2 مامىردا وتكەن ءماجىلىستىڭ جالپى وتىرىسىندا دەپۋتات داۋلەت مۇقاەۆ تازالىق جۇمىستارىن سەنبى ەمەس, تۇراقتى تۇردە بەيسەنبى كۇنى وتكىزۋدى ۇسىندى, دەپ جازادى Egemen.kz.
ماجىلىسمەن ەل اراسىندا كوپ جۇرەتىنىن, وڭىرلەردى ءجيى ارالايتىنىن العا تارتىپ, قوعامدا قورشاعان ورتانى تازا ۇستاۋ, قوقىستى ارنايى ورىنعا تاستاۋ مادەنيەتى ءالى دە قالىپتاسپاي وتىرعانىن ايتتى.
«قوعامدا ءالى دە ازاماتتارىمىزدىڭ قالدىقتاردى ارنايى قوقىس تاستايتىن ورىندارعا سالۋ مادەنيەتى قالىپتاسپاي وتىرعانى جاسىرىن ەمەس. مىسالى, پلاستيك, اينەك جانە پوليەتيلەن پاكەتتەردىڭ ءشىرۋى 1000 جىلعا دەيىن سوزىلادى. مۇنىڭ جەر انامىزعا, ادامزات بالاسىنا, كەلەر ۇرپاققا تيگىزەر زالالى زور», دەدى داۋلەت مۇقاەۆ.
دەپۋتات دامىعان ەلدەردەگىدەي ازاماتتاردى اينالانى تازا ۇستاۋعا داعدىلاندىرۋ, ەرىكتى تۇردە تازالىق جۇمىستارىنا جۇمىلدىرۋ ءۇشىن اپتانىڭ ءبىر كۇنىن تۇراقتى تازالىق كۇنى دەپ بەكىتۋدى ۇسىندى.
«مىسالى, اپتانىڭ تاعى ءبىر كۇنىن, ناقتىلاپ ايتساق, ءار بەيسەنبىنى «تازا بەيسەنبى» اتتى شىنايى حالىقتىق شاراعا اينالدىرايىق. ادامداردى ماجبۇرلەپ ەمەس, ال كەرىسىنشە ءوز ىقىلاسىمەن, تۇرعان جەرىنە دەگەن جاناشىرلىقپەن اتسالىسۋىنا جاعداي جاسايىق. ءبىز سول كەزدە عانا كۇن-ءتۇن دەمەي, كۇننىڭ ىستىق-سۋىعىنا قاراماي كوشەنى تازالاپ جۇرگەن اتا-اپالارىمىزدىڭ ەڭبەگىن باعالاۋدى ۇيرەنەمىز», دەدى ماجىلىسمەن.
داۋلەت مۇقاەۆ بۇل شارانى جۇزەگە اسىرۋ ىسىنە الەۋمەتتىك جەلىدەگى ميلليونداعان وقىرمانى بار تانىمال تۇلعالاردى, قوعام بەلسەندىلەرىن, ەل تۇرعىندارىن ءۇن قوسۋعا شاقىردى.