مەملەكەتتىك ەڭبەك ينسپەكتورلارى رەسپۋبليكانىڭ 126 كاسىپورنى 9,7 مىڭ جۇمىسكەرگە 1,5 ملرد تەڭگەدەن استام سوماعا جالاقى بويىنشا بەرەشەك ەكەنىن انىقتادى. سونىمەن بىرگە ءتۇرلى ۇيىمداردا جۇرگىزىلگەن تەكسەرۋلەر بارىسىندا 3,2 مىڭ ەڭبەك قۇقىعىنىڭ بۇزىلۋ فاكتىسى تىركەلدى, دەپ جازادى Egemen.kz.
جالاقى بويىنشا بەرەشەگى بار كاسىپورىنداردىڭ باسشىلارىنا ورىنداۋعا مىندەتتى 123 ۇيعارىم بەرىلدى جانە 14 ملن تەڭگەدەن استام سوماعا ايىپپۇل سالىندى.
قابىلدانعان شارالاردىڭ, ونىڭ ىشىندە جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋدىڭ ناتيجەسىندە 7,7 مىڭنان استام جۇمىسكەردىڭ قۇقىعى قورعالدى. ولارعا 696,6 ملن تەڭگە تولەندى.
«2024 جىلعى 1 مامىرداعى دەرەكتەر بويىنشا مەملەكەتتىك ەڭبەك ينسپەكتورلارى 2 366 تەكسەرۋ جۇرگىزدى, ونىڭ بارىسىندا 3 199 بۇزۋشىلىق انىقتالدى, ونىڭ ىشىندە: ەڭبەك سالاسىندا – 2 437; ەڭبەك قاۋىپسىزدىگى جانە ەڭبەكتى قورعاۋ بويىنشا – 720; حالىقتى جۇمىسپەن قامتۋ بويىنشا – 86. جۇمىس بەرۋشىلەرگە 1409 ۇيعارىم بەرىلىپ, 177,8 ملن تەڭگە سوماسىنا 1780 اكىمشىلىك ايىپپۇل سالىندى. قابىلدانعان شارالاردىڭ ناتيجەسىندە 12,5 مىڭ جۇمىسكەردىڭ ەڭبەك قۇقىعى قورعالدى», دەلىنگەن ەڭبەك جانە حالىقتى الەۋمەتتىك قورعاۋ مينيسترلىگى تاراتقان اقپاراتتا.