«جەر اماناتىنىڭ» جۇيەلى جۇمىسى

مەملەكەت باسشىسى قاسىم-جومارت توقاەۆ جەردى ءادىل ءبولۋ ماسە­لەسىنە ەرەكشە نازار اۋدارىپ كەلەدى. «Amanat» پارتياسى پرە­زيدەنتتىڭ قوعامدىق تىرەگى رەتىندە وسى مىندەتتىڭ جۇيەلى جۇزەگە اسۋىنا مونيتورينگ جۇرگىزەدى.

شىمكەنتتەگى «كەڭ بابا» قالالىق ساياباعىنىڭ ىرگەسى سوناۋ 1901 جىلى قالانىپ, اۋماعىنا باعالى اعاشتار, نەگىزىنەن ەمەن ەگىلگەن. الايدا بۇگىندە ساياباق ويىن-ساۋىق بيزنەسى كەڭىستىگىنە اينالعان. ونداعى 3,5 گەكتاردىڭ 2,6 گەكتارى زاڭcىز پايدالانىلادى. سوت شەشىمىنە سايكەس جەر مەملەكەت مەنشىگىنە قايتارىلۋى كەرەك. باقىتجان بازاربەك الدا اپەللياتسيا كەزەڭى كۇتىپ تۇرعانىن ايتتى. دەپۋتات ساياباق اۋماعىندا زاڭسىز سالىنعان مەيرامحاناسى بار قوناق ءۇي كەشەنىنە جەكە توقتالدى.

«2009 جىلى قالا اكىمدىگىنىڭ قاۋلى­سىمەن 0,5664 گەكتار جەر ۋچاس­كەسى ۋاقىتشا پايدالانۋعا بەرى­لىپ, ءبىر جىلدان كەيىن بۇل جەر جەكەمەنشىككە ءوتىپ كەتتى. جەر كو­دەكسىنە سايكەس, جالپىعا ورتاق پاي­دالانىلاتىن جەردى جەكەشە­لەن­­دىرۋگە بولمايدى. قازىر بۇل جەر­دە 5-قاباتتى مەيرامحانا بار. شىم­كەنت قالاسىنىڭ جەر رەسۋرس­تارىن باسقارۋ دەپارتامەنتى اكىم­دىكتىڭ قاۋلىسىن زاڭسىز دەپ تانۋ تۋ­رالى تالاپ-ارىز جولداپ, سوت ال­عاش ينستانتسيادا اتالعان ارىزدى قاناعاتتاندىردى», دەدى دەپۋتات.

بۇدان سوڭ پارتيالىقتار قالا­لىق اكىمدىكتىڭ جانىنان سالىنىپ جاتقان كوپپاتەرلى « ۇلى دالا» تۇرعىن ءۇي كەشەنىنىڭ قۇرىلىسى­مەن تانىستى. اماناتتىقتاردىڭ ايتۋىنشا, قۇرىلىس كومپانيا­سى ءدال وسى جەر ۋچاسكەسىن ەشقان­داي اۋكتسيونعا جانە كونكۋرسقا قاتىسپاي الىپتى.

«جەر اماناتى» كوميسسياسى 2022 جى­لى قالالىق اكىمدىكتىڭ قاۋلى­سىمەن 2,2 گەكتار جەر ۋچاس­كەسى «Shymkent» الەۋمەتتىك-كاسىپكەر­لىك كورپوراتسياسى» اق-عا 5 جىل­عا ۋاقىتشا جەر پايدالانۋعا بەرىلگەنىن انىقتادى. بۇدان سوڭ اكك اتالعان ۋچاسكەنى اكىمدىكتەن ساتىپ الىپ, كەيىن جەكە قۇرىلىس كومپانياسىنا قايتا ساتىپتى.

«تۇرعىن ءۇي كەشەنى قۇرىلى­سى ينۆەستيتسيالىق جوبا انىق­تاماسىنا جاتپايدى. بۇل دەگەنىڭىز – جەر كودەكسىنىڭ 48-بابىن بۇزۋ. قۇرىلىستى توقتاتۋ تۋرالى زاڭدى كۇشىنە ەنگەن سوت شەشىمى بار. سوعان قاراماستان نىسان قۇرىلىسى جالعاسىپ جاتىر. پاتەرلەر ەركىن ساتىلىمدا. جەرگىلىكتى بيلىكتىڭ سوت شەشىمىن ورىنداۋعا كۇشى جەتپەيتىن سەكىلدى», دەدى باقىتجان بازاربەك.

ەسكە سالا كەتەيىك, بۇعان دەيىن پارتيا دەندروپارك اۋماعىنداعى 0,4 گەكتار جەر ۋچاسكەسىن مەملەكەت مەنشىگىنە قايتارۋعا اتسالىستى. جالپى, بىلتىر شىمكەنتتەگى «جەر اماناتى» كوميسسياسى اتقارعان جۇمىستىڭ ناتيجەسىندە كوكبۇلاق تۇرعىن الابىندا اۋىل شارۋاشىلىعى ماقساتىنداعى 603 گەكتار جەر مەملەكەت مەنشىگىنە قايتارىلدى. سونىمەن قاتار قالا شەگىندەگى جالپى اۋماعى 1,33 گەكتاردى قۇرايتىن ەكى جەر ۋچاسكەسى دە مەملەكەت مەنشىگىنە ءوتتى.

ايتا كەتەيىك, وتكەن ەكى جىلدا ەل اۋماعىندا 10,3 ملن گەكتارعا جۋىق جەر مەملەكەت مەنشىگىنە قاي­تا­رىلدى. ونىڭ 3 ملن گەكتارعا جۋى­عى تۇرعىندارعا ءبولىنىپ بەرىلدى.

بۇعان دەيىن رەسپۋبليكالىق «جەر اماناتى» كوميسسياسىنىڭ باستاماسىمەن ءاربىر اۋىلدىق ەلدى مەكەندەگى جايىلىم تاپشىلىعى مەن مەملەكەت مەنشىگىنە قايتا­رىل­عان جەر ۋچاسكەلەرىنىڭ تىزبەسى كورسەتىلگەن jerkarta.gharysh.kz ينتە­راكتيۆتى كارتاسى ازىرلەندى.