وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتىندە «AICTC-2024» اياسىندا اقپاراتتىق كوممۋنيكاتسيالىق تەحنولوگيالار جانە كومپيۋتەرلەر سالاسىنداعى جەتىستىكتەرگە ارنالعان 5-حالىقارالىق كونفەرەنتسيا ءوتتى. «Springer» حالىقارالىق عىلىمي باسىلىمىنىڭ زەرتتەۋلەرىنە ارنالعان بۇل جيىنعا الەمنىڭ ءار قيىرىنان 300-دەن اسا ەڭبەك جيناقتالىپ, ىرىكتەلگەن 80 زەرتتەۋ ناتيجەسى قاتىسۋشىلار تالقىسىنا ۇسىنىلدى.
كونفەرەنتسياعا دۇنيە جۇزىندەگى جوعارى وقۋ ورىندارىنىڭ زەرتتەۋشىلەرى مەن «Springer» حالىقارالىق عىلىمي باسىلىمدار ۇيىمىنىڭ جاۋاپتى عالىمدارى قاتىستى. ولار «مەكتەپتەگى الەۋمەتتىك پەداگوگتىڭ ءرولى», «كاسىپكەرلىكتى دامىتۋ ءۇشىن پانارالىق بايلانىس قۇرۋ ماقساتىنداعى ءبىلىم بەرۋ تەحنولوگيالارىنىڭ سينەرگياسى» تاقىرىپتارى ارقىلى فيزيكالىق مۇمكىندىگى شەكتەۋلى جاندار ءومىرىن جاڭا تەحنولوگيا جەتىستىكتەرى ارقىلى جەڭىلدەتۋ, سونداي-اق ءبىلىم بەرۋ سالاسىندا اقپاراتتى تەحنولوگيانى قولدانۋ تۋرالى تۇجىرىمدارىن جاسادى.
جيىندى ۋنيۆەرسيتەت باسقارما توراعاسى-رەكتور مىندەتىن ۋاقىتشا اتقارۋشى گۇلجان سۇگىرباەۆا مەن «Springer»-ءدىڭ لوندونداعى جاۋاپتى رەداكتورى انيندا بوۋز قۇتتىقتاۋ سوزبەن اشتى. نازارباەۆ ۋنيۆەرسيتەتىنىڭ پروفەسسورى پراشانت دجامۋال, چەحيانىڭ ءبىلىم جانە الەۋمەتتىك عىلىمدار ينستيتۋتى وكىلى توماس چەك, «GR Scholastic» ۇيىمىنىڭ جانە ءۇندىستاننىڭ ساۋدا-ونەركاسىپتىك ءبىلىم پالاتاسىنىڭ ديرەكتورى, پروفەسسور اميت دجوشي «مەكتەپتەگى الەۋمەتتىك پەداگوگتىڭ ءرولى», «كاسىپكەرلىكتى دامىتۋ ءۇشىن پانارالىق بايلانىس قۇرۋ ماقساتىنداعى ءبىلىم بەرۋ تەحنولوگيالارىنىڭ سينەرگياسى» تاقىرىپتارىندا بايانداما وقىدى.
«ۋنيۆەرسيتەتىمىزدە AICTC-2024 كونفەرەنتسياسى باستالدى. جاڭا تەحنولوگياداعى جەتىستىكتەر مەن زەرتتەۋلەردى سارالايتىن بۇل جيىن قازاقستاندا العاش رەت جانە وزبەكالى جانىبەكوۆ اتىنداعى وقپۋ-دا ءوتىپ جاتقانىن ايتا كەتۋ كەرەك. بۇعان دەيىنگى كونفەرەنتسيالار بريتانيادا, مىسىردا, مالايزيادا, دۋبايدا ۇيىمداستىرىلعان. كونفەرەنتسياعا الەمدە وزەكتى قولدانبالى زەرتتەۋلەرىمەن ويىپ ورىن العان جوو-دان, سونداي-اق عىلىمدا ارتىق تانىستىرۋدى قاجەت ەتپەيتىن «Springer» حالىقارالىق عىلىمي باسىلىمدار ۇيىمىنىڭ جاۋاپتى عالىمدارى قاتىسىپ وتىر. جاڭا تەحنولوگيا جەتىستىكتەرى مەن زەرتتەۋلەرى الەمدە تەك ادامزات قۇندىلىعىنا, ورتاق يگىلىكتەرگە قىزمەت ەتە بەرسىن» دەدى گ.سۇگىرباەۆا.
القالى جيىندا ءبىلىم مەن عىلىمعا قۇشتار جاستار ىزدەنۋشى ءبىلىم بەرۋدە جاڭا تەحنولوگيانى قولدانۋدىڭ وزەكتى ماسەلەلەرى مەن سوڭعى جاڭالىقتارىنا قانىقتى. ىرىكتەلگەن ماقالالار قازاقستان, جاپونيا, قىتاي, مىسىر, مالايزيا, كوسوۆو, برازيليا, سينگاپۋر, چەحيا, ەفيوپيا, بريتانيا, يراك, يندونەزيا, بانگلادەش, پولشا, ءۇندىستان, گانا, اقش-تان كەلىپ تۇسكەنىن ەسكەرسەك, بۇل كونفەرەنتسيا ءتۇرلى گەوگرافيالىق ايماقتاردىڭ تاجىريبەسى مەن زەرتتەۋلەرىن ءبىر ارناعا توعىستىردى.
بۇدان كەيىن شەتەلدىك قوناقتارعا ارنايى كادەسىيلار تابىستالىپ, ۋنيۆەرسيتەتتىڭ «دومبىرا» ۇيىرمەسىنە قاتىسۋشى ونەرپازدار كۇيى ورىندالدى. ال تۇسكە قاراي قاتىسۋشىلار سەكتسيالىق ماجىلىستە وزبەكالى جانىبەكوۆ اتىنداعى وقپۋ عىلىمي جۇمىستار جانە يننوۆاتسيالار جونىندەگى پرورەكتورى ەرجان كەرىمبەكوۆتىڭ مودەراتورلىعىمەن وتكەن سەكتسيالىق ماجىلىستە عىلىمي زەرتتەۋلەردى تالقىلادى.
«حالىقارالىق كونفەرەنتسيادان كوپ نارسە ۇيرەنىپ جاتىرمىز. جالپى, ءۇندىستان – ءىت تەحنولوگياسى بويىنشا الدىڭعى ورىندا تۇرعان مەملەكەتتەردىڭ ءبىرى. ماسەلەن, Google كومپانياسىنىڭ باس ديرەكتورى – ءۇندى ازاماتى. بۇگىنگى تاڭدا ءبىزدىڭ ەل حالىقارالىق كەلىسىمدەر نەگىزىندە ءىت تەحنولوگياسىن دامىتۋعا قارىشتى قادام جاساپ جاتىر. وسى كونفەرەنتسيا اياسىندا ەكى ەلدىڭ عىلىمي ارىپتەستىگى بويىنشا كەلىسىمدەر جاسالدى. سوعان سايكەس ارنايى باعدارلاما شەڭبەرىندە شىمكەنتتىڭ ستۋدەنتتەرى دوكتورانتۋرا مەن باكالاۆريات دەڭگەيىندە ءۇندىستاننىڭ بەدەلدى وقۋ ورىندارىندا وقۋ-پراكتيكالىق تاعىلىمدامادان وتەتىن بولدى. ءوز كەزەگىندە ءۇندىستاننىڭ دا ستۋدەنتتەرى ءبىز تۇرعان ۋنيۆەرسيتەتتە ەكى جىل وقۋىن جالعاستىرا الادى. ءبىر بىلەتىنىم, قازاقستاننىڭ ءبىلىمدى جاستارى ساندىق تەحنولوگيانى مەڭگەرۋ جاعىنان الەمدە كەز كەلگەن ەلدىڭ وكىلدەرىمەن باسەكەلەسۋگە قابىلەتى جەتەدى. ونى مەن حالىقارالىق بايقاۋلاردا بايقاپ ءجۇرمىن. قازاقستان ماعان وتە قاتتى ۇنادى. اسىرەسە, جاستارى وتە ءبىلىمدى ەكەن. مۇنىڭ الدىندا ساياحات تۋرىمەن كەلگەندە جەرگىلىكتى ادامدار قول بۇلعاپ ء«سىز ءۇندىستاننانسىز با؟» دەپ جىلى جىمياتىن. بۇل قازاق حالقىنىڭ اقكوڭىل, مەيماندوس جاندار ەكەنىن بىردەن اڭعارتادى. ءىت سالاسى بويىنشا الەمنىڭ تانىمال عالىمدارىنىڭ باسىن قوسقان مۇنداي جيىن تاجىريبە الماسۋدا وتە ماڭىزدى. ويتكەنى ءۇندىستاننىڭ ءوزى ءىت ماماندارىن وسىنداي حالىقارالىق تاجىريبە الماسۋ ارقىلى دايارلايدى», دەدى حالىقارالىق سيمبيوزيس ۋنيۆەرسيتەتىنىڭ عالىمى دوكتور ك.كوتەچا.
اۋقىمدى جيىن عالىمداردىڭ زەرتتەۋ تاقىرىبىن بولىسۋىنە ءوزارا جاقىن ارىپتەستىك بايلانىس ورناتۋىنا جول اشتى. سەكتسيالىق ماجىلىستە ەڭ ۇزدىك ماقالاعا سەرتيفيكات تابىستالدى. حالىقارالىق كونفەرەنتسيا ەكى كۇن بويى جالعاستى.