بولسا, وسى قۇندى قۇرىلىستىڭ باس مەردىگەرى “ۋمپ” جاۋاپكەرشىلىگى شەكتەۋلى سەرىكتەستىگى دەر كەزىندە يگەرىپ, بالعىنداردى قۋانىشقا كەنەلتتى. اتالعان بالالار مەكەمەسى ستاندارتتىق تالاپتارعا ساي سالىنىپ, بارلىق قۇرال-جابدىقتارمەن تولىق جابدىقتالعان. بۇلدىرشىندەرگە 12 ۇستاز ءدارىس بەرىپ, 21 تەحنيكالىق قىزمەتكەر قىزمەت كورسەتەدى.
وبلىس اكىمى بولاتبەك قۋاندىقوۆ بالاباقشانىڭ اشىلۋ سالتاناتىنا قاتىسىپ, ءبۇلدىرشىندەرگە اعالىق اق تىلەگىن جەتكىزدى. ال بالعىندار بي بيلەپ, انمەن شاشۋ شاشتى.
ەركىن ءابىل.
قىزىلوردا وبلىسى.
...ەسكەرتكىش ساياجول
وبلىستىق سانيتارلىق-ەپيدەميولوگيالىق قاداعالاۋ باسقارماسىنىڭ دەرجاۆين قالاسىندا وتكىزىلگەن كوشپەلى ءماجىلىسى ەرەكشە وقيعامەن ايشىقتالدى. ۇستىمىزدەگى جىلدىڭ 1 جارتىجىلدىعىنىڭ قورىتىندىسىن تالقىلاعان باسقوسۋدان كەيىن وبلىستىڭ سانيتارلىق دارىگەرلەرى مارقۇم مارات جاقسىباەۆقا ارنالعان “ەسكەرتكىش ساياجولىن” اشتى. وندا اۋداندىق اكىمدىكتىڭ, تۋعان-تۋىسقانداردىڭ قولداۋىمەن 300 ءتۇپ اق قايىڭ مەن الما اعاشتارى وتىرعىزىلىپ, مەملەكەتتىك قىزمەتكەرگە مەموريالدىق تاقتا ورناتىلدى.
– جىل باسىندا قايتىس بولعان ارىپتەسىمىز مارات سۇلەيمەن ۇلى قاتارداعى دارىگەردەن مەكەمە باسشىسىنا دەيىنگى ابىرويلى جولدا 30 جىلدان استام قىزمەت اتقارىپ, ەل ىشىندە قۇرمەتى وزعان جان ەدى, – دەيدى وبلىستىق مسەقب باستىعى ق.تاشمەتوۆ. – بۇگىنگى يگى ىسكە اتسالىسقان اۋدان اكىمدىگىنە, بارشا جۇرتشىلىققا العىسىمىزدى ايتامىز.
باقبەرگەن امالبەك.
اقمولا وبلىسى, جارقايىڭ اۋدانى.