ستامبۇلدا كۇرەس تۇرلەرىنەن وتەتىن وليمپيادالىق ىرىكتەۋ تۋرنيرىندە قازاقستان ساپىنان باق سىنايتىن ەكى بالۋاننىڭ ەسىمى انىقتالدى, دەپ حابارلايدى Egemen.kz.
ءدۇبىرلى دوداعا 67 كەلىدەگى سالماقتا دىنمۇحاممەد قوشقار جانە 97 كەلىدە يۋسۋف ماتسيەۆ قاتىسادى. بۇل تۋرالى Kaz_wrestling تەلەگرام-ارناسىنان ءمالىم بولدى.
پاريج وليمپياداسىنا جولداما ۇلەستىرەتىن الەمدىك ىرىكتەۋ باسەكەسى مامىر ايىنىڭ 9-12 كۇندەرى وتەدى. اتالعان جارىسقا ەلىمىزدىڭ گرەك-ريم, ەركىن جانە ايەلدەر كۇرەسى قۇرامالارى قاتىسادى.
ايتا كەتسەك, ازىرگە ۇلتتىق قۇرامادا 4 جولداما بار: بۇعان دەيىن گرەك-ريم كۇرەسى بالۋاندارى بىشكەكتە وتكەن ازيا ايماقتىق ىرىكتەۋ تۋرنيرىندە 3 جولداماعا يە بولعان. جولداماعا ايدوس سۇلتانعالي (60 كەلى), دەمەۋ جادىراەۆ (77 كەلى), ءالىمحان سىزدىقوۆ (130 كەلى) قول جەتكىزگەن. سونداي-اق 2023 جىلعى الەم چەمپيوناتىندا نۇرسۇلتان تۇرسىنوۆ (87 كەلى) جولداما جەڭىپ العان ەدى.